Sama situacyja była takaja. Azamat razam ź siabram zajšli ŭ minski «Jeŭraopt» i ŭbačyli tam «biaspłatny» ałkahol. Kala butelki stajaŭ ceńnik, na jakim było paznačana «0 rubloŭ 00 kapiejek».
«Siabar, kali ŭbačyŭ, zhrob usio, što było na vitrynie — 12 butelek. Na kasie my prabivali jašče sadavinu, inšyja pradukty. Kali kasir prabiła šeść butelek i ŭbačyła, što cana nie mianiajecca, — adrazu ž vyklikała achovu, stała rabić admienu ŭ čeku», — raskazaŭ mužčyna karespandentu Onlíner.
Juryst Ivan Rajkievič tłumačyć, jak vyhladaje situacyja ź jurydyčnaha punktu hledžańnia:
«Sapraŭdy, spažyviec maje prava na toje, kab jamu davałasia dakładnaja infarmacyja pra tavary, a pradaviec, u svaju čarhu, abaviazany svoječasova davać spažyŭcu nieabchodnuju i dakładnuju infarmacyju ab prapanavanych tavarach.
Bolš taho, zhodna z p. 2 art. 462 Hramadzianskaha kodeksa Respubliki Biełaruś, dahavor roźničnaj kupli-prodažu źjaŭlajecca publičnym dahavoram, adpaviedna, ceńnik na tavary, zhodna z p. 2 art. 407 Hramadzianskaha kodeksa, — heta publičnaja afierta.
Art. 396 Hramadzianskaha kodeksa praduhledžvaje, što admova kamiercyjnaj arhanizacyi ad zaklučeńnia publičnaj damovy pry najaŭnaści mahčymaści dać spažyŭcu adpaviednyja tavary (raboty, pasłuhi) nie dapuskajecca.
U art. 463 Hramadzianskaha kodeksa Respubliki Biełaruś skazana, što damova roźničnaj kupli-prodažu ličycca zaklučanaj u naležnaj formie z momantu vydačy pradaŭcom pakupniku kasavaha abo tavarnaha čeka albo inšaha dakumienta, jaki paćviardžaje apłatu tavaru».
Zychodziačy z hetaha, pakupniki nibyta mieli racyju, i nie pradaŭšy im tavar pa canie, chaj i pamyłkova paznačanaj na ceńniku, pradaŭcy parušyli zakon? Juryst kaža, što nie ŭsio tak adnaznačna, bo sudovaja praktyka idzie inšym šlacham:
«U padobnych vypadkach sudy niaredka admaŭlajuć u zadavalnieńni patrabavańniaŭ spažyŭca ab prymusie da zaklučeńnia dahavora roźničnaj kupli-prodažu, zychodziačy z nastupnaha:
Pavodle art. 1 Hramadzianskaha kodeksa, pradprymalnickaja dziejnaść — heta samastojnaja dziejnaść jurydyčnych i fizičnych asob, jakaja ažyćciaŭlajecca imi ŭ hramadzianskim abarocie ad svajho imia, na svaju ryzyku i pad svaju majomasnuju adkaznaść i nakiravanaja na sistematyčnaje atrymańnie prybytku ad karystańnia majomaściu, prodažu rečaŭ. Pry prodažy tavaru pa canie 0 rubloŭ prybytku, vidavočna, niama;
Art. 2 Hramadzianskaha kodeksa praduhledžvajecca pryncyp dobrasumlennaści i razumnaści ŭdzielnikaŭ hramadzianskich pravaadnosin;
Zhodna z p. 1 art. 402 Hramadzianskaha kodeksa, damova ličycca zaklučanaj, kali pamiž bakami ŭ patrabavanaj u padobnych vypadkach formie dasiahnutaje pahadnieńnie pa ŭsich istotnych umovach damovy. U hetym vypadku adsutničaje ekanamičnaja vyhada dla pradaŭca i majecca techničny zboj (što pradaviec abaviazkova zaśviedčyć), a infarmacyja ab niapravilna nazvanaj canie daviedzienaja da spažyŭca. Jak pakazvaje praktyka, u padobnych vypadkach spažyŭcu, vierahodna, budzie admoŭlena ŭ zadavalnieńni jaho patrabavańniaŭ».
