Pavieł Sieviaryniec byŭ zatrymany ŭ Minsku 7 červienia minułaha hoda. Paśla hetaha ŭ dačynieńni da jaho byli vyniesieny jak minimum try pastanovy ab administracyjnych aryštach za ŭdzieł u pieradvybarnych pikietach i zakliki da ŭdziełu ŭ masavych mierapryjemstvach.

Paśla 75 sutak administracyjnaha aryštu Paŭła Sieviarynca nie vypuścili na volu, a pieraviali ŭ SIZA №1 u statusie padazravanaha pa art.293 KK (Arhanizacyja masavych biesparadkaŭ).

Paźniej jamu było pradjaŭlena abavinavačańnie, a zaraz stała viadoma, što spravu ŭžo pieradali ŭ Mahiloŭski abłasny sud.

— Muž letam minułaha hoda prahnazavaŭ svoj aryšt i byŭ padrychtavany da jaho,  kaža Volha.  Uvohule pačynajučy sa studzienia 2020 hoda Paša paŭsiul chadziŭ z «tryvožnym čamadančykam», bo na im «visieli» 30 sutak aryštu za akcyi suprać intehracyi z Rasijaj. U čamadanie byli składzieny rečy pieršaj nieabchodnaści dla znachodžańnia ŭ Centry izalacyi pravaparušalnikaŭ.

Adnym słovam, jon viedaŭ, što jaho zatrymajuć, ale nie dumaŭ, što na taki praciahły termin.

Mierkavaŭ, što maksimum mohuć izalavać na pieryjad vybarčaj kampanii. Mahčyma, tak jano i było b, kali b nie akcyi pratestu paśla vybaraŭ. Tyja padziei, vidać, paŭpłyvali na toje, što Paŭła vyrašyli nie vypuskać na volu i «paviesili» na jaho kryminalny artykuł.

— Jak vam davodziłasia pieršym časam, kali zastalisia z małym synam biez padtrymki muža i baćki?

— Ščyra kažučy, salidarnaść biełarusaŭ prosta ŭraziła, padtrymka była vialikaja. Inšaja sprava, što psichałahična było vielmi składana ŭsprymać toje, što adbyłosia. Dumki byli takija: «Cełaje leta Pašy nie budzie! Jaho vypuściać tolki naprykancy žniŭnia. Jak pieražyć hety čas?!»

Ja bačyła, jak ludzi na voziery adpačyvajuć, kupajucca, śmiajucca, i pravodziła paraleli z tym, što muž praktyčna ŭsio leta adsiadzieŭ u karcary — ciomnym pamiaškańni biez voknaŭ. Spačatku emacyjna było składana heta ŭsprymać, ale čas išoŭ. Prajšło toje leta, a chutka budzie i hod, jak Paša znachodzicca za kratami. I zusim nie viadoma, kali jon naohuł vyjdzie na volu.

— Vy ŭspomnili pra salidarnaść biełarusaŭ… Ludzi dapamahali maralna, materyjalna?

— I toje, i toje adčuvałasia. Usio, što mnie było patrebna, umomant źjaŭlałasia. Ludzi pytalisia praz sacyjalnyja sietki: «Volha, skažycie, što vam patrebna? My chočam choć niečym dapamahčy». Navat u kvatery pastavili dla Franciška himnastyčnuju ścienku, chacia heta dla nas była nie reč pieršaj nieabchodnaści. Znajšli śpiecyjalistaŭ, u zručny dla nas čas usio zmanciravali.

Dapamahali pieravozić rečy, adzin chłopiec pastajanna nam robić biaspłatnuju dastaŭku praduktaŭ. Francišku stolki cacak nadaryli, što my ŭžo nie majem miesca, dzie ich składvać. Zaraz, kali da nas niechta prychodzić u hości, to Francišak hladzić na hetaha čałavieka i adrazu ŭ jaho pytajecca: «Dzie padarunak?» Mały ŭžo nie ŭsprymaje tych, chto prychodzić da jaho z pustymi rukami, nastolki jaho padarunkami razbeścili za hety čas.

Chacia ja razumieju, što ludzi z samymi ščyrymi pamknieńniami dapamahajuć.

