«Viesti niedieli» z Kisialovym
«Vielmi ciažki tydzień na frantach śpiecapieracyi. Pierahrupoŭvańnie našych bajavych paradkaŭ», — adrazu zadaje ton pieradačy Dźmitryj Kisialoŭ, viadučy prahramy, jakaja była amal całkam pryśviečanaja rasijska-ŭkrainskaj vajnie.
Prapahandysty nie stali prychoŭvać horkuju praŭdu ad rasijan, ale, viadoma, vykarystoŭvali śpiecyfičnuju leksiku dla apisańnia ŭciokaŭ Rasii.
Uvieś čas i Kisialoŭ, i reparciory vykarystoŭvali słova «pierahrupoŭvańnie», ale pry hetym dadajučy, što adbyłosia jano «pad naciskam pieravyšajučych sił praciŭnika».
«Padobna, charaktar, i navat maštab dziejańniaŭ Rasii padčas śpiecapieracyi (vajny, — zaŭv. NN) va Ukrainie pačynaje źmianiacca. My dziejničajem kudy bolš rašuča. Žarty skončylisia!», — kaža Kisialoŭ, z zachapleńniem raskazvajučy, jak Rasija źniščaje va Ukrainie enierhietyčnuju infrastrukturu.
«Chłopcy nastrojenyja pa-bajavomu, hatovyja pracavać. Usio zrobim dla taho, kab adstajać i zabrać. Ruskija nie zdajucca. Ruski — heta stan dušy. Z nami Boh!» — zajaŭlaje ŭ siužecie rasijski vajskoviec, jaki ledź padbiraje słovy, kab nie pierajści na maty.
Reparciory i sam Kisialoŭ uvieś čas paźbiahajuć vykarystańnia słoŭ «ukrainskaja armija». Užyvajucca farmuloŭki «farmavańni režymu», «kijeŭskija bajeviki», «banderaŭskija terarysty» i inšyja. Heta robicca pa zrazumiełaj pryčynie. Kali adna armija vajuje suprać inšaj armii, jana pavinna vykonvać normy mižnarodnaha humanitarnaha prava, praviły viadzieńnia vajny. A voś vajujučy suprać terarystaŭ i niezakonnych uzbrojenych farmavańniaŭ, vykonvać hetyja normy nie abaviazkova, tamu Rasija i robić usio, kab nie nazyvać ukrainskuju armiju armijaj.
Prapahandysty apraŭdvajucca: tak, my pakinuli Charkaŭščynu, a voś va ŭkraincaŭ škoda jašče bolšaja, dyj kiravali tam usim zachodnija instruktary.
«A voś hety vystrał budzie pomstaj tavaryšam ukrafašystam», — havoryć u kadry niejki rasijski sałdat.
Buchaje harmata.
«Voś, a ciapier ja ščaślivy», — zadavolena kaža rasijanin.
«Amieryka i NATA nastrojenyja maksimalna zaciahnuć kanflikt va Ukrainie», — znoŭ biare słova Kisialoŭ i raskazvaje, što kanflikt vakoł Ukrainy nibyta raspaliła Amieryka, jakaja choča pasvaryć Rasiju z naiŭnaj i durnoj Jeŭropaj.
Pakazali ŭ pieradačy i vystupleńnie Pucina na forumie va Uładzivastoku. Pa viersii rasijskaha prezidenta, u spynieńni pastavak rasijskaha hazu ŭ Jeŭropu vinavatyja… ukraincy i palaki.
«My ničoha nie stracili i nie stracim… My jašče ničoha nie pačynali z punktu hledžańnia vajennych dziejańniaŭ, my imkniomsia tolki skončyć», — chłusić Pucin na forumie.
Na akupavanych Rasijaj terytoryjach, havorycca ŭ pieradačy, ludzi starajucca «prosta žyć». Kramloŭskaje ŚMI maluje idyličnuju karcinu žyćcia pad akupacyjaj: piensii płaciacca, damy i darohi budujucca, dzieci naradžajucca i hetak dalej.
«Vyzvaleny ad ukrainskich nacystaŭ Maryupal imkliva viartajecca da narmalnaha žyćcia», — kaža prapahandyst.
U siužecie pachvalilisia, što akupacyjnaja administracyja adnaviła ažno try škoły ŭ amal całkam zrujnavanym horadzie (dzie da vajny žyło 450 tysiač čałaviek).
Va ŭsich zrujnavanych budynkach byli «bazy Azova», śćviardžaje prapahandyst.
Ale ŭ vyniku Rasija ŭsio adbuduje, usich nakormić, napoić i sahreje, abiacajuć prapahandysty.
U adroźnieńnie ad žycharoŭ Maryupala i Chiersona, zachodnim krainam, pa viersii prapahandystaŭ, pašancavała mienš. Jeŭropu čakaje choład i hoład, havorycca ŭ pieradačy.
