ZŠA vielmi intensiŭna, praz paviedamleńni ŭ ŚMI, raźviedku i vykazvańni palitykaŭ, hienierujuć napružany infarmacyjny fon pra surjoznaść rasijskaj pahrozy.

Bieły dom vielmi aktyŭna publikuje raźvieddanyja, dzielicca imi z chaŭruśnikami, nazyvaje terminy mahčymaj apieracyi Maskvy i vykryvaje mierkavanyja scenary Rasii dla apraŭdańnia ŭvarvańnia va Ukrainu.

10 lutaha Džo Bajden navat zaklikaŭ amierykancaŭ pakinuć Ukrainu. Paśla hetaha da zakliku dałučylisia inšyja zachodnija dziaržavy.

Heta vielmi kantrastuje z tym, jak Vašynhton pavodziŭ siabie ŭ 2014 hodzie, kali Rasii ŭdałosia zachapić Krym i ŭschod Danbasa.

Padobna, intensiŭnaść infarmacyjnych paviedamleńniaŭ Biełaha doma vakoł pahrozy rasiejskaha ŭvarvańnia heta nie tolki indykatar surjoznaści situacyi, ale i častka metanakiravanych zachadaŭ dla praduchileńnia takoj ataki. U čym łohika takoj biesprecedentnaj stratehii, jakuju amierykanskija analityki nazyvali «miehafonnaj»?

Voś jak heta tłumačyć hazieta Washington Post.

«Heta biesprecedentna navat dla časoŭ da pačatku majoj prafiesijnaj karjery, — cytuje vydańnie słovy Džona Chierbsta, ambasadara ZŠA va Ukrainie ŭ 2003—2006 hadach. — Mahčyma, heta možna paraŭnać z kubinskim rakietnym kryzisam abo padrychtoŭkaj da vajny ŭ Iraku».

Hučnaść zajaŭ Biełaha doma nie aznačaje, što amierykanskija acenki situacyi niasłušnyja ci što Rasija nie źbirałasia napaści na Ukrainu. Bolšaść analitykaŭ sychodziacca, što administracyja ZŠA aceńvaje situacyju pravilna i pavodzić siabie mudra, dziejničajučy mienavita takim sposabam, kab padrychtavacca i padrychtavać sajuźnikaŭ da luboj rasijskaj apieracyi.

Vielizarnaja kolkaść apublikavanaj infarmacyi dazvoliła Vašynhtonu maksimalna publična pradstavić śvietu realnuju i niepasrednuju niebiaśpieku, zvuziŭšy zazor pamiž pazicyjami ZŠA i Jeŭropy ŭ vypracoŭcy samych žorstkich sankcyj suprać Uładzimira Pucina. I kali Pucin spadziavaŭsia pravieści chutkuju i niečakanuju apieracyju, anałahičnuju toj, jakaja adbyłasia ŭ 2014 hodzie, to ciapier jon apynuŭsia ŭ situacyi, kali za im naziraje ŭvieś śviet. Heta moža być najlepšym adkazam na taktyku Pucina.

Rasijskaja taktyka hibrydnaj vajny zasnavanaja na tym, kab siejać błytaninu i dezynfarmacyju. Abraŭšy stratehiju radykalnaj adkrytaści, ZŠA ŭskładniajuć Rasii zadaču raspaŭsiudu dezynfarmacyi ab jaje dziejańniach.

Rasiejcy sprabujuć adsprečvać abvinavačvańni — a heta ciažka rabić, kali ty sabraŭ kala maleńkaj susiedniaj krainy pałovu svajoj armii, — ale im daviałosia publična abaraniacca.

Hetaja adkrytaść i hołasny ton taksama palahčaje žyćcio Vašynhtonu ŭ tym, kab bolš-mienš zachoŭvać adzinstva sajuźnikaŭ pa NATA.

Adnak vybar Biełym domam takoj taktyki ŭ dačynieńni da Rasii maje i ryzyki. Kali z boku ZŠA heta blef, jość niebiaśpieka spravakavać Pucina na dziejańni, jakich jon nie płanavaŭ. Zaraz Pucinu ź jaho «pacanskimi paniaćciami» ciažej adstupić, skažuć: «Pacan zabajaŭsia».

Ale ŭsio ž plusy padobnaj «miehafonnaj» stratehii ZŠA, zdajecca, pieravažajuć minusy.

«Ja liču małaimaviernym, što rasiejcy praviaduć bujnamaštabnuju apieracyju, a imaviernaść drobnamaštabnaj liču nižejšaj za 50%. Ale ja dumaju, što vajna stała mienš imaviernaj mienavita tamu, što administracyja Bajdena zaniała takuju ćviorduju pazicyju ŭ hetym pytańni», — piša ahladalnik.

