Minčanka Volha, jakaja padzialiłasia kadrami pažaru ŭ instahramie, pryjechała ŭ hości ŭ viosku Aziarco pad Minskam (heta ŭ ličanych mietrach ad kalcavoj), a tam — niekantralavany ahoń na pole, jaki na vačach va ŭsich źjadaŭ nie tolki iržyšča, ale i pryhožyja kruhłyja snapy sałomy.
«Pieršy raz baču, kab ahoń raspaŭsiudžvaŭsia z takoj chutkaściu. Heta vielmi strašna», — apisvaje ŭsio, što adbyvajecca, błohierka.
Pa słovach dziaŭčyny, niemałuju rolu va ŭcichamirvańni ahniu zhulali traktarysty, jakija «adrezali» połymia, pierakapaŭšy pole prosta «na linii ahniu».
Taksama na miesca prybyli niekalki raźlikaŭ MNS. Pa słovach vidavočcaŭ, z-za ahniu paciarpieła adna z mašyn ratavalnikaŭ.
«Dakładny čas, kali ŭsio pačałosia, ja nie padkažu. Nievialikaje zadymleńnie na vulicy my zaŭvažyli, napeŭna, u rajonie 12-j hadziny. Ale tady jašče nie zrazumieli, što zdaryłasia. Praź niejki čas z vulicy pavaliŭ vielmi mocny dym. Tady my vyjšli z dvara na darohu i ŭbačyli, što na poli haryć niekalki stahoŭ. Tut ža pryjechali dźvie pažarnyja mašyny, stała niejak spakajniej», — apisvaje ŭbačanaje dziaŭčyna.
Zrešty, ahoń tak prosta było nie suniać: połymia razrastałasia z kožnaj chvilinaj, zachoplivajučy ŭsie bolšyja płoščy. I, jak na złość, u hety čas padniaŭsia viecier.
«U niejki momant usio vakoł pačało traščać — źjaviŭsia taki śpiecyfičny huk padpalenaj suchoj travy. Ščyra kažučy, hledziačy na ŭsio, što adbyvajecca, my prosta ačmureli, ź jakoj chutkaściu idzie ahoń. Pryčym jon paśpieŭ navat zakranuć pažarnuju mašynu: nakolki ja zrazumieła, paciarpieli zadnija koły, ale samo aŭto ŭ paradku.
Vielmi vyratavali situacyju traktary z płuhami, bałazie jany paśpieli pryjechać chutka — pieraarali pole tak, kab ahniu nie było kudy raspaŭsiudžvacca. Potym padjechali jašče dźvie pažarnyja mašyny.
U vyniku ŭsio patušyli. My dakładna nie viedajem, z-za čaho ŭsio pačałosia, ale ludzi raskazvajuć, što bačyli na poli dziaciej, moža, jany tam hulali z zapałkami», — raspaviała Volha.
Jak raskazali «Anłajnieru» ŭ MNS, paviedamleńnie pra pažar pastupiła ratavalnikam u 13:25.
«Pa prybyćci da miesca vykliku ŭstanoŭlena, što hareli iržyšča i rułony sałomy na płoščy 1 ha. Pažar byŭ łakalizavany ŭ 14:23, likvidavany — u 15:17. Rabotnikami MNS i pradpryjemstva vyratavana 150 ton sałomy. U vyniku pažaru ahniom źniščana 7,5 tony sałomy. Paciarpiełych niama. Pryčyna pažaru vyśviatlajecca», — rastłumačyli ŭ viedamstvie.