Jeŭrapiejcy buntujuć i voś-voś źniasuć svaje ŭrady, sankcyi suprać Rasii źnimucca, Ukraina padzie i vajna skončycca na ŭmovach Rasii — prapahandysty nie prychoŭvajuć hetaha raźliku Kramla.
«60 minut» sa Skabiejevaj
Prapahandystka Volha Skabiejeva pačynaje pieradaču, chvalačysia, što rasijskaja armija naniesła ŭdary pa abjektach krytyčnaj infrastruktury ŭ rajonie Kryvoha Roha.
«Siem kryłatych rakiet paškodzili dambu na Karačunaŭskim vadaschoviščy. Damba atrymała surjoznyja paškodžańni, z-za čaho ŭ race Inhulec padniaŭsia ŭzrovień vady.
Kryvy Roh (a heta radzima Zialenskaha) amal całkam zatopleny», — tryumfuje i śmiajecca Skabiejeva.
Nasamreč, uzrovień vady padniaŭsia na mietr-dva, byli padtoplenyja dačy i pryvatny siektar, ale ŭkrainskija kamunalnyja słužby ciaham niekalkich hadzin pryniali miery dla vypraŭleńnia situacyi.
«My ŭ chutkim časie budziem hulać pa Mikałajevie i vyzvalenaj Adesie. Kali niechta raskazvaje nam pra našy paražeńni, ja nahadaju tolki słovy našaj ruskaj kłasiki.
«Zapomnitie, vrahi, naš taktičieskij prijom.
Kohda my otstupajem, eto značit, my vpieriod idiom».
Tamu što maci-pryroda chutka pryniasie nam zimu, padčas jakoj usio stanie zrazumiełym», — kaža ŭ pieradačy rasijski kałabarant u Chiersonie Kirył Stramavusaŭ.
Dalej Skabiejeva i hości pieradačy nakinulisia na Ursułu fon der Lajen za jaje apošniuju pramovu, u jakoj taja zajaviła, što sankcyjami ES zrujnavaŭ rasijskuju ekanomiku, a rasijskim vajskoŭcam davodzicca brać mikraschiemy dla kryłatych rakiet u pasudamyjnych mašynach.
— Jana pavinna rychtavacca da vypadzieńnia z akna, — kaža prapahandyst Dźmitryj Jahorčankaŭ.
Skabiejeva ž paśmiajałasia z taho, što fon der Lajen pa pieršaj prafiesii hiniekołah.
Hości pieradačy aburylisia, što fon der Lajen spakojna jeździć u Kijeŭ, Zialenski jedzić u Izium, ale ŭsio heta zdarajecca tolki tamu, što Rasija vielmi dobraja.
«Łohika, jakaja pačynajecca ciapier z naniasieńniem udaraŭ pa žyćciova važnaj infrastruktury (u tym liku pa dambie Kryvoha Roha, — NN) — dumaju, heta pravilnaja łohika. Niemahčyma ŭvieś čas žyć u łohicy, kali my pastajanna vielmi dobrańkija. Jany nie razumiejuć!» — dadaje Jahorčankaŭ.
Dalej hości pieraklučylisia na deficyt mikračypaŭ u Rasii, jakija joj tak patrebnyja dla vytvorčaści kryłatych rakiet.
Kamientatar Dźmitryj Abzałaŭ narakaje: praz amierykanskija sankcyi na pastaŭki mikračypaŭ u Rasiju, nibyta, ciarpiać u pieršuju čarhu Paŭdniovaja Kareja, Japonija i Tajvań, amierykanskija sajuźniki. Maŭlaŭ, hetyja krainy nie mohuć pradavać ciapier svaje čypy ŭ Rasiju i praz heta ich čakaje kryzis.
Prapahandyst całkam ihnaruje toj fakt, što rasijski rynak byŭ daloka nie hałoŭnym dla suśvietnych vytvorcaŭ mikračypaŭ. Dy i ŭ śviecie ciapier nazirajecca deficyt čypaŭ — u tajvańcaŭ i karejcaŭ prablem z popytam niama.
«Zachad u asobie ZŠA choča akazać uździejańnie na Rasiju i prymusić jaje admovicca ad suvierennaj zamiežnaj palityki, pradavać biaspłatna svaje resursy. Ukraina ŭ hetym vypadku ŭsiaho tolki instrumient uździejańnia Zachadu na Rasiju», — kaža rasijski prapahandyst Starykaŭ.
Vajnu va Ukrainie, viadoma, raźviazała Amieryka, vyvieŭšy svaje vojski z Afhanistana, kaža Starykaŭ.
Maŭlaŭ, dźvie vajny Amieryka b nie paciahnuła, i kali b vajna pačałasia i tam, i tam, to Rasija pačała b uzbrojvać isłamistaŭ i talibaŭ, nie prychoŭvaje Starykaŭ.
Dalej hości pieraklučajucca na Jeŭropu.
