AAT «Homielchlebpram» pravodzić maštabnaje abnaŭleńnie aŭtaparka. Na elektronnaj tendarnaj placoŭcy pradpryjemstva pravodzić zakupku 14 aŭtafurhonaŭ dla pieravozki chlebabułačnych vyrabaŭ. Ahulny košt zakupki pieravyšaje 1,5 młn rubloŭ. Zakupka ažyćciaŭlajecca za košt ułasnych srodkaŭ pradpryjemstva, paviedamlaje «Fłahštok».

Finansavaja spravazdačnaść «Homielchlebprama» na pačatak 2022 hoda śviedčyła pra toje, što ŭłasnych srodkaŭ u pradpryjemstva niama. Sumarnaja zapazyčanaść pieravyšała košt majomaści na 50,5 młn rubloŭ. U suviazi z tym, što pradpryjemstva stała chraničnym niepłacielščykam, na majomaść akcyjaniernaha tavarystva byŭ nakładzieny aryšt. Upraŭleńnie prymusovaha vykanańnia pradavała aŭtafurhony pradpryjemstva ŭ košt pahašeńnia daŭhoŭ. Patrymanyja furhony, anałahičnyja tym, što ciapier zakuplajucca pa košcie zvyš 100 tysiač rubloŭ, sychodzili z małatka za sumu ŭ 100 razoŭ mienšuju.

Hrošy na zakupku novych furhonaŭ źjavilisia dziakujučy ŭkazu Alaksandra Łukašenki «Ab finansavym azdaraŭleńni AAT «Homielchlebpram» ad 21 lutaha 2022 hoda. Pradpryjemstva było vyzvalenaje ad vykanańnia abaviazacielstvaŭ pa vypłacie sankcyj za parušeńnie terminaŭ apłaty za muku, paliŭna-enierhietyčnyja resursy, a taksama štrafaŭ, što nakładajucca padatkovaj.

AAT «Bielinviestbank» pradastaviŭ Homielchlebpramu kredyty terminam na 5 hadoŭ z pracentami ŭ pamiery staŭki refinansavańnia. U tym liku na papaŭnieńnie abarotnych srodkaŭ vydzielena 5 młn.rubloŭ, što i pasłužyła padstavaj dla zakupki novych furhonaŭ.

Akramia taho, svaim ukazam Alaksandr Łukašenka faktyčna abaraniŭ pradpryjemstva ad pracedury bankructva. U dačynieńni da pradpryjemstva admienienaje dziejańnie normy zakanadaŭstva, pa jakoj u vypadku źmianšeńnia koštu čystych aktyvaŭ akcyjaniernaha tavarystva dva hady zapar nižej minimalnaha pamieru statutnaha fondu, arhanizacyja padlahaje likvidacyi.

Клас
0
Панылы сорам
4
Ха-ха
1
Ого
0
Сумна
0
Абуральна
3