Karanavirus mocna ŭdaryŭ pa finalistach konkursu animacyjnych prajektaŭ, jaki ładziŭsia ŭ ramkach rasijskaha fiestyvalu «Kinaproba». Ahułam było 10 finalistaŭ, ale dźvie dziaŭčyny pamierli, a jašče troje nie vychodziać na suviaź. Pra heta napisaŭ svajoj šmattysiačnaj aŭdytoryi šef-redaktar studyi «Sajuzmultfilm» Siarhiej Kapkoŭ.
Siarhiej Kapkoŭ — heta taki čynoŭnik novaha vieku, jakim doŭhi čas zachaplalisia rasijskija libieralnyja koły. Jon rekanstrukcyjavaŭ park Horkaha ŭ Maskvie — i imhnienna zrabiŭ jaho papularnym. Tady Kapkova pieraviali na pracu ŭ meryju, dzie jon zaniaŭsia parkami, teatrami, biblijatekami. Jaho reformy haradskoj prastory byli pryznanyja paśpiachovymi. Hety čałaviek maje koła prychilnikaŭ, jakija jamu daviarajuć.
Tamu ŭ kranalnuju historyju pra śmierć dźviuch multyplikatarak taksama pavieryli.
«Adna ź dziaŭčynak — 21-hadovaja Šura Hrušyna — pamierła. Jaje baćka źbiraŭsia ŭdzielničać zamiest jaje, u pamiać pra jaje. Čamuści pierastaŭ vychodzić na suviaź, mabyć, uśviadomiŭ, što sensu ŭ hetym užo nijakaha niama… Ale ŭ dzień pitčynhu, ranicaj, vyśvietliłasia, što zaraza zabrała žyćcio jašče adnoj junaj talenavitaj dziaŭčyny — 26-hadovaj Natašy Malhinoj. Statystyka žachlivaja!!! Ja ŭžo maŭču, što z tryma astatnimi chvorymi suviaź taksama źnikła, telefony adklučanyja, na listy nie adkazvajuć. Vielmi chočacca vieryć, što prosta pieradumali.
21-hadovaja Šura Hrušyna i 26-hadovaja Nataša Malhina
Jašče raz: piać ź piatnaccaci čałaviek u roznych kancach krainy! Dvoje pamierli. Troje — nieviadoma… Maładyja, metanakiravanyja, talenavityja! Kali łaska, bieražycie siabie! Heta strašna… Nu i pahladzicie na hetych dziaŭčynak, jakija maryli pryśviacić svajo žyćcio samamu dobramu z mastactvaŭ…» — hetyja słovy Kapkova łajkali i repościli tysiačy čałaviek.
Žurnalisty stali šukać padrabiaznaści historyi i zrazumieli, što situacyja vyhladaje dziŭnaj — ludziej z takimi imionami prosta nie isnuje. Kapkovu stali namiakać, što jon, mahčyma, raspaŭsiudžvaje fejk.
Ale jon u adkaz tolki aburaŭsia. «Jakoje ž dno, kali tvoj post nabiraje bolš za 200 kamientaŭ i bolš za tysiaču reakcyj. Adna niepaŭnavartasnaja napisała, što ja vyrašyŭ chajpanuć. Barani, Boža!»
Tym časam siekcyja animacyjnych prajektaŭ na fiestyvali pačałasia z chviliny maŭčańnia ŭ pamiać pra Šuru i Natašu.
Žurnalisty pieciarburhskaha vydańnia «Fantanka» praciahvali šukać infarmacyju i vyjavili, što nabor piersanažaŭ z zajaŭki Malhinoj całkam supadaje z hierojami komiksa inšaj mastački. Zajaŭka Hrušynaj śpisanaja ź siužetu jašče adnaho aŭtara. Akazałasia, što i tym, i tym prajektam niekali cikaviŭsia multyplikatar ź Lipiecka Dźmitryj Zarnicki.
Jon pracuje sacyjalnym piedahoham u domie sastarełych, žyvie z maci, ale maryć pra tvorčaje pryznańnie i hrošy. Tamu jon adpraviŭ na konkurs i zajaŭku ad svajho imia, i niekalki falšyvych. Zaduma była takaja — mahčyma, «čužyja» prajekty vyjhrajuć, i jon atrymaje ŭznaharodu anłajn. Kali ž padčas vyśviatleńnia abstavinaŭ žury vykinie hetyja prajekty z šort-lista, to kankurencyja źmienšycca. Jaho zaduma ŭ niečym spracavała — naprykład, u konkursnaj siekcyi jaho falšyvyja zajaŭki atrymali 7 z 10 miescaŭ.
Piać prydumanych im čałaviek (dvoje «pamierłych» i troje «źnikłych») byli składzienyja z kavałkaŭ bijahrafij i zdymkaŭ jaho znajomych. Jašče adnu zajaŭku Zarnicki adpraviŭ prosta ad imia siabra. Jon i nie zdahadvaŭsia, što situacyja nastolki vyjdzie z-pad kantrolu.
Daviedaŭšysia ad «Fantanki» abstaviny historyi, arhanizatary konkursu byli ŭ šoku. Jany vyrašyli nie davać lipieckamu multyplikataru navat dypłom udzielnika.
