Kałonija ŭ Hłybokim. Fota: «Viasna»
19 traŭnia, skončyŭšy pracoŭny dzień, mužčyna adpraviŭsia ahladać słavutaści Hłybokaha. Pa darozie jon fatahrafavaŭ smartfonam upadabanyja abjekty: kryž, zvon, stend z historyjaj budynka.
U hety momant supracoŭnik Hłybockaj kałonii, jaki jakraz apynuŭsia niepadalok, zrabiŭ čałavieku zaŭvahu, što zdymać režymnyja abjekty nielha, i prahledzieŭ zdymki ŭ jahonym telefonie.
Ničoha nie znajšoŭšy, jon mužčynu adpuściŭ. Ale kali mužčyna adpraviŭsia dalej i sfatahrafavaŭ upadabany jamu žyły dom, to jaho zatrymali.
U sudzie praparščyk B. zajaviŭ, što mužčynu było rastłumačana pra zabaronu rabić videa — i fotazdymki na režymnym abjekcie, i toj syšoŭ. Ale paźniej jon zaŭvažyŭ fatohrafa na prylehłaj terytoryi šostaha ŭčastka papraŭčaj ustanovy kala kryža i pamiatnych došak. Jon paŭtorna pradjaviŭ hramadzianinu patrabavańni pakinuć terytoryju abjekta, adnak, u 19:45 toj usio ž vioŭ zdymki kala pasady papraŭčaj kałonii, tamu byŭ zatrymany.
Razhledzieŭšy spravu, sud Hłybockaha rajona pryjšoŭ da vysnovy, što pavodle zakonaŭ nijakich abaviazkaŭ pa achovie hramadskaha paradku na praparščyka B. nie ŭskładałasia. Pry takich abstavinach jon nie vałodaŭ zakonnym pravam pradjaŭleńnia patrabavańniaŭ hramadzianam, jakija znachodziacca pa-za terytoryjaj papraŭčaj ustanovy.
Akramia taho, što mužčyna znachodziŭsia pa-za miežami terytoryi režymnaj ustanovy, zdymkaŭ jaje abjektaŭ, jakija mahli niejkim čynam paŭpłyvać na pracu hetaj ustanovy, vyjaŭlena ŭ telefonie nie było. Taksama orhanam, jaki viali administracyjny praces, nie było pradstaŭlena dokazaŭ najaŭnaści infarmacyi ab zabaronie praviadzieńnia fota— i videazdymkaŭ pa-za terytoryjaj papraŭčaj ustanovy.
U vyniku sudździa pryjšoŭ da vysnovy ab niedakazanaści viny fatohrafa ŭ ździajśnieńni pravaparušeńnia, praduhledžanaha artykułam 24.3 KaAP — niepadparadkavańnie zakonnamu patrabavańniu słužbovaj asoby.
Paśla heta rašeńnie było abskardžana načalnikam Hłybockaha RAUS z pryčyny nieabjektyŭnaha i paviarchoŭnaha, pa jaho dumku, razhladu spravy. Adnak 22 červienia Viciebski abłasny sud pastanaviŭ pakinuć pastanovu suda Hłybockaha rajona ad 25 maja bieź źmienaŭ, a skarhu načalnika Hłybockaha RAUS — biez zadavalnieńnia.
