Skrynšot: Jutub-kanał «Žyćcio-malina»
Ci hatovy biełarusy vajavać i čamu mnohija vinavaciać ZŠA?
«Samym važnym źjaŭlajecca staŭleńnie da patencyjnaha ŭvodu biełaruskich vojsk na terytoryju Ukrainy. I tut situacyja takaja — kožny dziasiaty biełarus da hetaha stavicca stanoŭča.
Jość inšyja paramietry.
Staŭleńnie da dazvołu na raźmiaščeńnie rasijskich vojsk na terytoryi Biełarusi — tut my bačym kłasičny split padziełu hramadskaha mierkavańnia prykładna na pałovu. Kali pytać pra vykarystańnie biełaruskaj infrastruktury dla bajavych dziejańniaŭ suprać Ukrainy, tut užo źmianiajecca pracent ludziej, jakija suprać, — dźvie traciny. A kali pytać pra adabreńnie ŭvodu vojska Biełarusi na terytoryju Ukrainu — tut kožny dziasiaty padtrymlivaje.
Što datyčyć pryznańnia «Ł/DNR» Rasijaj — da hetaha spakojnaje staŭleńnie 50-60%, a da pryznańnia Biełaruśsiu — mienšy pracent. Važna toje, što heta vialiki pracent. Jość recha ruskaha śvietu ŭ miedyjnym sensie, miedyjnaje ruskaje mirapamazańnie.
Važnym pytańniem źjaŭlajecca — chto vinavaty? I tut pieršuju pazicyju zajmaje Rasija, a druhuju — ZŠA. Rasiju vinavatymi ličać kožny čaćvierty (25%), a ZŠA — 20%. Zaraz śpiecyfikaj miedyja-momantu źjaŭlajecca istotnaje zbližeńnie naratyvu biełaruskich dziaržaŭnych ŚMI i rasijskich. Hetaje zbližeńnie i pryviało da takich ličbaŭ.
Datyčna ZŠA — čamu takaja blizkaja vieličynia z Rasijaj? Z adnaho boku, jość vialiki płast ludziej, jakija adrazu zhadvajuć bambiožki Juhasłavii, Iraka i h.d. Ale jość płast ludziej, jakija kažuć: heta mienavita ZŠA tak doŭha nie dapamahali Ukrainie zbrojaj, nie zakryli nieba, uviali niedastatkovyja sankcyi. To-bok ZŠA vinavatyja ŭ niedastatkovych i nieefiektyŭnych dziejańniach. Matyvy supraćlehłyja pamiž saboj, ale spałučajucca i padvyšajuć pracent viny ZŠA».
Kali ekanomika abvalicca — heta daroha da pratestaŭ. Ale jość i inšy varyjant
«Ekanamičnaja situacyja — horš za vajnu va ŭsprymańni [biełarusaŭ]. Ekanamičnaja situacyja bolš važny aśpiekt žyćcia, bolš napružany, bolš tryvožny dla biełarusaŭ, što znachodziacca ŭnutry krainy. Pa ŭsich indykatarach heta vyrazna bačna: jana abvalilisia macniej, čym u 2020 hodzie, kali byŭ i kavid, i ekanamičnyja ciažkaści, i ŭsio inšyja padziei.
Kali ekanamičnaja situacyja abvalicca — heta daroha da pratestaŭ, jak varyjant.
Ekanamičnaje paharšeńnie moža, z adnaho boku, vieści da ahulnasacyjalnaj pratesnaj aktyŭnaści, a ź inšaha — da indyvidualizacyi albo atamizacyi ekanamičnaj dziejnaści. Heta kali kožny kankretny čałaviek budzie dumać, što vyrašyć svaje ekanamičnyja prablemy indyvidualnaj intensifikavanaj dziejnaściu — pracavać nie 8, a 15 hadzin na sutki i znachodzić šmat roznych pracoŭnych miescaŭ adnačasova. I taki, i taki viektar mahčymy, ale i to, i druhoje — šlach da turbulentnaści».
Ci jość u hramadstvie raskoł?
«Biełaruskaje hramadstva zaraz u stanie intensiŭnaha łatentnaha raźvićcia. Raskołu ŭ sensie nianaviści adno da adnaho niama. Jak by tam što ni padahravałasia, nie dajšło da hvałtoŭnych dziejańniaŭ, nie dajšło, tym bolš, da hramadzianskaj vajny. Jość istotna roznyja punkty hledžańnia, ale ludzi na bytavym uzroŭni niejak uzajemadziejničajuć pamiž saboj.
Kali ŭžo karystacca terminam «raskoł», dyk jość raskoł pamiž hramadzianami ŭ svajoj masie i arhanizavanaj uzbrojenaj častkaj hramadstva, jakaja vielmi nievialikaja pa svajoj pracentnaj praporcyi.
Jość peŭnaje kaštoŭnasnaje ŭzajemanieparazumieńnie pamiž «jabaćkami» i prychilnikami pieramienaŭ. Ale heta nie jość raskoł, jaki dachodzić da fizičnaha supraćstajańnia. Heta nie jość raskoł emacyjna-nienaviśnicki».
Pra tajnu zachavańnia rejtynhu Łukašenki
«Haryzantalnyja suviazi — adziny mahčymy sposab arhanizacyi hramadstva i arhanizacyi luboha vidu dziejnaści ŭ bolš składanym sučasnym śviecie. Nielha kiravać składanymi pracesami, nie delehujučy paŭnamoctvy. Nielha, navat kali ty samy hienijalny.
Častka ludziej, jakaja ŭ bolšaj stupieni aryjentavanaja na pracu ŭ składanych sistemach, mienavita ŭ jakich pracuje delehavańnie paŭnamoctvaŭ, vyjechała. I kali taki praces adbyvajecca, dziaržava hublaje svaje kankurentnyja mahčymaści pa adnosinach da navakolnaha śvietu.
Mahu sfarmulavać formułu, jana niepryjemna hučyć. Tajna zachavańnia rejtynhu Łukašenki — heta panižeńnie prafiesijnaha i jakasnaha składu i ŭzroŭniu nasielnictva».
