Pa łohicy, asnoŭnaja meta aharodž — minimizavać nastupstvy avaryi. Ale ŭ vypadku na M6 jana trapiła ŭ sałon i stała pryčynaj hibieli čałavieka. I heta daloka nie adzinaja takaja trahiedyja. Čamu tak adbyvajecca i ničoha nie mianiajecca, piša Onliner.
Jak aharodžy pavinny pracavać
U Biełarusi sustrakajucca bietonnyja, trosavyja i mietaličnyja aharodžy. Apošnija ŭładkavanyja nastupnym čynam: chvalisty profil macujecca da kampiensatara, a toj — da stojki, zabietanavanaj u asfalt.
Padčas sutyknieńnia stojki padajuć ci defarmujucca. Profil pavinien adarvacca, ale zachavać prajektnuju vyšyniu, naciahnucca jak struna i viarnuć mašynu nazad u pałasu, jak havorycca ŭ dakumientach, płaŭna i pastupova vyraŭnoŭvajučy trajektoryju ruchu transpartnaha srodku.
Heta nie pavinna być ćviorda zamacavanaja kanstrukcyja (dzie profil namiortva prykručany da apory), inakš pry ŭdary abo aharodža pavalicca i aŭtamabil jaje pierajedzie, abo aŭto ad mocnaha ŭdaru pieravierniecca.
Voś jak vyhladaje pravilnaja praca adbojnika padčas vyprabavańniaŭ.
Druhi varyjant — udar pad vialikim vuhłom na vialikaj chutkaści. Inžyniery raźličvajuć biaśpieku kanstrukcyi, zychodziačy z udaru pad 20-hradusnym vuhłom. Čym bližej vuhał udaru da 90 hradusaŭ, tym horš adpracoŭvaje aharodža i tym bolš surjoznyja nastupstvy DTZ.
Ale samyja surjoznyja avaryi adbyvajucca pry najeździe na tarec chvalistaha profilu. Kali jon traplaje ŭ sałon i prachodzić skroź mašynu, aŭtamabil akazvajecca byccam na šampury. U adnych vypadkach ustanoŭščyki prosta zahinajuć profil na kancy, kab jon nie byŭ vostrym, ale naŭrad ci heta moža vyratavać. U inšych «rejku» apuskajuć da ziamli, što moža ŭžo spracavać pry najeździe jak tramplin.
Što treba rabić?
Kab paźbiehnuć fatalnych nastupstvaŭ ad sutyknieńnia z krajem aharodžy, treba ŭstaloŭvać śpiecyjalnyja kanstrukcyi. Jany źjavilisia na MKAD jašče ŭ 2019 hodzie — dźvie štuki z kampiensavalnaj jačeistaj rašotkaj. Adnak masavaha raspaŭsiudžvańnia jany nie atrymali — vidavočna, z-za finansavaha pytańnia.
Chacia abiacali, što ŭžo ŭ 2020-m ich buduć ustanaŭlivać na novych darohach, a taksama na trasach, dzie budzie pravodzicca biahučy ramont.
Takija kanstrukcyi viadomyja ŭžo prynamsi 30 hadoŭ.
Dyk čamu ž aharodžy prabivajuć mašyny, i heta ličać normaj?
Paśla kožnaj z avaryj z udziełam adbojnika raspačynajuć kryminalnuju spravu pa artykule 317 KK RB — «Parušeńnie PDR, jakoje paciahnuła pa nieaściarožnaści ciažkija traŭmy abo śmierć čałavieka». Pry hetym za apošnija 10 hadoŭ publična nie aśviatlałasia nivodnaja sprava pa artykule 319 KK RB («Parušeńnie praviłaŭ utrymańnia aŭtadaroh, jakoje paciahnuła pa nieaściarožnaści śmierć čałavieka»), jakaja b tyčyłasia aharodž. Možna mierkavać, što ŭ kožnym vypadku pieršapryčynaj nastupstvaŭ DTZ ličyli mienavita parušeńnie PDR vadzicielami, a nie niešta inšaje.
I tut jakraz varta źviarnucca da zakanadaŭstva, jakoje rehuluje normy pracy aharodžy. Heta DAST 33128-2014. U im zamacavana niekalki patrabavańniaŭ: mašyna nie pavinna pierakulicca jak praz aharodžu, tak i ŭ bok prajeznaj častki; nie pavinna vyjści paśla najezdu za miežy dapuščalnaha kalidora; pry kantakcie elemienty aharodžy nie pavinny patrapić u sałon.
U apošnim patrabavańni jość važnaje ŭdakładnieńnie: tolki pry vyprabavańniach (a nie ekspłuatacyi). Vychodzić, što DAST ličyć biaśpiečnymi kanstrukcyi, jakija mohuć pranikać u sałon pry DTZ. Hałoŭnaje, kab hetaha nie adbyłosia padčas vyprabavańniaŭ.
Toje adbyłosia i ŭ vypadku z trahičnym zdareńniem na trasie M6. Śledčyja ŭžo paviedamili, što raspačali kryminalnuju spravu pa č. 2 art. 317 KK RB — «Parušeńnie PDR asobaj, jakaja kiruje TS, jakoje paciahnuła pa nieaściarožnaści śmierć čałavieka».
Heta značyć, padazravanym moža stać vadziciel, jaki straciŭ žonku, adziny z baćkoŭ, jaki zastaŭsia ŭ dziaciej.
Pytańnie ab stupieni biaśpieki aharodžy ŭ aficyjnych zvodkach nie ŭźnimałasia.
