Šejch Chalifa naradziŭsia ŭ 1948 hodzie. Jon byŭ šasnaccatym emiram Abu-Dabi i druhim prezidentam Abjadnanych Arabskich Emirataŭ, zaniaŭšy hety post u 2004 hodzie paśla svajho baćki, šejcha Zajd bien Sułtana, jaki zasnavaŭ AAE.
Padčas kiravańnia šejcha Chalify u AAE byŭ praviedzieny šerah demakratyčnych źmienaŭ. Mienavita ŭ jaho honar byŭ nazvany pabudavany ŭ 2010 hodzie samy vysoki budynak u śviecie «Burdž Chalifa» ŭ Dubai. Jon taksama byŭ adnym z najbahaciejšych ludziej śvietu.
Paśla Chalify kiraŭnikom AAE pavinien stać jahony małodšy brat, Muchamied bien Ziejd, jaki z 2014 hoda, kali prezident pieranios insult, faktyčna kiravaŭ krainaj.
Abjadnanyja Arabskija Emiraty — heta fiederacyja siami emirataŭ, kožny ź jakich źjaŭlajecca absalutnaj manarchijaj.
Prezident, zhodna z Kanstytucyjaj, źjaŭlajecca druhim pa značnaści orhanam ułady paśla Viarchoŭnaj Rady, jakaja składajecca z kiraŭnikoŭ usich emirataŭ. Prezident abirajecca terminam na piać hadoŭ, jon uznačalvaje Radu, pryznačaje premjer-ministra, dypłamataŭ, vypuskaje zakony i ŭkazy, zaćviardžaje śmiarotnyja prysudy i pradstaŭlaje krainu za miažoj.
Faktyčna, adnak, vybarnaść prezidenta ŭ AAE farmalnaja, im amal aŭtamatyčna robicca emir najbolšaha i najmacniejšaha emirata Abu-Dabi. Tamu hetaja pasada ŭ krainie de-fakta źjaŭlajecca spadčynnaj.
Ministerstva pa spravach prezidenta ŭ suviazi sa śmierciu šejcha Chalify abviaściła ŭ AAE aficyjny žałobu. Na praciahu 40 dzion buduć pryspuščanyja Ściahi, praca va ŭsich orhanach ułady i ŭ pryvatnym siektary budzie spynienaja na try dni — z suboty pa paniadziełak.