Ekśpiert analityčnaha centra Council on Foreign Relations Maks But adznačaje, što infarmacyjnaja kampanija ŭładaŭ ZŠA ŭ supraćstajańni z Rasijaj adkryła novy front kankurencyi pamiž dźviuma dziaržavami.

Amierykanskija čynoŭniki doŭhija hady narakali na słabaść ZŠA ŭ infarmacyjnych vojnach z Rasijaj. 

Praciŭniki ZŠA svabodna siejuć chłuśniu i raspaŭsiudžvajuć teoryi zmovy, u toj čas jak urad ZŠA maje mienšuju svabodu dziejańniaŭ, a ŚMI zachodniaha śvietu kirujucca vysokimi infarmacyjnymi standartami

Ciapier ža, na fonie abvastreńnia kryzisu vakoł Ukrainy, administracyja Džo Bajdena, padobna, raspracavała adekvatnuju techniku infarmacyjnaha adporu. U adkaz na raspaŭsiudžvańnie režymami Pucina i Łukašenki prapahandysckaha tryźnieńnia pra «padkantrolnaść Ukrainy», «terarystku Cichanoŭskuju», «hienacyd uciekačoŭ na polskaj miažy» i «ahresiŭnyja namiery NATA», Bieły dom adkazaŭ, publikujučy realnyja dadzienyja raźviedki pra scenary Rasii pa stvareńni padstavy dla ŭvarvańnia va Ukrainu.

U 1939 hodzie Saviecki Sajuz abstralaŭ ułasnyja vojski kala miažy ź Finlandyjaj, kab apraŭdać napad na hetuju krainu.

U 1968 hodzie ahienty KHB na terytoryi tahačasnaj Čechasłavaččyny nanosili antysavieckija hrafici i navat stvaryli schovanku sa zbrojaj, pramarkiravanuju nadpisam Made in USA, kab apraŭdać siłavoje padaŭleńnie savieckaj armijaj Pražskaj viasny.

Rasijskaje ŭvarvańnie ŭ Hruziju ŭ 2008 hodzie i va Ukrainu ŭ 2014 hodzie supravadžałasia chvalami dezynfarmacyi, uklučajučy vykarystańnie «zialonych čałaviečkaŭ» dla maskiroŭki sapraŭdnaj roli rasijskich Uzbrojenych sił. 

Kali ŭ minułym rasijskija infarmacyjnyja ataki nie raz zaśpiavali Zachad źnianacku, a ŭ 2014-m apieracyja ŭ Krymie stała siurpryzam, to ŭ 2022-m usio pajšło nie tak.

Vykryćcio rasijskich zmoŭ u režymie realnaha času zdajecca efiektyŭnym adkazam. Praŭda, heta stvaraje niebiaśpieku vykryćcia raźviedvalnych krynic.

Praaktyŭnaja amierykanskaja stratehija prymušaje rasijskija ŭłady zadumacca, adkul ža zachodnija śpiecsłužby biaruć infarmacyju. Rasijskamu kiraŭnictvu daviadziecca zajmacca pošukam zdradnikaŭ va ŭłasnych kabinietach. Previentyŭnyja paviedamleńni taksama niejtralizujuć rasijskuju prapahandu i dazvalajuć ZŠA sprabavać kantralavać naratyŭ, a nie sastupać Pucinu i jaho prapahandystam.

Uličvajučy vysokaje značeńnie infarmacyjnych apieracyj u sučasnaj vajnie, heta niemałoje dasiahnieńnie. 

Ciapier u Maskvy zastajucca tolki dva varyjanty, i abodva ź ich pahanyja. Napaści na Ukrainu ciapier — heta stać ahresaram u vačach mižnarodnaj supolnaści, cynična rastaptać usie pryncypy, na jakich trymałasia jeŭrapiejskaja biaśpieka paśla 1945-ha, i buduć radykalnyja sankcyi. A admovicca ad hetaj zadumy, raz jaje vykryli, — pakazać, što kiška tanka. Padvaryjant apošniaha — nie napadać, a pryznać DNR i ŁNR taksama tak sabie. Papularnaści ŭ śviecie Rasii jon nie dadaść. Navat Kitaj takoha nie acenić.

U Maskvie vymušana paŭtarajuć, što nie źbirajucca napadać na Ukrainu — nie budzieš ža havaryć inačaj, navat kali ty sabraŭ pałovu armii i «Iskanderaŭ» da miežaŭ małoj krainy.

Tym nie mienš, zdajecca, dypłamatyčnuju i imidžavuju vajnu Rasija ŭžo prajhrała. 

Čytajcie jašče:

Pahroza ŭvarvańnia Rasii va Ukrainu pavinna chvalavać kožnaha. Historyk Juval Noj Charary — pra toje, što čałaviectva moža stracić

Ci mahčymaje ŭvarvańnie Rasii va Ukrainu? Jak situacyja budzie raźvivacca? Vialiki analiz

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?