— Za dziesiać z pałovaj miesiacaŭ vam tak i nie dazvolili nivodnaha razu sustrecca z mužam u SIZA?

— Pra heta navat i nie maryła, chacia, mahčyma, niekatoryja dumajuć, što spatkańnie z mužam — nie prablema. Uvohule, za ŭvieś čas, što Paša byŭ za kratami jašče raniej, apošni raz spatkańnie z rodnymi jamu dazvolili ŭ 1998 hodzie. Tady jon pieršy raz adbyvaŭ pakarańnie. Usie nastupnyja hady ŭ spatkańniach było admoŭlena.

Dziakuj Bohu, što ź vieraśnia adnaviłasia pierapiska z Paŭłam, chacia da hetaha byli peŭnyja prablemy. Tamu suviaź ź im tolki praź listy, a taksama praz advakata.

— Nakolki viadoma, advakat taksama nie ŭsio moža raspavieści.

— Tak, bo jana davała padpisku ab nierazhałošvańni peŭnaj infarmacyi. Jana navat nam, blizkim, nie moža ničoha raskazać. Advakat, darečy, i sama nie viedała, što jaje padabaronnaha źbirajucca pieravozić u Mahiloŭ i što sud budzie tam. Daviedałasia pra heta ad Paŭła.

Uvohule, usie razumiejuć, što sudovaje rašeńnie nasamreč budzie prymacca ŭ inšych kabinietach i paŭpłyvać na niešta niemahčyma. Sam Pavieł taksama dobra ŭśviedamlaje situacyju, a tamu ničoha nie padpisvaŭ i pakazańniaŭ nie davaŭ.

Darečy, nie tak daŭno ŭ adnoj dziaržaŭnaj haziecie prapahandysty dali infarmacyju pra spravu muža. Kali ja ŭsio pravilna zrazumieła, to sudzić muža buduć za toje, za što jon užo adsiadzieŭ,  za akcyi suprać intehracyi. Maŭlaŭ, heta była repietycyja budučych masavych biesparadkaŭ u krainie, ich jak byccam Paša i rychtavaŭ zahadzia.

— Što ŭ listach apošnim časam jon piša? Listy bolš sumnyja abo aptymistyčnyja?

— Apošnim časam my bolš abmiarkoŭvajem situacyju, kali Paša atrymaje vialiki termin. Heta nie vyklučana. Jak tady trymacca? Na što abapiracca? Pavieł rychtujecca da horšaha, ale viera ŭ lepšaje jaho ŭsio roŭna nie pakidaje.

Kaža, što hałoŭnaje apiryšča ŭ hetaj situacyi — Boh. Bolš ni na koha asabliva spadziavacca nie davodzicca.

Paša taksama dasyłaje roznyja malunki Francišku, bo apošnim časam syn chvareŭ, i muž jaho staraŭsia padtrymać.

— Jak Francišak pieranios chvarobu?

— Jamu stała drenna ŭ noč na Vialikdzień, i ŭžo zranku my byli ŭ špitali z prystupam łarynhitu i vielmi vysokaj tempieraturaj. A zatym užo pastavili dyjahnaz «pnieŭmanija». Ci to virusnaja, ci to bakteryjalnaja… Zaraz pastajanna saču za jaho stanam.

— 23 sakavika synu spoŭniłasia try hady…

— Dzień prajšoŭ u vielmi ŭtulnaj i ciopłaj abstanoŭcy, chacia, naturalna, što biez taty — heta nie toje. Pryjšli siabry małoha z baćkami, pavinšavali.

Fota Nadziei Bužan

Fota Nadziei Bužan

I ŭ hety dzień adbyłasia jašče adna davoli niezvyčajnaja historyja. Patelefanavała nieznajomaja žančyna Natalla i skazała, što choča pieradać Francišku padarunak ad Paŭła. I hety padarunak viečaram pryvieźli sa słovami «Heta tabie tata pieradaŭ». Naturalna, Paša pra heta ničoha nie viedaŭ, takuju inicyjatyvu prajaviła mienavita taja žančyna.

— U Franciška ŭžo prajaŭlajucca niejkija zdolnaści?

