Brytancy, jakija pracujuć u IDCC na bazie ŭ Štutharcie
U dastatkova ścipłaj abstanoŭcy amierykanskich vajennych kazarmaŭ u Štutharcie pradstaŭniki 26 krain kruhłasutačna pracujuć nad tym, kab Ukraina jak maha chutčej atrymlivała ŭzbrajeńni ad Zachadu.
Mienavita z hetaha pamiaškańnia zachodnija sajuźniki ŭžo arhanizavali adpraŭku Ukrainie zbroi i bojeprypasaŭ na ahulnuju sumu amal 8 młrd dołaraŭ. Heta 66 tysiač ton, ci, jak padličyŭ adzin z brytanskich aficeraŭ, piać tysiač łondanskich dvuchpaviarchovych aŭtobusaŭ.
Bolšaja častka taho, što adbyvajecca na amierykanskaj vajennaj bazie «Kazarmy Patč» u Štutharcie, stroha zasakrečana. Pry ŭvachodzie žurnalistaŭ prosiać pakinuć zvonku ŭsie elektronnyja pryłady, nie dazvalajuć zdymać i razmaŭlać z ukraincami, jakija ŭdzielničajuć u pracy struktury, jakaja nazyvajecca «Jačejka pa kaardynacyi mižnarodnych donaraŭ» (International Donors Coordination Cell (IDCC).
Vajskoŭcy ź dziasiatkaŭ krain nie vypuskajuć z ruk telefonaŭ i pilna hladziać u ekrany kampjutaraŭ.
Tut jość nievialikaja hrupa ŭkraincaŭ na čale z hienierał-lejtenantam. Na pačatku kožnaha dnia jon kaža, u čym maje patrebu jaho kraina.
Situacyja ŭ Danbasie ciapier stanovicca asabliva składanaj, ale ŭ Štutharcie ŭ suviazi z hetym niama paniki, chutčej, jość razumieńnie, što dziejničać treba chutka.
Za asobnaj hrupaj stałoŭ siadziać tyja, chto zajmajecca pošukami nieabchodnaha. Časam, naprykład, jany znachodziać dziaržavu, jakaja hatovaja addać Ukrainie ŭzbrajeńni, ale patrebnyja bojeprypasy abo srodki dla ich pieravozki paśla hetaha davodzicca šukać u inšych krainach.
Supracoŭniki centra stvaryli bazu danych, dzie ŭkraincy mohuć pieraličvać svaje hałoŭnyja pryjarytety. Krainy-donary atrymlivajuć hetuju infarmacyju i prymajuć rašeńnie pra toje, ci mohuć jany i ci žadajuć zadavolić hetyja zapyty.
Ź miažy na front
Vysokapastaŭleny brytanski aficer — bryhadzir Krys Kinh raskazaŭ, što Ukraina atrymlivaje vajennuju dapamohu pa pavietry, čyhuncy i moram. Pry hetym jaje dastaŭlajuć u roznyja miescy, «kab praduchilić mahčymaść pravału ŭ adnym miescy».
Pa słovach Kinha, Rasija sprabavała bić pa šlachach pastavak zbroi, ale «značnych» zryvaŭ pastavak damahčysia nie zmahła. Na pytańnie, ci traplali rasijskija rakiety pa jakich-niebudź z partyjaŭ pastaŭlenaj Zachadam zbroi, Kinh adkazaŭ: «Miarkuju, što tak».
Zadačy pa transparciroŭcy ŭzbrajeńniaŭ i bojeprypasaŭ praz ukrainskuju miažu vykonvaje sama Ukraina, kaža kontr-admirał Dziuk Chajnc, vysokapastaŭleny amierykanski aficer, jaki pracuje ŭ IDCC.
«Ukraincy pryjazdžajuć u Polšču i inšyja krainy, kab atrymać zbroju, mienavita jany vyrašajuć, jak pierasiakać miažu», — tłumačyć jon.
Paśla hetaha atrymanaje ŭzbrajeńnie moža akazacca na froncie ŭžo na praciahu 48 hadzin.
U apošni čas Ukraina nieadnarazova kazała, što zachodnich uzbrajeńniaŭ, jakija joj pastaŭlajucca, zanadta mała, i jany pastupajuć zanadta pavolna. Pa miery taho, jak Rasija praciahvaje bambardziroŭki Danbasa, prośby ab dapamozie stanoviacca ŭsio bolš adčajnymi. Namieśnik ministra abarony Ukrainy Hanna Malar zajaviła, što Kijeŭ atrymaŭ tolki 10% ad abjomu zbroi, pra jaki paprasiŭ.
