Dva novyja daśledavańni kažuć, što nasupierak raniejšym aściaroham, brytanski štam karanavirusa novaha typu nie pavialičvaje ciažar chvaroby. Ale pry hetym raspaŭsiudžvajecca jon lepš za astatnija raznavidnaści SARS-CoV-2. Artykuły z apisańniem daśledavańniaŭ apublikavali navukovyja časopisy The Lancet Infectouse Diseases i The Lancet Public Health.

Brytanskim štamam abo linijaj B. 1.1.7 nazyvajuć raznavidnaść karanavirusa, jakuju vydzielili ŭ pačatku śniežnia 2020 hoda ŭ Vialikabrytanii. Pieršyja śviedčańni jaho źjaŭleńnia datujucca vieraśniem taho ž hoda, a ŭ śniežni jon pačaŭ chutka raspaŭsiudžvacca pa krainie. Paśla jon trapiŭ i ŭ inšyja krainy: naprykład, u pačatku krasavika stała viadoma, što brytanski štam staŭ najbolš raspaŭsiudžanym u ZŠA.

Pavodle pieršych daśledavańniaŭ hetaj raznavidnaści, akramia zdolnaści chutka raspaŭsiudžvacca B. 1.1.7 moža adroźnivać i padvyšanaja śmiarotnaść pacyjentaŭ. Śpiecyjalisty praciahvajuć vyvučać nastupstvy zaražeńnia brytanskim štamam, kab zrazumieć, ci sapraŭdy jon bolš śmiarotny, a taksama kab vyśvietlić, ci abaraniajuć ad hetaj raznavidnaści vakcyny ad SARS-CoV-2, stvoranyja suprać inšych raznavidnaściaŭ virusa.

Aŭtary pieršaha daśledavańnia nazirali za žycharami Łondana, jakija pastupili ŭ dźvie haradskija kliniki pamiž pačatkam listapada i kancom śniežnia 2020 hoda. Tady vakcynacyja była jašče ŭ samym pačatku i ab brytanskim štamie nie było viadoma amal ničoha. Navukoŭcy analizavali kolkaść i skład virusnych čaścic z mazkoŭ pacyjentaŭ, a taksama simptomy, ź jakimi ŭ ich prachodziła infiekcyja. Usiaho ŭ rasparadžeńnie daśledčykaŭ trapili danyja ad 341 łondancaŭ.

Dola śmierciaŭ siarod pacyjentaŭ abiedźviuch hrup akazałasia supastaŭnaja (16% i 17%), taksama prykładna adnolkavy byŭ i ciažar simptomaŭ. Pry hetym pacyjentam z B. 1.1.7 čaściej pryznačali kisłarodnyja maski (44% suprać 30%), adnak, pa słovach daśledčykaŭ, heta moža być źviazana nie tolki ź ciažaram karanavirusnaj infiekcyi. Tamu hetuju prykmietu ŭ svaich vysnovach navukoŭcy nie ŭličvali.

Jašče adnym važnym adroźnieńniem pacyjentaŭ z brytanskim štamam była vialikaja virusnaja nahruzka: heta značyć kolkaść virusnych čaścic u ich kryvi.

Druhoje daśledavańnie achoplivała značna bolš udzielnikaŭ: kala 37 tys. čałaviek, jakija karystalisia dadatkam COVID Symptom Study ad kanca vieraśnia da kanca śniežnia 2020 hoda. Hety dadatak rekamiendavali ŭstalavać pacyjentam, jakija zarazilisia karanavirusam, kab raspaviadać ź jaho dapamohaj ab simptomach infiekcyi doktaru.

Akramia źviestak ab tym, jak siabie adčuvaŭ kožny pacyjent, dadatak pieradavaŭ i miesca, dzie jon znachodziŭsia. Takim čynam, u rasparadžeńni daśledčykaŭ apynuŭsia vialiki masiŭ danych, pa jakich, u paraŭnańni ź infarmacyjaj ab suadnosinach chvorych z B.1.1. 7 u kožnym rehijonie, možna było zrabić vysnovu ab suviazi pamiž ciažaram simptomaŭ i kolkaściu chvorych z brytanskim štamam.

Navukoŭcy nie vyjavili nijakaj statystyčna značnaj suviazi pamiž hetymi paramietrami: kali ŭ tym ci inšym rehijonie Anhlii, Šatłandyi abo Uelsa pavialičvałasia kolkaść pacyjentaŭ z brytanskim štamam, kolkaść vypadkaŭ uskładnieńniaŭ COVID-19 u hetym rehijonie nie pavialičvałasia i čaściakom źmianiałasia pa niezaležnaj zakanamiernaści. Nie akazałasia značnaj suviazi i pamiž kolkaściu pacyjentaŭ z B. 1.1.7 i ŭzroŭniem paŭtornaha zaražeńnia.

Adnak adnu suviaź navukoŭcy ŭsio-tki zaŭvažyli: akazałasia, što indeks repradukcyi — pakazčyk, pa jakim navukoŭcy miarkujuć ab chutkaści pašyreńnia taho ci inšaha virusa — u brytanskaha štama ŭ 1,35 razoŭ vyšejšy, čym u «standartnaha» karanavirusa.

Pa słovach navukoŭcaŭ, niahledziačy na ŭsio heta, z dapamohaj najaŭnych srodkaŭ lačeńnia indeks repradukcyi B. 1.1.7 možna źnizić. Akramia taho, suprać jaho, pavodle apošnich daśledavańniaŭ, dziejničajuć ŭsie viadomyja na dadzieny momant vakcyny.

Клас
0
Панылы сорам
0
Ха-ха
0
Ого
0
Сумна
0
Абуральна
0