Fota: spd.de.
Novy kancler Ołaf Šolc strymaŭ svajo pieradvybarnaje abiacańnie i pryznačyŭ u novy ŭrad adnolkavuju kolkaść mužčyn i žančyn. Charakterna, što žančyny buduć kiravać pytańniami biaśpieki i dypłamatyjaj.
U Hiermanii źjavicca pieršaja ministarka zamiežnych spraŭ i pieršaja ministarka ŭnutranych spraŭ. Taksama ŭ Hiermanii źjavicca treciaja ministarka abarony zapar.
«Žančyny i mužčyny składajuć pałovu nasielnictva, tamu žančyny taksama pavinny atrymać pałovu ŭłady, — skazaŭ Šolc. — Ja vielmi hanarusia tym, što nam udałosia realizavać».
Choć sama Mierkiel nie nazyvała siabie fieministkaj i paźbiahała hiendarnych pytańniaŭ, mienavita jaje doŭhaje i paśpiachovaje znachodžańnie na pasadzie kanclera źmianiła ŭjaŭleńnie niemcaŭ pra žančyn u palitycy.
«Hiermanija źmianiłasia za apošnija niekalki hadoŭ, i Mierkiel adyhrała ŭ hetym vialikuju rolu», — skazała Juta Almiendzinhier, prezident daśledčaha instytuta Bierlinskaha centra sacyjalnych navuk i ekśpiert pa hiendarnych pytańniach i niaroŭnaści.
Pasady ministra abarony i zamiežnych spraŭ zaniali Kryścin Łambrecht i Analena Bierbak. Akramia taho, na pasadu ministra ŭnutranych spraŭ pryznačyli Nensi Fezier.
Analena Bierbak, novaja ministarka zamiežnych spraŭ, hučna zajaviła pra svoj namier zaniać bolš žorstkuju pazicyju ŭ adnosinach da aŭtarytarnych Rasii i Kitaja. Novaja ministarka ŭnutranych spraŭ Nensi Fezier paabiacała «zmahacca z samaj vialikaj pahrozaj, ź jakoj u ciapierašni čas sutykajecca naša libieralnaja demakratyja, — ultrapravy ekstremizm». Kryścin Łambrecht, jakaja stanie ministarkaj abarony, paabiacała palepšyć abstalavańnie niamieckich vojskaŭ.
Taksama žančyny zaniali pasady ministra adukacyi (Biećcina Stark-Vatcynhier), ministra navakolnaha asiarodździa (Štefi Lemkie) i ministra pa spravach siamji (En Špihiel). Ministram ekanamičnaha supracoŭnictva i raźvićcia stała Śvieńja Šulce, a ministram budaŭnictva — Kłara Hiejvic.
