Fota: AP
Padčas pajezdki Chan naviedaŭ miesca avijaŭdaru pa ŭradavych budynkach i adzin z žyłych kvartałaŭ, jaki istotna paciarpieŭ ad abstrełaŭ.
Na pytańnie «Bi-bi-si» pra toje, ci maje namier Haahski sud pieraśledvać vysokapastaŭlenych rasijskich palitykaŭ i vajskoŭcaŭ, Chan adkazaŭ, što ciapier sud zajmajecca zboram dokaznaj bazy, pa vynikach acenki jakoj buduć vystaŭlenyja abvinavačvańni.
«U chodzie ŭzbrojenaha kanfliktu na kožnym, u kaho jość zbroja, u kaho jość ułada, lažać peŭnyja abaviazacielstvy, — zajaviŭ prakuror. — Nikomu nie dazvolena biespakarana rabić usio, što jamu zachočacca».
Pavodle jaho słoŭ, sud «razhledzić adkaznaść usich bakoŭ», tak što abvinavačvańni mohuć być vystaŭlenyja i ŭkrainskim vajskoŭcam.
«Kali ludzi byli zabityja, my pavinny viedać, chto ich zabiŭ. Kali budynki byli paškodžanyja, my pavinny viedać, chto ich paškodziŭ. I ci było heta apraŭdanaje vajennaj nieabchodnaściu i adpaviednaje metam», — dadaŭ Chan.
Na siońniašni dzień va Ukrainie pa faktach vajennych złačynstvaŭ zaviedziena amal 16 tysiač spraŭ. Ukrainskich prakuroraŭ na miescach padtrymlivajuć hrupy ekśpiertaŭ z roznych krain, u tym liku ź Vialikabrytanii, Litvy, Słavakii i Francyi.
Vašynhton, jaki nie padpisaŭ Rymski statut (asnovatvorny dakumient Mižnarodnaha kryminalnaha suda, a ŭ hady prezidenctva Donalda Trampa ZŠA pasvarylisia z Haahaj z-za rasśledavańnia tam mierkavanych vajennych złačynstvaŭ ZŠA ŭ Afhanistanie) u hetaj halinie Kijeŭ nie padtrymlivaje.
Pa słovach Chana, sud «vioŭ pieramovy z usimi bakami i sprabavaŭ zaručycca padtrymkaj usich tych, chto hatovy jaje akazać».
