Fota: asabisty archiŭ
18-hadovuju Anitu zatrymali ranicaj 23 lutaha razam ź jaje 26-hadovym bratam Janam. U ich kvateru ŭvarvalisia hrupa zachopu HUBAZa i SACHRa ŭ poŭnym abmundziravańni i sa zbrojaj. Pra heta raskazvaje Chryścina Misiučenka, svajačka Anity.
«Da ich stukalisia ŭ dźviery, ale jany nie čuli, bo spali. U vyniku dźviery ŭzłamali. Praviali pieratrus, z taho, što znajšli — biełaruski ściah. Jana, brata Anity, źbili jašče tam da straty prytomnaści. Ja ź im paśla razmaŭlała, i jon nie pamiataje, što ŭ toj momant adbyvałasia. Dapytvali jaho ŭ kvatery, chacieli, kab jon skazaŭ parol ad telefona», — kaža Chryścina.
U hety ž dzień u Anity adbyŭsia sud. Dziaŭčynie prysudzili 15 sutak pa artykule 24.3 (niepadparadkavańnie siłavikam). Paśla ich jaje nie vypuścili.
«Naohuł pieršapačatkova jany pryjšli, bo nibyta była niejkaja spasyłka, źviazanaja z płanam «Pieramoha», — skazali «Našaj Nivie».
Mahčyma, havorka pra padmannuju spasyłku na niesapraŭdnuju «Pieramohu», raźmieščanuju siłavikami, kab identyfikavać ludziej, jakija šukajuć kantakta z płanam, stvoranym siłavikami, jakija arhanizavalisia ŭ «Bajpoł» — inicyjatyvu aficeraŭ suprać dyktatury.
«Chto rehistravaŭsia pa joj, tych jany zaraz adsočvajuć, — kaža Chryścina Misiučenka. — Paśla ŭ telefonie Anity znajšli fatahrafiju ź mitynhu ŭ 2020 hodzie.
Maci pra zatrymańnie nichto nie skazaŭ. Jana daviedałasia pra heta tolki praź niekalki dzion, kali Jan i Anita pierastali vychodzić na suviaź. Svajaki, viadoma, čakali, kali jana vyjdzie. Ale Anicie dali artykuł 342 Kryminalnaha kodeksa (arhanizacyja dziejańniaŭ, jakija hruba parušajuć hramadski paradak, abo aktyŭny ŭdzieł u ich). Janu prypisali artykuł 361 Kryminalnaha kodeksa (stvareńnie ekstremisckaha farmiravańnia abo ŭdzieł u im)», — kaža Chryścina.
Adrazu paśla zatrymańnia Jan apynuŭsia ŭ špitali. Adtul jon zmoh uciačy. Ciapier chłopiec u biaśpiecy.
«Ja zmahła jaho paru razoŭ naviedać, pieradać rečy, — kaža svajačka. — Jak jon mnie raskazvaŭ, jany bjuć tak, kab nie było śladoŭ pabojaŭ. Bačyła na im ślady ad kajdankoŭ, a jašče raniej u kvatery akryvaŭlenuju škarpetku. Razhrom, viadoma, tam byŭ poŭny», — praciahvaje jana.
«Na fatahrafii ź mitynhu ja taksama była, — dadaje Chryścina. — Kali daviedałasia pra heta, adrazu ž źjechała ź Biełarusi. Litaralna praź niekalki dzion pryjšli pa mianie try mužčyny ŭ skuranych kurtkach. Doma byŭ brat, jakomu 16 hadoŭ. Kali jon vychodziŭ, jany stajali na kalidory. Spytali, kudy jon. Brat adkazaŭ, što ŭ škołu na dadatkovyja zaniatki.
Jany zahadali adčynić kvateru, dastali ŭsie ŭtroch pistalety i nastavili na majho brata. Jon išoŭ napieradzie, a zzadu jany.
Pahladzieli ŭsie pakoi, nikoha nie było. Zajšli da mianie ŭ pakoj, ubačyli na stale niejkija klučy i ŭziali ich. Z maim bratam jany pajechali ŭ kvateru Jana i Anity, pasprabavali adamknuć dźviery, ale nie ŭdałosia. Paśla hetaha brata adpuścili i viarnuli razam z hetymi klučami».
Fota: asabisty archiŭ
Anita, raskazvaje svajačka, vielmi dobra vučyłasia ŭ škole.
«Jana dabradušnaja, nie trymała zła na kahości. Lubiła malavać, źbirałasia pastupać va ŭniviersitet. Ale
z-za taho, što ŭ ich u siamji składanaje finansavaje stanovišča, Anita pačała padzarablać mierčendajzieram, a druhuju pałovu dnia malavała, rabiła vyraby ručnoj raboty.
U VNU jana chacieła pastupać na markietołaha, ale bolš malavać u hetaj śfiery. Ciapier jakraz idzie čas, kali jana pavinna rychtavacca da pastupleńnia, a jana siadzić u SIZA».
***
Padtrymać Anitu možna listom, a lepš paštovym pieravodam ci banderollu (tut praviły vysyłańnia banderolaŭ u turmy) z praduktami pa adrasie:
SIZA-1. 220030, h. Minsk, vuł. Vaładarskaha, 2,
Anita Alehaŭna Bakunovič.
Taksama dziaŭčynu možna padtrymać hrašovym pieravodam praz svajakoŭ:
Khristsina Misiuchenka
(IBAN)
PL57 1090 1694 0000 0001 5001 3322
Nazva banka: Santander
SWIFT (BIC)
WBKPPLPP
Čytajcie taksama:
«Dumaju, los padsudnych užo vyznačany». Žonka baranavickaha aktyvista Hundara — pra sud nad mužam
Vałanciorka fondu «Kraina dla žyćcia» Julija Syrych — na voli