— Ja baču, što syn pajšoŭ u baćku, u jaho jość lidarskija jakaści. Pryhoža śpiavaje i navat traplaje ŭ noty, chacia raniej nie atrymlivałasia. Niania adznačaje, što Franak — davoli artystyčny chłopčyk.

Za toj čas, što tata za kratami, Francišak navučyŭsia malicca, što Pašu vielmi paradavała. Malitvu «Ojča naš» užo čytaje, jak darosły mužčyna.

— Pra tatu syn uzhadvaje?

— Apošnim časam usio mienš, chacia Paša jamu i razmaloŭki dasyłaje, i listy piša. Raniej Francišak pastajanna pytaŭsia «Kali tata vierniecca?», niešta ŭzhadvaŭ pra jaho. Zaraz, jak ni sumna, mienš.

Kali Pavieł byŭ na Akreścina, my z Franciškam vazili tudy pieradačy, i syn zapomniŭ toj budynak. Usim kazaŭ, što «tata ŭ biełym domie».

Zaraz u razmovach stała fihuravać turma, i ad syna praŭdu nie chavajem. Ale jon hetuju infarmacyju ŭsprymaje pa-svojmu i časam kaža tak: «Tata ŭ turmie hulaje ŭ mašynki».

— Nianiu vy daŭno dla syna znajšli?

 Nianiu znajšli niekalki miesiacaŭ tamu ŭ miežach prajekta telekanała «Biełsat» «Biełarus biełarusu». Jana prychodzić da nas nie vielmi časta, chacia Francišak jaje vielmi palubiŭ. Dapamoha, biezumoŭna, adčuvajecca, bo ŭ mianie źjaŭlajecca bolš volnaha času, kab niešta zrabić.

Syn navučyŭsia malavać, niania sprabuje jaho navučyć pisać słova «tata». Chacieli ŭžo vieści ŭ dziciačy sadok, ale ž zachvareli, a tamu da maja nie možam kantaktavać ź dziećmi. A tam, vidać, pačniecca sud nad Pašam, tamu taksama budzie nie da sadka.

 U Paŭła sa zdaroŭjem usio dobra?

— Paša  taki chłopiec, jaki pra svajo zdaroŭje paviedamlaje mienš za ŭsio, kab my nie chvalavalisia. Ale ŭ mianie jość adčuvańnie, što jon chvareŭ i sa zdaroŭjem ŭ jaho majucca prablemy.

Ja viedaju, što ŭ jaho chraničnyja hałaŭnyja boli, i ŭ izalatary, nakolki razumieju, lepš nie stanovicca. Ale muž pra heta ničoha nie piša, starajecca nas nie abciažarvać svaimi pakutami ŭ niavoli. Pavieł  vielmi mocny čałaviek, ja navat nie čakała, što nastolki mocny. Tamu pra jaho zdaroŭje my praktyčna ničoha nie viedajem.

— Što vy pieradajacie jamu ŭ SIZA?

— U staličnym izalatary jon znachodzicca apošnija dni, u bližejšy čas jaho pieraviazuć u Mahiloŭ. A raniej pieradavali zielaninu, harodninu, niejkija inšyja pradukty. Zaraz idzie pravasłaŭny post, tamu paprasiŭ miasa i sała nie dasyłać.

A voś materyjalnaj padtrymki nie prosić, pakolki dobrazyčlivyja biełarusy pieraličvajuć peŭnyja achviaravańni na rachunak, ź jakoha jon moža vykarystoŭvać hrošy na nabyćcio praduktaŭ u izalatary.

— U bližejšy čas adbudziecca sud nad Paŭłam, chacia data pakul nieviadomaja. Jakija ŭ vas prahnozy?

— Data pačatku pracesu na samaj spravie jašče nie ahučvajecca, chacia Paŭłu praciahnuli termin znachodžańnia pad vartaj da 7 maja. Mahčyma, da hetaha času i vyznačacca z pačatkam suda.

Što datyčycca maich prahnozaŭ i pradčuvańniaŭ… Maralna ja rychtujusia da horšaha, kab paśla rašeńnie suda nie stała mocnym udaram. A kali ŭsio budzie dobra, to niachaj heta stanie pryjemnym siurpryzam.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?