Cieła žančyny znajšli 15 śniežnia na składzie miascovaha zavoda hazavaj aparatury.
Irynie (imia źmienienaje) było 36 hadoŭ. Jana skončyła Hrodzienski ahrarny ŭniviersitet, paśla bolš za 12 hadoŭ adpracavała na miascovym zavodzie kładaŭščycaj.
Ciapier u Navahrudku chodziać čutki, što žančyna skončyła žyćcio samahubstvam praz prablemy na pracy.
Siamja Iryny heta paćviardžaje.
«Toje, što kažuć — praŭda. U jaje na składzie źjaviłasia niastača: źnikli niekalki ton paraškovaj farby, chtości z načalstva staŭ pahražać joj kryminałkaj. Iryna pakinuła vialikuju zapisku, dzie ŭsio padrabiazna tłumačyć, — raspavioŭ «Našaj Nivie» muž žančyny. — Jana tłumačyć, što prablema źviazanaja z parušeńniem techpracesaŭ. Jość dakumient, dzie skazana, što taŭščynia farby na bałonach pavialičanaja ŭ razy. Słoj farby na vyrabach muści składać 60-100 mikron. A na vyrabach realna było 160-230 mikron. To-bok, vina na vytvorčaści, a nie na składzie. I za hety pieraraschod musili adkazvać absalutna inšyja ludzi.
Žonku tuzali na toj pracy i na abiedzie, i haniali na pracu pa vychodnych. Ale jana nie chacieła padstaŭlać ludziej, jakija pracujuć, vychodziła.
A hetuju niastaču jana sama i zaŭvažyła. Pačała vyśviatlać pryčynu — vyśvietliłasia, što byŭ pieraraschod na vytvorčaści. Ale strełki pieraviali na skład.
Dakładniej ja zmahu skazać, kali pieračytaju jaje zapisy».
Muž pracuje dalnabojščykam, pra śmierć žonki daviedaŭsia ŭ Varoniežy — byŭ u rejsie.
«Jana mnie ničoha nie kazała, usio nasiła ŭnutry, u sabie. Kab jana choć słova mnie skazała pra svaje prablemy, to ja harantuju, što nie dazvoliŭ by, kab adbyłosia toje, što adbyłosia, — narakaje mužčyna. — Ciapier ja ŭžo razumieju, što jana bajałasia mianie tryvožyć, kab ja nie niervavaŭsia ŭ darozie. Ale i razumieju, što byli niejkija momanty, na jakija treba było źviarnuć uvahu. Banalna manikiur: u jaje zaŭsiody byŭ akuratny śvietły manikiur, a tut za tydzień da ŭsiaho jana raptam pafarbavała paznohci ŭ čorny. Mnie nie spadabałasia, ale ja navat nie paśpieŭ pahavaryć ź joj pra heta: jechaŭ ź Jeŭropy na Rasiju, namahaŭsia zarabić hrošaj pierad Novym hodam, usioj siamji kupić dobryja padarunki… Zajechaŭ dadomu litaralna na dzień i dalej pajechaŭ… Chacia treba było spynicca…»
U Iryny zastałasia niepaŭnaletniaja dačka.
«Žonka ŭ apošnim liście prasiła vyhadavać dačku dobrym čałaviekam», — kaža muž.
Pachavali Irynu 18 śniežnia.
«Śledčyja Navahrudskaha rajonnaha adździeła Śledčaha kamiteta pravodziać pravierku pa fakcie śmierci miascovaj žycharki», — paviedamili partału «Anłajnier» u SK Hrodzienskaj vobłaści.
