29 maja 2020 hoda ŭ Hrodnie AMAP zatrymaŭ błohiera Siarhieja Cichanoŭskaha i jaho apieratara. Zatrymańnie trapiła ŭ žyvy efir.

Spačatku ŭ kadry źjavilisia dźvie žančyny-pravakatarki, jakija patrabavali, kab Cichanoŭski adkazaŭ na ich pytańni. Błohier sychodziŭ ad ich, ale jany pieraśledvali jaho.

Nieŭzabavie źjavilisia dvoje milicyjantaŭ. Adzin ź ich paciahnuŭ Cichanoŭskaha za ruku, ludzi kinulisia adbivać błohiera.

U hetaj mituśni niechta šturchanuŭ milicyjanta, jon upaŭ.

Tut i źjaviŭsia AMAP, jaki zatrymaŭ Cichanoŭskaha.

«Chłopcy, niejkaja pravakacyja, my ničoha nie rabili», — paśpieŭ skazać błohier. 

Zatrymanych adviali ŭ mikraaŭtobus. Ludzi sprabavali nie dać jamu źjechać, ale milicyi ŭdałosia źvieźci błohiera.

Kala UUS znachodzilisia dziasiatki ludziej.

Siarhiej Leanidavič Cichanoŭski — biełaruski błohier, aŭtar youtube-kanała «Kraina dla žyćcia».

U 2019 hodzie Siarhiej stvaryŭ youtube-kanał «Kraina dla žyćcia», jaki mienš čym za hod staŭ samym papularnym u biełaruskim siehmiencie Youtube. Błohier aktyŭna jeździŭ pa rehijonach Biełarusi, sustrakaŭsia z padpisčykami, braŭ u ich intervju, padčas jakich miascovyja žychary raspaviadali ab svaich prablemach.

Cichanoŭski vykazaŭ žadańnie bałatavacca na pasadu prezidenta, adnak pierad samym pačatkam vybarčaj kampanii byŭ aryštavany za arhanizacyju niesankcyjanavanaha mierapryjemstva i nie zmoh asabista padać dakumienty ŭ Centrvybarkam. Pavodle davieranaści heta zrabiła jaho žonka Śviatłana Cichanoŭskaja, ale CVK nie zarehistravaŭ błohiera ŭ jakaści pretendenta ŭ kandydaty, bo davieranaść nie była im asabista padpisanaja. Tady dakumienty na rehistracyju padała jaho žonka, i jaje zarehistravali.

Paśla zakančeńnia administracyjnaha aryštu Siarhiej Cichanoŭski staŭ davieranaj asobaj Śviatłany Cichanoŭskaj i aktyŭna ŭklučyŭsia ŭ kampaniju pa zbory podpisaŭ u jaje padtrymku. U kožnym horadzie, kudy pryjazdžała kamanda «Kraina dla žyćcia», sabrałasia rekordnaja kolkaść žadajučych padpisacca za vyłučeńnie Śviatłany. Adnak užo 29 traŭnia jon byŭ zatrymany ŭ Hrodnie padčas čarhovaha pikietu pa zbory podpisaŭ. Na pikiecie źjavilisia žančyny, jakija zadavali Siarhieju Cichanoŭskamu pravakacyjnyja pytańni i chapali jaho za vopratku. Zatym padyšli milicyjanty, ale prysutnyja nie padpuskali ich da błohiera. U niejki momant adzin ź milicyjantaŭ ŭpaŭ na ziamlu. Paśla čaho supracoŭniki AMAP brutalna zatrymali Siarhieja Cichanoŭskaha i niekatorych jaho paplečnikaŭ.

8 červienia Siarhieju Cichanoŭskamu i jašče šaści zatrymanych pa «hrodzienskaj spravie» pradjaŭlenaje abvinavačańnie pa č. 1 art. 342 Kryminalnaha kodeksa.

Paźniej Cichanoŭskamu pradjavili abvinavačańnie jašče pa artykule 191 Kryminalnaha kodeksa Respubliki Biełaruś — za «pieraškoda praviadzieńniu vybaraŭ i pracy Centrvybarkama». Heta sprava była ŭzbudžanaja paśla zajavy, padadzienaj na błohiera ŭ Śledčy kamitet kiraŭnikom CVK Lidzijaj Jarmošynaj.

Spačatku Cichanoŭski utrymlivaŭsia ŭ SIZA-1 u Minsku. 18 žniŭnia stała viadoma, što Siarhiej Cichanoŭski byŭ pieraviedzieny ŭ SIZA h. Žodzina.

U sakaviku Śledčy kamitet zaviaršyŭ rasśledavańnie kryminalnaj spravy ŭ dačynieńni da błohiera Siarhieja Cichanoŭskaha, lidara niezarehistravanaha abjadnańnia «Narodnaja hramada» Mikałaja Statkieviča i ich paplečnikaŭ.

Siarhieju Cichanoŭskamu pradjaŭlena kančatkovaje abvinavačańnie pa nastupnych artykułach Kryminalnaha kodeksa:

  • č. 1 art. 293 (arhanizacyja masavych biesparadkaŭ);
  • č. 3 art. 130 (raspalvańnie sacyjalnaj varožaści);
  • č. 2 art. 191 (pieraškoda pracy CVK);
  • č. 1 art.342 (arhanizacyja dziejańniaŭ, jakija hruba parušajuć hramadski paradak).
Клас
0
Панылы сорам
0
Ха-ха
0
Ого
0
Сумна
0
Абуральна
0