Rejs «Afiny-Vilnia» lacieŭ nad Biełaruśsiu 23 maja 2021 hoda.
Palaki: ŭ hety dzień pracavaŭ dyśpietčar Aleh Halehaŭ. Kala 9:00 univiersalnaha času (12:00 pa Minsku) u zału kantrolu palotaŭ zajšoŭ kiraŭnik «Biełaeranavihacyi» Leanid Čuro i čałaviek, jakoha ŭ Polščy nazvali supracoŭnikam śpiecsłužbaŭ. Paśla hetaha Čuro syšoŭ.
Mužčyna prainfarmavaŭ dyśpietčaraŭ, što na borcie samalota Ryanair znachodzicca bomba, i jon pavinien sieści ŭ Minsku.
Voś što raspaviali pradstaŭniki biełaruskaha Departamienta pa avijacyi:
u 12.30 pa biełaruskim časie samalot uvajšoŭ u biełaruskuju pavietranuju prastoru, a ŭ 12.31 dyśpietčar paviedamiŭ piłotam pra bombu.
«U nas jość infarmacyja ad sakretnych słužbaŭ, što ŭ vas na borcie bomba. Hetaja bomba moža być aktyvavanaja nad Vilniaj», — kaža dyśpietčar u 12.31. Rasšyfroŭku pieramovaŭ Departamient pa avijacyi apublikavaŭ na svaim sajcie.
Polskija śpiecsłužby śćviardžajuć, što byli pryniatyja miery dla taho, kab razmovy z rejsam nie byli čutnyja ŭ inšych samalotach. Pry hetym nibyta absłuhoŭvańniem rejsa zajmaŭsia adzin dyśpietčar pad kantrolem śpiecsłužbista. U roliku havorycca, što mužčyna źviazvaŭsia pa telefonie z čałaviekam, jakoha nazyvaŭ Andrej Anatolevič.
Dyśpietčar paviedamiŭ piłotu, što list z pahrozami ab bombie pryjšoŭ u aeraporty niekalkich krain. Taksama jon parekamiendavaŭ samalotu sieści ŭ Minsku. Piłot udakładniŭ: chto rekamienduje sieści ŭ Minsku? Kampanija, aeraport vyletu, aeraport prylotu?
Dyśpietčar kaža: heta naša rekamiendacyja.
U hetym momancie palaki nastojvajuć: dyśpietčaru padkazvaŭ toj samy tajamničy aficer. U jakaści dokazu pryvodzicca kavałak aŭdyja, dzie mužčyna na ruskaj movie padkazvaje padčas pieramovaŭ dyśpietčara i piłota.
Paśla ŭ rasšyfroŭcy pieramovaŭ, apublikavanaj biełaruskim bokam, piłot udakładniaje pra kod niebiaśpieki: zialony, žoŭty, aranžavy, čyrvony?
Dyśpietčar adkazvaje: kod čyrvony.
Na aŭdyjazapisie palakaŭ čuvać, jak dyśpietčar pierakładaje nieviadomamu pytańnie piłota na ruskuju movu. Nieviadomy kaža: «Skažy, kod čyrvony».
Paśla hetaha piłot razvaročvaje samalot dla pasadki ŭ Minsku. Da vychadu ź biełaruskaj pavietranaj prastory zastavałasia dźvie chviliny palotu. Paśla hetaha, śćviardžajuć palaki, toj nieviadomy mužčyna, jakoha jany nazyvajuć aficeram KDB, pakinuŭ zału kantrolu palotaŭ.
Taksama palaki źviartajuć uvahu, što list ab bombie aeraporty Vilni, Afin, Safii, Bucharesta i Kijeva atrymali ŭ pieryjad z 9.25 da 09.34 univiersalnaha času (z 12.25 da 12.34 pa Minsku), a ŭ aeraport Minska jano pastupiła tolki ŭ 09.56 univiersalnaha času — u 12.56 pa Minsku, užo paśla taho, jak dyśpietčar raspavioŭ pra bombu piłotu.
Taksama biełaruski bok zajaŭlaŭ, što list pra bombu pryjšoŭ ad sałdat CHAMAS. Voś tolki paźniej CHAMAS aficyjna abvierh svaju datyčnaść da «miniravańnia».
A kampanija Proton Technologies, jakaja pradstaŭlaje pasłuhi abaronienaj elektronnaj pošty, aficyjna paćvierdziła, što list z pahrozaj, na jaki spasyłalisia ŭłady Biełarusi, byŭ adpraŭleny praz 24 chviliny paśla taho, jak ab miniravańni paviedamili kapitanu pavietranaha sudna.
