Fota «Bi-bi-si»
Safronavu taksama pryznačany štraf u pamiery 500 tys. rasijskich rubloŭ (kala 21 tysiačy biełaruskich), paviedamlaje «Bi-bi-si».
Ivanu Safronavu 32 hady. Užo bolš za dva hady jon znachodzicca ŭ SIZA «Lefortava» — jaho aryštavali ŭ lipieni 2020 hoda pa abvinavačvańni ŭ dziaržzdradzie.
Na toj momant Safronaŭ pracavaŭ u «Raskosmasie», kudy ŭładkavaŭsia na pasadu daradcy kiraŭnika dziaržkarparacyi Dźmitryja Rahozina ŭsiaho za niekalki miesiacaŭ da svajho zatrymańnia.
Da pryznačeńnia ŭ «Raskosmas» Safronaŭ amal dziesiać hadoŭ adpracavaŭ śpiecyjalnym karespandentam u «Kommiersantie», a zatym — u «Viedomostiach». Jon pisaŭ pra rasijski abaronna-pramysłovy kompleks, kaśmičnuju pramysłovaść, ekspart rasijskaj zbroi i vajenna-techničnaje supracoŭnictva Rasii z zamiežnymi partniorami.
FSB abvinavaciła Safronava ŭ pieradačy sakretnych źviestak zamiežnym śpiecsłužbam, ale pra toje, što mienavita stavili ŭ vinu Safronavu, doŭhi čas nie było viadoma. Na stadyi śledstva materyjały spravy nie pakazvali navat abaronie žurnalista, spasyłajučysia na dziaržaŭnuju tajnu.
U žniŭni vydańnie «Prajekt» apublikavała abvinavaŭčaje zaklučeńnie pa spravie Safronava. Pavodle jaho, žurnalista abvinavačvali ŭ tym, što jon nibyta pieradaŭ hramadzianinu Čechii Marcinu Łaryšu i niamieckamu palitołahu Demury Varoninu siem fajłaŭ z sakretnaj infarmacyjaj ab vajskova-techničnym supracoŭnictvie Rasii ź Livijaj, Ałžyram, Sierbijaj i krainami SND, a taksama pra rasijskuju vajskovuju kampaniju ŭ Siryi. FSB ličyć Łaryša i Varonina supracoŭnikami zamiežnaj raźviedki.
Łaryš u intervju «Bi-bi-si» admaŭlaŭ dačynieńnie da češskaj raźviedki. Varonina, jaki pražyvaŭ u Hiermanii, aryštavali padčas jaho vizitu ŭ Maskvu ŭ lutym 2021 hoda i taksama abvinavacili ŭ dziaržzdradzie. Jon utrymlivajecca ŭ tym ža śledčym izalatary, što i Safronaŭ.
Na adnym z sudovych pasiadžeńniaŭ pa svajoj spravie jon pryznaŭsia, što ahavaryŭ žurnalista. Varoninu prapanavali pajści na ździełku sa śledstvam, i jon vydumaŭ kuratara z pazyŭnym Wichser, što pierakładajecca ź niamieckaj movy jak «dročar». Adnak u SZR paćvierdzili isnavańnie takoha kuratara.
Taksama z apublikavanaha abvinavaŭčaha zaklučeńnia vynikaje, što śledčyja nie znajšli nivodnaha čynoŭnika, jaki pieradavaŭ by žurnalistu sakretnyja źviestki. A infarmacyja, jakuju FSB kvalifikuje jak dziaržaŭnuju tajnu, praktyčna ŭsia była ŭ adkrytym dostupie ŭ toj momant, kali Safronaŭ, pa śćviardžeńni śledstva, «pieradavaŭ» jaje zamiežžu, piša «Prajekt».
Usie pasiadžeńni z krasavika prachodzili ŭ zakrytym režymie. Paśla taho, jak bok abvinavačvańnia zaprasiŭ Safronavu 24 hady pazbaŭleńnia voli, adzin ź jaho advakataŭ, Jaŭhien Śmirnoŭ, raspavioŭ, što prakuror prosta padčas pierapynku ŭ pasiadžeńni prapanavała žurnalistu pryznać vinu ŭ abmien na 12 hadoŭ pazbaŭleńnia voli, ale toj admoviŭsia.
I FSB, i Kreml admaŭlali, što sprava suprać Safronava źviazanaja ź jaho žurnalisckaj dziejnaściu. Adnak, jak vyśvietliła «Bi-bi-si», sačeńnie za Safronavym u ramkach spravy ab dziaržaŭnaj zdradzie pačali paśla skandału z-za jaho ekskluziŭnaj žurnalisckaj publikacyi ŭ 2019 hodzie.
Taksama ŭ rasparadžeńni «Bi-bi-si» apynulisia dva listy jehipieckich čynoŭnikaŭ u rasijskuju Fiederalnuju słužbu pa vajenna-techničnym supracoŭnictvie, jakija byli adpraŭlenyja ŭviesnu 2019 hoda, paśla publikacyi ŭ «Kommiersantie» tekstu Safronava i jaho kalehi Alaksandry Džordževič ab pastaŭkach Su-35 Jehiptu.
Hetyja listy jość i siarod materyjałaŭ spravy ab dziaržzdradzie ŭ dačynieńni da Safronava, raspavioŭ adzin ź jaho advakataŭ Jaŭhien Śmirnoŭ. Jak vynikaje z apublikavanaha ŭ «Prajekcie» abvinavaŭčaha zaklučeńnia, śledčyja z FSB razmaŭlali ź niekalkimi śviedkami pa spravie mienavita pra tekst Safronava pra pastaŭki novaha źniščalnika Su-35 jehipieckim VVS.
