U pryvatnaści, pa słovach adnoj z krynic Asiečkina, u VK-2 Rastova-na-Donie a piataj ranicy na placy pastroili źniavolenych, u tym liku i tak zvanych «pakryŭdžanych» [samaja nizkaja kasta ŭ turemnaj ijerarchii]. Siarod viarboŭščykaŭ, pa słovach krynicy, byŭ čałaviek z pazyŭnym «Apałčeniec». Za deziercirstva, užyvańnie ałkaholu i narkotykaŭ na vajnie budučym navabrancam pahražali rasstrełam na miescy. U vypadku hibieli asudžanym abiacali miedal «Za advahu» za podpisam Pucina i purpurny orden «Za kroŭ i advahu» ad tak zvanych kiraŭnikoŭ «ŁDNR». Padobnaja viarboŭka, pa danych krynic, pravodziłasia taksama ŭ VK-3 (Kałuha) i ŭ VK-6 (Pskoŭskaja vobłaść).
U rasparadžeńni The Insider jość śviedčańnie i daviedka ab śmierci Ivana Nieparatava 1988 hoda naradžeńnia. Pavodle dakumientaŭ, Nieparataŭ zahinuŭ 5 žniŭnia ŭ horadzie Arciomaŭsk Danieckaj vobłaści. Pryčyna śmierci «ahniastrelnaje vybuchovaje askiepkavaje pranikalnaje skraznoje ranieńnie hałavy». Ivan Nieparataŭ byŭ vierchavodam bandy padmaskoŭnych rabaŭnikoŭ.
U lipieni 2013 hoda jaho i členaŭ jaho AZH pryznali vinavatymi ŭ piaci zabojstvach, troch razbojnych napadach, vymahalnictvie, machlarstvie, niezakonnym zachoŭvańni zbroi i inšych złačynstvach. Nieparataŭ atrymaŭ samy vialiki termin z usich — 25 hadoŭ pazbaŭleńnia voli.
Jak vynikaje z materyjałaŭ spravy, z 2009 pa 2010 hod Nieparataŭ zabiŭ troch svaich znajomych, jakija brali ŭ jaho ŭ doŭh hrošy i nie viarnuli. Taksama jon i jaho saŭdzielniki zadušyli pradprymalnicu i vykrali ŭ jaje 100 tysiač rasijskich rubloŭ. Tady ž Nieparataŭ i jaho naparnik atrymali ad žychara Sierhijeva Pasada bolš adnaho miljona rubloŭ. Mužčynu paviedamili, što jaho nibyta «zamovili», ale za bujnuju sumu adstupnych kiler admovicca ad zabojstva.
U žniŭni 2009 hoda Nieparataŭ daviedaŭsia, što va ŭradženca Ukrainy, jaki pracuje prarabam na budoŭli ŭ vioscy Fiodaraŭskaje Sierhijeva-Pasadskaha rajona, jość bujnaja suma hrošaj. Jon i jaho paplečniki napali na mužčynu i skrali ŭ jaho 176 tysiač rubloŭ. U listapadzie 2009 hoda bandyty ździejśnili razbojny napad na dom pad Sierhijevym Pasadam, źbili jaho žycharoŭ — mužčynu i žančynu, ale mužčynu ŭdałosia vybiehčy na vulicu i paklikać na dapamohu. Bajučysia być zatrymanymi, zabojcy ŭciakli ź miesca zdareńnia.
U sakaviku 2010 hoda Nieparataŭ raspraviŭsia z členam bandy, jaki admoviŭsia padvieźci rabaŭnikoŭ da miesca čarhovaha złačynstva, i tamu sarvaŭ ich płany. «Z metaj zastrašvańnia i prymusu da vykanańnia nadalej svaich abaviazacielstvaŭ (Nieparataŭ) vykraŭ mužčynu i razam z saŭdzielnikami źbiŭ. Paśla hetaha (jon) nanios (jamu) nažom nie mienš za 88 udaraŭ pa ciele», — havorycca ŭ pres-relizie SK RF.
Paviedamlajecca, što pry ździajśnieńni złačynstvaŭ bandyty vykarystoŭvali ahniastrelnuju i pnieŭmatyčnuju zbroju, a taksama formu supracoŭnika milicyi i maski.
U vyniku z 25 hadoŭ pryznačanaha jamu terminu Nieparataŭ adsiedzieŭ 12, paśla čaho adpraviŭsia zabivać va Ukrainu, na hety raz z sankcyi dziaržavy i ŭ sapraŭdnaj formie vajskoŭca. Paśmiarotna ŭznaharodžany miedalom «Za advahu» za podpisam Uładzimira Pucina, a taksama miedalom i ordenami «Za kroŭ i advahu» z boku kiraŭnictva tak zvanaha «ŁDNR».
