Fota: Ivantsov / depositphotos.com
Pavodle paviedamleńnia KDK,
«padčas spynieńnia niezakonnaj dziejnaści kryptaabmieńnika, jaki vykarystoŭvaŭsia dla pieravodu hrašovych srodkaŭ z-za miažy ŭ Respubliku Biełaruś, ustanoŭlenyja hramadzianie i arhanizacyi, jakija ažyćciaŭlali finansavańnie niezakonnaj pratesnaj dziejnaści».
Pieravod i abmien kryptavalut rabili, pa viersii DFR, žychary Minska i Jeŭrasajuza, u dačynieńni da jakich raspačata kryminalnaja sprava. U 2020—2021 hadach, maŭlaŭ, na pastajannaj asnovie z vykarystańniem hetaha servisu z-za miažy pieravodzilisia hrašovyja srodki ad fonda «BY_help» fondu «Kraina dla žyćcia», jaki paśla nibyta rabiŭ vypłaty ŭdzielnikam pratestaŭ, a taksama «kurataram pratesnych akcyj». Srodki, što pastupali ŭ kryptavalucie, pieravodzilisia ŭ najaŭnyja.
KDK śćviardžaje, što
«ŭ ciapierašni čas rabotnikami finansavaj milicyi ŭstanoŭlena baza dadzienych usich hramadzian i arhanizacyj (jak našaj krainy, tak i zamiežnych dziaržaŭ), jakija karystalisia kryptaabmieńnikam dla finansavańnia niezakonnaha pratestnaha ruchu».
Kryminalnyja spravy zaviedzienyja ŭ dačynieńni da dvuch čałaviek, jakija zatrymanyja.
Taksama abviaščajecca, što ŭstanoŭlenyja hramadzianie Respubliki Biełaruś, jakija ažyćciaŭlali hrašovyja pieravody na adras «ekstremisckich farmavańniaŭ» i tym samym padtrymlivali ich dziejnaść.
Kolki ŭ hetym praŭdy, a kolki žadańnia zapałochvańnia — ciažka skazać. Niešta padobnaje raniej užo hučna abviaščałasia ŭ kancy kastryčnika 2021 hoda, i tam taksama zajaŭlałasia, što vyjavili ledź nie ŭsich pahałoŭna. Ale na praktycy heta akazałasia nie tak.
Kiraŭnik fonda BYSOL Andrej Stryžak prakamientavaŭ hetuju navinu dla Zerkalo.io:
«Orhany ŭžo daŭno zajavili pra vykryćcio niejkaha kryptaabmieńnika. Čamu jany praź niekalki miesiacaŭ znoŭ pra jaho ŭspomnili i vydajuć za ekskluziŭ, niezrazumieła. Mahčyma, takim čynam jany chočuć padkreślić svaju značnaść. Tady śpiecyjalna dla ich adznaču, što BYSOL u pryncypie nie karystajecca kryptaabmieńnikami. Z našaha boku zabiaśpiečana poŭnaja biaśpieka achviaravalnikaŭ».
Suzasnavalnik fonda ByHelp Alaksiej Lavončyk taksama adhuknuŭsia na hetuju navinu ŭ Fejsbuku:
«Jaki ŭžo raz čytaju, što «KDK uskryŭ schiemy pastupleńnia našych hrošaj u krainu». Nie, nie ŭskryŭ. I nie ŭskryje. Ale vy možacie i dalej ryć ziamlu nosam, pavažanyja siabry z SK/KDB/KDK i inšaha. Napišycie Karač, moža jana vam vydumanaj faktury padkinie razam z Hałuzaj. Vam nikoli nie pierarezać schiemy pastaŭki našych hrošaj».
Čytajcie taksama:
KDK vyjaviŭ 5 kryptavalutčykaŭ, jakich abvinavačvaje ŭ finansavańni pratestaŭ