Ale kontr-admirał Chajnc prytrymlivajecca inšaha punktu hledžańnia. «Ja ŭpeŭnieny, što bojeprypasy ŭ ich nie skončacca», — kaža jon.
Niahledziačy na sumnyja naviny z Danbasa, jon nastojvaje: «Ja b nie skazaŭ, što jany prajhrajuć. Ja b skazaŭ, što jany trymajuć udar».
Ciažkija ŭzbrajeńni i standarty NATA
Za apošnija niekalki miesiacaŭ zapyty Ukrainy značna źmianilisia. IDCC byŭ stvorany ŭ kancy lutaha, kab kaardynavać pastaŭki zbroi z ZŠA i Vialikabrytanii. Na pačatku vajny Zachad słaŭ Ukrainie ŭ asnoŭnym pieranosnyja supraćtankavyja i zienitnyja kompleksy. Ale ciapier patrebnyja značna bolš surjoznyja srodki — artyleryja, reaktyŭnyja sistemy załpavaha ahniu i sistemy SPA.
U pieršyja dni vajny IDCC šukaŭ staruju savieckuju zbroju i bojeprypasy da jaje ŭ krainach byłoj Varšaŭskaj damovy — tyja ž, što jość va ŭkrainskaj armii. Ale, pa słovach Kinha, takija zapasy pastupova skončacca. Va ŭsioj Jeŭropie zastaŭsia tolki adzin zavod, jaki vyrablaje artyleryjskija snarady savieckaha kalibru 152 mm.
Ukrainskaje vojska pastupova pierachodzić na zbroju nataŭskich standartaŭ. Na praciahu apošnich niekalkich miesiacaŭ Ukrainie dasłali bolš za 100 amierykanskich haŭbic M-777 i da ich 300 tys. snaradaŭ kalibru 155 mm.
Brytanski bryhadzir Krys Kinh ličyć, što vajna va Ukrainie moža praciahnucca niekalki hadoŭ
Heta stvaraje novuju prablemu: ukraincaŭ jašče treba navučyć abychodzicca z novaj dla ich zbrojaj.
IDCC arhanizuje takoje navučańnie pa-za miežami Ukrainy. Niekatoryja ŭkrainskija vajskoŭcy ciapier znachodziacca ŭ Vialikabrytanii, asvojvajučy novyja harmaty i brytanskija reaktyŭnyja sistemy załpavaha ahniu. Vykarystańniu najpraściejšych sistem možna navučycca virtualna — pry dapamozie videarolikaŭ i piśmovych instrukcyj.
Ni Chajnc, ni Kinh nie vierać, što hetaja vajna moža skončycca chutka. Abodva kažuć, što hatovyja da taho, što pracavać u IDCC im daviadziecca jašče doŭha.
«Havorka nie idzie pra miesiacy. Dumaju, što my budziem tut jašče niekalki hadoŭ», — adkazaŭ adzin z brytanskich aficeraŭ.
«Samaja važnaja praca z 1952 hoda»
Ale niekatoryja ŭ NATA pačynajuć zadavać pytańni, nakolki Zachad sapraŭdy hatovy da vajny, jakaja moža praciahnucca niekalki hadoŭ. Takaja vajna moža stać surjoznaj pravierkaj aljansu na tryvałaść. Akramia taho, zapasy zbroi i bojeprypasaŭ u NATA abmiežavanyja.
Ale supracoŭniki centra ŭ Štutharcie pierakananyja, što staŭki ŭ hetaj hulni vysokija jak nikoli. Chajnc nazyvaje svaju misiju pa dastaŭcy ŭzbrajeńniaŭ Ukrainie «samaj važnaj pracaj, jakuju rabiła jaho kamandavańnie» z 1952 hoda, kali, ułasna, i było stvoranaje Jeŭrapiejskaje kamandavańnie Uzbrojenych sił ZŠA.
Kinh nazyvaje heta «vyrašalnym momantam dla našaha pakaleńnia».
Na jaho dumku, vybar ciapier vielmi prosty: «My abo dapamožam Ukrainie zmahacca, abo pahodzimsia z tym, što — moža być, nie adrazu, ale praź niekalki hadoŭ — nam daviadziecca vieści vajnu niedzie jašče. Kali my nie zrobim toje, što treba, ciapier, to stvorym pieradumovy dla budučych kanfliktaŭ».
Historyk: Toje, što mnohija ludzi praciahvajuć žyć zvyčajnym žyćciom, nie aznačaje, što my nie ŭstupili ŭ Treciuju suśvietnuju vajnu
Stołtenbierh: Ukraina pavinna atrymać bolš ciažkaha ŭzbrajeńnia
Ukraina atrymaje amierykanskija RSZA da kanca červienia
