U internecie źjaviŭsia aŭdyjazapis narady va ŭpraŭleńni Ministerstva pa nadzvyčajnych situacyjach pa Viciebskaj vobłaści, pryśviečanaj baraćbie ź biełaruskaj nacyjanalnaj simvolikaj.
Supracoŭnikaŭ MNS mabilizujuć na pošuk bieł-čyrvona-biełych ściahoŭ i pratesnych hrafici.
Kiraŭnikoŭ rajonnych adździełaŭ MNS instruktujuć nie tolki tamu, dzie i jak treba šukać ściahi, ale i nastojliva patrabujuć paviedamlać u milicyju, jak tolki bačać simvoliku ŭnutry kvatery, damoŭ i bałkonaŭ. Havorycca pra toje, što rejdy pa pošuku simvoliki pavinny adbyvacca štodzionna, a spravazdačy ŭ Minsk pra kolkaść vyjaŭlenaj simvoliki i pryniatyja miery buduć vysyłacca dvojčy na dzień.
Bolš za ŭsich na naradzie vystupaje čałaviek z hołasam, padobnym da hołasu načalnika Viciebskaha abłasnoha ŭpraŭleńnia MNS Mialeškina Siarhieja Mikałajeviča. «Niahledziačy na toje, što heta pieršy dzień majho adpačynku, vyrašyŭ voś tak jaho pravieści», — kaža jon.
«Šerah hramadzian dazvalaje sabie parušać zakanadaŭstva, raźviešvajučy na šmatkvaternych damach, na voknach roznuju važnuju dla ich simvoliku, tym samym źnižajučy procipažarny režym, jaki skłaŭsia na dadzienych budynkach…» — kaža jon.
«Siońnia heta asnovatvornaja zadača, — try razy paŭtaraje jon. — Heta pačatak pačatkaŭ».
Udzielniki narady tut ža sami sabie piarečać.
Praz chvilinu jany ŭžo zabyvajuć pra «źnižany procipažarny režym», a havorać pra «spakoj» i «nadpisy».
«Pravodzim rejdy pa ŭsich nasielenych punktach rehijona z metaj vyjaŭleńnia niedziaržaŭnaj simvoliki, — praciahvaje čałaviek, jakoha pradstavili jak «Andrej Uładzimiravič». — Pry vyjaŭleńni prymajem miery pa jaje źniaćci z vykarystańniem usich najaŭnych sił i srodkaŭ. Heta moža być visieć nie tolki pałatno, ale moža być napisana, namalavana farbaj, tamu vykarystoŭvajem łakafarbavyja materyjały dla zamaloŭvańnia hetych usich niedziaržaŭnych simvałaŭ».
Načalniki MNS nastojliva, try razy, zahadvajuć infarmavać milicyju pra kožnuju sprobu ludziej pieraškodzić źniščeńniu nacyjanalnaj simvoliki.
Udzielnikam narady niekalki razoŭ padkreślivajuć, što heta «pieršačarhovaja zadača» dla MNS. Čałaviek z hołasam, padobnym da Mialeškina, adznačaje, što «najhoršaja» situacyja z «hetym» u Navapołacku, Viciebsku, Oršy i Lepieli.
«Chodziać, kryčać pad voknami, piajuć pieśni… Čamu ja nie mahu spakojna spać? — tak abhruntoŭvaŭ patrebu ŭ «žorstkaj» baraćbie z nacyjanalnaj simvolikaj jon. — Čamu ja nie mahu vyjści i, milicyja nie daje rady, sam razabracca ź imi? A ŭžo ŭ mianie takoje žadańnie jość».
«Jość zadača, heta asnoŭnaja zadača, uvajści va ŭzajemadziejańnie, ščylnaje ŭzajemadziejańnie z kiraŭnikami adździełaŭ unutranych spraŭ, my vam pra heta kazali jašče ŭ subotu», — havorać u aŭdyjazapisie.
Asobna jon razdražniona spyniajecca na tych bajcach i aficerach, jakija «viaduć razmovy» krytyčnaha charaktaru i niedvuchsensoŭna namiakaje, što ich buduć zvalniać.
Miarkujučy pa tym, što aŭdyjazapis źjaviŭsia ŭ internecie, nie ŭsie ŭ MNS moŭčki pahadžajucca z prymusam udzielničać u palityčnym pieraśledzie hramadzian.
