24 śniežnia arcybiskup Tadevuš Kandrusievič viarnuŭsia ŭ Biełaruś i adrazu ž skiravaŭsia ŭ Apostalskuju nuncyjaturu ŭ Minsku, kab asabista vykazać padziaku za viartańnie Papu Francišku i jaho pradstaŭniku ŭ našaj krainie apostalskamu nuncyju Ante Joziču, paviedamlaje catholic.by.

«Jakija niespaścihalnyja prysudy Boha i niaźviedanyja šlachi Jahonyja!… Hetyja słovy śviatoha apostała Paŭła prychodziać na dumku, kali paśla amal što čatyroch miesiacaŭ prymusovaj adsutnaści i niemahčymaści ździajśniać pastyrskuju dziejnaść u Biełarusi ja narešcie znoŭ znachodžusia na radzimie. Va ŭzroście amal što 75 hadoŭ ja niečakana dla siabie apynuŭsia ŭ składanaj situacyi, jakuju ŭsprymaju jak čarhovy dośvied Božaha Providu i jak svoj žyćciovy kryž», — skazaŭ siońnia Tadevuš Kandrusievič

«Adnak śviet nie biez dobrych ludziej. Siońnia chaču vykazać hłybokuju padziaku ŭsim, chto mianie padtrymlivaŭ i maliŭsia ab chutčejšym viartańni ŭ hety nialohki čas vyprabavańniaŭ. A takich było šmat: znajomych i nieznajomych, vierujučych i niavierujučych, prosta ludziej dobraj voli»

Ijerarch padziakavaŭ Papie Francišku i Dziaržaŭnamu sakrataryjatu Śviatoha Pasadu. «Papa i jaho bližejšyja supracoŭniki kardynał Pjetro Paralin, arcybiskupy Poł Ryčard Hałachier i Antonio Mienini, a taksama apostalski nuncyj u Biełarusi arcybiskup Ante Jozič i Śpiecyjalny Pasłańnik Pantyfika arcybiskup Kłaŭdyjo Hudžeroćci prykłali šmat namahańniaŭ dla stanoŭčaha vyrašeńnia prablemy majho viartańnia ŭ Biełaruś z Polščy», — skazaŭ Tadevuš Kandrusievič

Taksama jon padziakavaŭ biskupam Juryju Kasabuckamu i Alaksandru Jašeŭskamu, śviataram, kansekravanym asobam i viernikam za namahańni i malitvy ŭ intencyi majho chutčejšaha viartańnia.

«Z udziačnaściu prymaju rašeńnie dziaržaŭnych uładaŭ, jakoje dazvoliła viarnucca na radzimu i zajmacca duchoŭnym kiraŭnictvam daručanymi majoj pastyrskaj apiecy viernikami. Svajo słužeńnie nastupnika apostałaŭ u Biełarusi pryśviačaŭ, pryśviačaju i budu pryśviačać duchoŭnamu adradžeńniu i ŭmacavańniu viery ŭ majoj Baćkaŭščynie, a taksama kansalidacyi našaha hramadstva šlacham mirnaha vyrašeńnia prablem, jakija ŭźnikajuć», — skazaŭ jon..

***

A 19-j i 21-j hadzinie Tadevuš Kandrusievič adpravić śviatočnyja pieradkaladnyja słužby.

Nahadajem, što 31 žniŭnia Kandrusieviča nie puścili ŭ Biełaruś, kali jon viartaŭsia z Polščy. Paźniej Łukašenka skazaŭ, što ijerarch atrymlivaŭ u Polščy instrukcyi. 22 śniežnia Uładzimir Makiej zajaviŭ, što Łukašenka daručyŭ znajści vyrašeńnie situacyi. U toj ža dzień pasolstva Vatykana atrymała infarmacyju ab adsutnaści pieraškod dla viartańnia ŭ Biełaruś.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?