«Ja, kaniečnie, nie ekśpiert u ekanomicy, ale śpiecyjalisty mnie skazali, što Hiermanija pieražyvaje deindustryjalizacyju», — skazaŭ sienatar ad Murmanskaj vobłaści Kanstancin Dohłaŭ.
Nasamreč, Hiermanija zastajecca suśvietnym lidaram u pramysłovaści, tady jak pramysłovaść Rasii zastajecca adstałaj, a asnovu ekspartnych dachodaŭ RF pa-raniejšamu składaje syravina.
«Viečar z Uładzimiram Sałaŭjovym»
«Moc ruskaha duchu i vielič ruskaha sałdata pavinny raz i nazaŭsiody rastłumačyć Jeŭropie i ŭsim, chto vahajecca ŭ tym, chto i jak umieje pieramahać. I nie dazvalać usialakaj nacysckaj svałacie chichikać i sprabavać vycirać nohi ab našych hierojaŭ», — pačaŭ svaju pieradaču Sałaŭjoŭ.
«Treba stvarać mižnarodnuju kaalicyju! Čamu my ŭvieś čas admaŭlajemsia heta rabić? Jość ža Siryja, jość našy ludzi ŭ Afrycy, jość Vieniesueła, Nikarahua, jość Kuba, jość Iran i Paŭnočnaja Kareja!» — aburajecca prapahandyst.
Potym Sałaŭjoŭ pačaŭ kamientavać zvarot fon der Lajen.
«A čamu ty havoryš pa-anhlijsku? Čamu Ursuła havoryć na movie krainy, jakaja vyjšła ź ES? Čamu jana havoryć nie na rodnaj niamieckaj? Kab pakazać zaležnaść ad svajho haspadara?» — nie sunimajecca Sałaŭjoŭ, zabyŭšysia, što anhlijskaja mova źjaŭlajecca aficyjnaj u Irłandyi i na Malcie, a značyć, i va ŭsim ES.
«Ursuła, kajn-kajn! Šprechien zi dojčie! Ni ŭnižaj svoj radnoj jezykien! Havari pa-niemiecki», — viščyć Sałaŭjoŭ, małpujučy niamiecki akcent i manieru vymaŭleńnia Hitlera.
Sałaŭjoŭ, jak i Skabiejeva, pakpiŭ ź pieršaj prafiesii fon der Lajen:
— Ursuła, ja razumieju, što vy hiniekołah. Zastavalisia b u prafiesii, nie hańbilisia b.
Vital Traćciakoŭ, dekan MDU, abmiarkoŭvajučy vajnu va Ukrainie, pajšoŭ jašče dalej. Prafiesar prapanavaŭ va ŭmovach vajny pierafarmatavać administracyjnaje ŭstrojstva Rasii, stvaryŭšy pryfrantavuju akruhu, a taksama aburajecca, što nasielnictva na akupavanych terytoryjach niełajalnaje da Rasii.
Taksama jon panarakaŭ, što Ukraina bje pa rasijskaj terytoryi i terytoryjach, zaniatych rasijskaj armijaj. Tamu, padvioŭ Traćciakoŭ, z ukraincami cyrymonicca nie treba.
«Moža być, naša nasielnictva nam usio ž daražejšaje za ŭkrainskaje?» — pytajecca jon.
Taksama dekan MDU paskardziŭsia, što siarod etničnych ukraincaŭ, što žyvuć u Rasii, vielmi šmat niełajalnych, namiakajučy takim čynam na nieabchodnaść filtracyjnych pracedur.
«Śviet nie idealny! Nie treba kazać, što my budziem vykonvać usie jurydyčnyja normy i praviły viadzieńnia vajny! Admoŭciesia ad hetych pravił!» — zaklikaje rasijski prafiesar.
Sałaŭjoŭ prapanuje ŭvahnać Ukrainu ŭ kamienny viek.
«Kab jany bajalisia, jany pavinny pabačyć moc ruskaj zbroi.
Voś Ukraina źbirajecca pastaŭlać u Jeŭropu elektraenierhiju. Jakuju elektraenierhiju budzie pastaŭlać Ukraina? Ciapier samy čas pazbavić ich usialakaj mahčymaści. Uvahnać u kamienny viek», — spakojna kaža Sałaŭjoŭ.
A što ŭsio ž z adstupleńniem rasijskaj armii?
Słova biare deputat Dziarždumy Andrej Kartapołaŭ: «Na charkaŭskim kirunku dziejničała nie ŭkrainskaja armija, a nataŭskija złučeńni i častki. A naša armija — najlepšaja ŭ śviecie!
Hetaja armija praciahvaje pieramahać u śpiecyjalnaj vajennaj apieracyi! My sutyknulisia niepasredna z nataŭskaj armijaj, zrazumieli, što jana ź siabie ŭjaŭlaje.
Nu i ŭsio, rabiaty, usio zaraz pojdzie zusim pa-inšamu! Voś udar pa dambie — heta simietryčny adkaz», — kaža deputat.
