Čym zajmajecca «PryvatKapitał» i kamu naležyć
Ministerstva finansaŭ paviedamiła, što kampanija «PryvatKapitał» nie vykanała abaviazacielstvy pa vypuščanych raniej ablihacyjach. Hetaja firma isnuje z 2015 hoda. Jana śpiecyjalizujecca na zdačy ŭ najom ułasnaj i arandavanaj majomaści. Pieršapačatkova kampanija była zasnavanaja litoŭskaj strukturaj, potym naležała hramadzianam Biełarusi, potym — biznesoŭcu Dźmitryju Piarovu.
Čamu paŭstali prablemy z ablihacyjami i pryčym tut były budynak Doma druku
U «PryvatKapitał» tłumačać, što prablemy pa kaštoŭnych papierach paŭstali z-za składanaściaŭ ź inviestprajektam pa rekanstrukcyi budynka. Havorka idzie pra budynak kala stancyi mietro «Akademija navuk» u Minsku na praśpiekcie Niezaležnaści, jaki raniej naležaŭ Domu druku. Na pačatku 2020 hoda «PryvatKapitał» na aŭkcyjonie ŭ Minskim haradskim centry nieruchomaści vykupiŭ budynak za 6,22 młn rubloŭ. Heta było roŭna amal 2,8 młn dalaraŭ pa aktualnym kursie na toj momant.
Budynak na praśpiekcie Niezaležnaści, 79, jaki źjaŭlajecca pomnikam architektury, vystaŭlaŭsia na tarhi treci raz z panižanym na 50% koštam. Z ulikam hetaha pačatkovaja cana na siońniašnich tarhach była 3 młn 527 tysiač 964 rubla 16 kapiejek. Padčas aŭkcyjonu ŭ Minskim haradskim centry nieruchomaści jana vyrasła da finalnych 6,22 młn rubloŭ, što ekvivalentna amal 2,8 młn dalaraŭ pa aktualnym kursie.
Funkcyjanalnaje pryznačeńnie budynka pry prodažy na aŭkcyjonie było paznačanaje jak administracyjna-dziełavoje. Heta značyć, pakupnik, «PryvatKapitał», pavinien byŭ zrabić na hetym miescy biznes-centr. Ahulnaja płošča čatyrochpaviarchovaha budynka — 3558,6 «kvadrata», płošča ziamielnaha ŭčastka — 0,1711 ha.
Pad budaŭnictva biźnies-centra «PryvatKapitał» raźmiaściŭ ablihacyi. Pa adnym z vypuskaŭ u žniŭni treba było rabić vypłaty, ale ŭ kampanii ŭźnikli ciažkaści.
U «PryvatKapitale» udakładniajuć, što atrymanyja ad prodažu kaštoŭnych papier hrošy nakiravali na apłatu abjekta nieruchomaści. Jak paviedamlajecca, inviestar pavinien byŭ na praciahu dvuch hadoŭ raspracavać i zaćvierdzić prajektnuju dakumientacyju pa rekanstrukcyi budynka.
«Našaj arhanizacyjaj byli zatračanyja značnyja resursy na realizacyju hetaha abjekta ŭ adpaviednaści z umovami aŭkcyjonu i patrabavańniami zakanadaŭstva, — adznačajuć u «PryvatKapitale», tłumačačy, čamu źjavilisia prablemy z vypłatami pa kaštoŭnych papierach. — Adnak u pracesie dvuchhadovaj pracy pa realizacyi abjekta nieruchomaści vyśvietliłasia pra niemahčymaść jaho realizacyi. Kamunalnaje ŭnitarnaje pradpryjemstva «Minski haradski centr nieruchomaści» ŭ adnabakovym paradku zarehistravała viartańnie prava ŭłasnaści na abjekt nieruchomaści, čym pazbaviła mahčymaści na dalejšuju realizacyju prajekta. Ciapier hety fakt abskardžvajecca».
Sudovyja raźbiralnictvy
U «PryvatKapitale» paviedamlajuć, što ciapier kampanija «znachodzicca ŭ stadyi sudovych razhladaŭ pa viartańni raniej pieraličanych hrašovych srodkaŭ ad prodažu ablihacyj». Firma raźličvaje atrymać hetyja hrošy i nakiravać na vypłatu abaviazacielstvaŭ pa ablihacyjach.
U Ekanamičnym sudzie Minska na 19 vieraśnia pryznačanaje sudovaje pasiadžeńnie pavodle isku «PryvatKapitała» da Minskaha haradskoha centra nieruchomaści, paviedamlajecca na sajcie Viarchoŭnaha suda. Pradmiet sprečki — pazadahavornyja abaviazacielstvy, abaviazacielstvy z pryčyny pazapadstaŭnaha ŭzbahačeńnia, a taksama ab viartańni biespadstaŭna nabytaj abo aščadžanaj majomaści.
