Kampanija «NNK Uschod», jakaja pavinna była dapamahać «Novaj naftavaj kampanii» pradavać naftapradukty praz rasijskija party, ciapier naležyć hramadzianinu RF Barysu Kazko.
Jak vynikaje ź miascovych rehistraŭ, Barys Kazko staŭ jaje 100%-nym uładalnikam z kanca lipienia. Da hetaha jon «zaśviaciŭsia» ŭ biznesie tolki adnojčy — da 2019 hoda kiravaŭ u Armaviry stvoranaj im ža rekłamnaj firmaj «Inviest-Sport» (u ciapierašni momant likvidavanaja).
«NNK Uschod», u svaju čarhu, adkrytaja ŭ kancy 2020 hoda ŭ Smalensku «Novaj naftavaj kampanijaj» dla realizacyi biełaruskich naftapraduktaŭ na ekspart. Pa vynikach minułaha hoda jaje vyručka skłała zvyš $40,7 młn. U žniŭni minułaha hoda «NNK Uschod» razam z matčynaj kampanijaj była ŭklučanaja ŭ sankcyjny śpis ZŠA.
Taksama siamja Aleksinych bolš nie źjaŭlajecca saŭładalnikam daŭhaŭpiłskich kampanij Mamas D i Latgales Alus D.
Kiraŭnik siamji Alaksiej Aleksin uvajšoŭ u kapitał hetych pradpryjemstvaŭ razam ź Juryjem Čyžom u 2008 hodzie. Mamas D vypuskała bijapaliva, častka ź jakoha realizoŭvałasia ŭ ES. U 2011-2012 hadach kampanija źjaŭlałasia najbujniejšym biznesam Daŭhaŭpiłsa. Na Latgales Alus D partniory znoŭku zapuścili vytvorčaść piva.
Na pačatku 2010-ch u vyniku padziełu biznesu hety aktyŭ adyšoŭ da Alaksieja Aleksina, jaki pierapisaŭ svaje doli na žonku Inu i syna Dźmitryja. Na dvaich im naležała kala 75% u kožnaj kampanii. Astatnija doli ličylisia za łatvijskim naftatrejdaram Alaksandram Hrachoŭskasam. Partniory pieraprafilavali Mamas D na vypusk chimičnych praduktaŭ i soładu, Latgales Alus d zrabili bujnym rehijanalnym vytvorcam piva, pradukcyja jakoha ekspartavałasia ŭ Biełaruś.
Uletku minułaha hoda na fonie sankcyj, uviedzienych ZŠA ŭ dačynieńni da baćki i jaho kampanij, Dźmitryj Aleksin staŭ adnaasobnym uładalnikam doli siamji. Ale, jak akazałasia, paźniej vyjšaŭ ź ich.
