Jak raspavioŭ adzin z supracoŭnikaŭ kampanii, śpis miedustanoŭ, u jakich možna było absłuhoŭvacca, davoli vialiki. Akramia «Łade», u im byli miedcentr «Haryzont», «Eleas», Respublikanski centr miedycynskaj reabilitacyi i balniealačeńnia, 8-ja paliklinika «Sineva». Z 16 maja z-za časovaha prypynieńnia pracy sietki «Łade» supracoŭnikam paviedamili ab mahčymaści absłuhoŭvacca ŭ «Miersi».
— Raniej my chadzili ŭ «Łade», i dzieci, i darosłyja, — kaža naš surazmoŭca. — A paśla taho, jak jaho zakryli, kampanija prapanavała dla dziaciej rabotnikaŭ biaspłatnaje absłuhoŭvańnie ŭ «Miersi», jak časovy vychad ź situacyi. Pra poŭny pierachod pakul ničoha nie kazali.
Čamu JERAM abraŭ mienavita miedcentr «Miersi», jaki adkryŭsia ŭ 2021 hodzie, a nie bolš viadomych doŭhažycharoŭ rynku, infarmacyi niama. Jość viersija, što «Miersi» vybrali ŭ dobraachvotna-prymusovym paradku. Surazmoŭca śćviardžaje: ab pryčynach pryniataha rašeńnia im nichto nie paviedamlaŭ.
— Čamu mienavita hetaja klinika, nam nie kazali. Ale my źviartalisia ŭ pryvatnym paradku da daktaroŭ u «Łade», jakija ahladali našych dziaciej. Jany ličać, što zakryćcio «Łade» — heta pieradzieł rynku. Raspaviadali, što ciapier daktaroŭ z «Łade» aktyŭna zaprašajuć u «Miersi». Našy dva śpiecyjalisty, u jakich my absłuhoŭvalisia bolš za try hady, zajavili, što pierajazdžajuć u Polšču, bo nie chočuć pracavać u «Miersi». Vielmi sumnaja situacyja.
Kamientaryj EPAM
Z pytańniem, čamu kampanija abrała mienavita hetuju kliniku na zamienu «Łade» i ci byŭ jaki-niebudź prymus pryčynaj hetaha vybaru, «Otražienije» źviarnułasia ŭ JERAM.
— JERAM zaŭsiody davała supracoŭnikam i ich dzieciam pakiet miedycynskich pasłuh, jak častku bieniefitnaj prahramy — havorycca ŭ kamientaryi. — U jaho ŭklučanyja pasłuhi dziaržaŭnych i pryvatnych miedycynskich ustanoŭ («Eleas», «Haryzont», «8-ja haradskaja paliklinika» i Respublikanski centr miedycynskaj reabilitacyi i balniealačeńnia). Paśla prypynieńnia dziejnaści miedycynskaha centra «Łade» my ŭ pieršuju čarhu byli vymušanyja šukać časovuju zamienu i dadatak da kompleksu miedycynskich pasłuh nie stolki dla samich supracoŭnikaŭ, kolki dla ich dziaciej. U jakaści alternatyvy była adkrytaja prahrama piedyjatryčnaha absłuhoŭvańnia ŭ centry «Miersi». Jaho plusy — zručnaje raźmiaščeńnie adnosna centra horada i asnoŭnaha ofisa kampanii, dastatkovaja kolkaść śpiecyjalistaŭ pa zapatrabavanych napramkach, najaŭnaść usich nieabchodnych pasłuh. Tym nie mienš, ci buduć uklučanyja ŭ bieniefitny pakiet na pastajannaj asnovie novyja miedycynskija centry, zaležyć ad taho, ci adnović pracu «Łade».
Što viadoma pra kliniku «Miersi»?
Miedcentr adkryŭsia 28 studzienia 2021 hoda pa adrasie Ihnacienki, 8 (niedaloka ad haścinicy «Viktoryja» i muzieja VAV). Ciapier u štacie 95 daktaroŭ. Miedcentr praciahvaje nabirać śpiecyjalistaŭ, u hety momant adkrytyja 20 vakansij.
Paśla «spravy artapiedaŭ» mienavita klinika «Miersi» stała adzinaj, u jakoj staviać impartnyja sustavy. Apieracyi pa pratezavańni tut kaštujuć ad 6,5 da 8 tysiač dalaraŭ — suprać 3-4 tysiač, jakija raniej prasili ŭ dziaržaŭnych klinikach.
Žurnalisty «Biełaruskaha naśledavalnaha centra» vyśvietlili, što ŭ kliniki «Miersi» čatyry ŭładalniki, jakija majuć u biznesie roŭnyja doli. Heta Maksim Turaŭ, Ludmiła Niaronskaja, Natalla Karatkievič i kampanija «Hruzavaja słužba». Pamiž saboj ich źviazvaje nie tolki klinika, ale i inšy biznes, a taksama suviazi z «nabližanymi» da Alaksandra Łukašenki biznesoŭcami i znajomstva sa starejšym synam Viktaram.
