17-hadovy Maksim Babič — samy juny palitviazień. Jaho razam z pryjacielem asudzili za pierakryćcie darohi ŭ Sierabrancy i patasoŭku z kiroŭcam i pasažyram adnaho z aŭto (jakuju apošnija, kali vieryć pakazańniam u sudzie, i zaviazali). Maksimu dali try hady chatniaj chimii i vyzvalili ŭ zale pasiadžeńnia.

U kalidory jaho čakali siabry i siamja. Mama Iryna nie zmahła strymać śloz: jana narešcie abniała syna, jakoha nie bačyła ŭžo dva miesiacy.

Napiaredadni pasiadžeńnia «Naša Niva» pahutaryła ź joj — pra Maksima, jaho prablemy z sercam i aryšt.

Maksimu tolki ŭ žniŭni spoŭniłasia 17. Jon vučycca na druhim kursie Minskaha dziaržaŭnaha aŭtamiechaničnaha kaledža. Pastupiŭ tudy paśla 9 kłasa, bo vielmi cikavicca aŭtamabilami i choča źviazać svajo žyćcio ź ich dyzajnam i ramontam.

Ź dziacinstva chłopiec zajmaŭsia sportam. Baraćba, dziudo, taekvando… Paśla pierajšoŭ na akademičnaje viesłavańnie — byŭ adpaviedny ciełaskład dla hetaha vidu sportu. Pasprabavaŭ siabie, pakazaŭ dobryja vyniki. Ale praz prablemy z sercam prafiesijny sport daviałosia pakinuć.

«U Maksima parok serca. Prablemy pačalisia va ŭzroście 10 hod. A ŭ 12, kali syn staŭ prafiesijna zajmacca viesłavańniem, my prajšli surjoznuju kamisiju i daviedalisia pra dakładny dyjahnaz. Apieracyj nie było, ale vielmi doŭha lačylisia. Maksimu byli supraćpakazany vialikija nahruzki, stres. Ciapier, kažuć, užo pačaŭ heta pierarastać, stan palepšyŭsia — upieršyniu ŭ jaho byli niadrennyja pakazčyki UHD. Ale stresu ŭsio adno treba paźbiahać.

Kali jaho aryštavali, ja pisała prašeńnie prakuroru, kab synu zamianili mieru strymańnia na chatni aryšt, bo niepaŭnaletni, z sercam jość prablemy. Pisała, što ŭ nas dobraja siamja, budziem za im sačyć. Ale nam admovili», — raskazvała Iryna.

Maksim ros u siamji vajskoŭca i zaŭsiody chacieŭ być u Biełarusi, pieražyvaŭ za krainu, niahledziačy na juny ŭzrost.

«Zvyčajny chłopiec, sumlenny, spraviadlivy, — apisvaje jaho mama. — Jamu kryŭdna było, što z kožnym hodam nam składaniej stanovicca žyć. Staŭ bolš pahłyblacca ŭ hetu temu apošni hod. Kazaŭ, što treba štości źmianiać. Kaniečnie, u siłu svajho ŭzrostu nie zusim razumiejučy, jak i što, moža być».

Maksima zatrymali 19 kastryčnika, kali jon rankam vychodziŭ na zaniatki ŭ kaledž. Supracoŭniki čakali jaho kala kvatery. Chłopiec paśpieŭ nabrać baćku — skazać, što jaho zabirajuć.

Studenta advieźli na Akreścina, a praz try dni baćki daviedalisia pra kryminalny artykuł. Da suda Maksim znachodziŭsia pad vartaj u SIZA Žodzina. Užo pierad pasiadžeńniem jaho pieravieźli na Vaładarku.

«Syn pisaŭ listy. Ja pytałasia ŭ jaho pra ŭmovy, ale jon adkazvaŭ: mama, ja ničoha nie mahu raskazać, bo čytajuć. Pisaŭ, kab nie pieražyvała, bo ŭsio narmalna. Ale što narmalna? Nie viedajem», — raskazvała Iryna.

Maksim prasiŭ pieradavać jamu knihi — mastackuju litaraturu, u asnoŭnym kłasiku. Ale čamuści ničoha nie dachodziła.

Iryna dzielicca, što mnohija ludzi adhuknulisia na ich biadu. Praduktovuju dapamohu akazali, hrošy na advakata pieradali.

U kaledžy Maksim jašče ličycca studentam. Praŭda, nie zrazumieła, ci nadoŭha.

«Za syna vielmi chvalujucca vykładčyki, ale kiraŭnictva sprabuje jaho adličyć, šukajuć padstavy dla hetaha. Admaŭlajuć nam u pradaŭžeńni adterminoŭki pa płaciažy, bo Maksim płatna vučycca», — kaža Iryna.

Hety viečar jany narešcie praviaduć doma ŭsioj siamjoj.

Čytajcie taksama:
Volzie Kłaskoŭskaj prysudzili 2 hady kałonii za pierakrytuju darohu ŭ Sierabrancy

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?