Zakryćcio (dakładniej, surjoznaje prykryćcio) miažy dakładna nie źviazana z karanavirusam, choć aficyjna fihuruje mienavita hetaja pryčyna, piša analityk Andrej Jelisiejeŭ. Voś čamu:
— Uviedzieny pastanovaj 30 kastryčnika režym ujezdu ŭ krainu i tak hranična minimizavaŭ źniešnija infiekcyjnyja ryzyki. Ujezd u krainu dazvalaŭsia abmiežavanym katehoryjam zamiežnikaŭ tolki praz aeraport, a biełarusaŭ abaviazali vykonvać 10-dzionny karancin pa prybyćci z mnohich krain.
— Niadaŭniaje daśledavańnie vyjaviła, što zamiežnyja krainy dla biełarusaŭ — samaje małavierahodnaje (paru % vypadkaŭ) mierkavanaje miesca zaražeńnia karanavirusam. Zaražeńni ŭ carkvie, spartzale, paliklinicy, kramie, u hramadskim transparcie, a tym bolš na pracoŭnym miescy adbyvajucca šmatkroć čaściej. Heta łahična: miežy i tak daŭno prykrytyja na ŭjezd, i ŭsplosk epidemii ŭ Biełarusi ciapier vynikaje ź niedastatkovych i zapoźnienych mier, uviedzienych unutry krainy.
— Navat kali b była prablema va ŭjeździe vialikaj kolkaści inficyravanych ludziej, to pastanova nie źmiaščała b drakonaŭskuju mieru ab vyjeździe pa pracy, vučobie abo z dazvołam na žycharstva tolki raz na paŭhoda(!).
Heta pastanova ŭkaraniaje novyja elemienty nadzvyčajnaha stanovišča bieź jaho farmalnaha ŭviadzieńnia. Realnyja ŭnutrypalityčnyja matyvy prykryćcia miažy:
1. Uvieści bolš pilny kantrol za pieramiaščeńniem hramadzian, asabliva asobnych ich katehoryj. U tym liku pieraškoda evakuacyi viertykalščykaŭ i siłavikoŭ, jakija mahli b patencyjna adkałocca, i členaŭ ich siemjaŭ. Rezkaje skaračeńnie mihracyjnych patokaŭ dazvolić pravodzić bolš piedantyčny piersanalny kantrol na miažy.
Siudy ž adnosicca sproba pieraškodzić kryminalnym pracesam u sudach zamiežnych dziaržaŭ u ramkach univiersalnaj jurysdykcyi. Biełaruskija ŭłady ŭpieršyniu sutyknulisia z hetym fienomienam i aścierahajucca mahčymych nastupstvaŭ. Kali takim čynam buduć zasudžanyja (choć by zavočna) kankretnyja biełaruskija siłaviki, to inšyja rezka zadumajucca. Ułady žadajuć maksimalna ŭskładnić vyjezd inšych paciarpiełych i śviedak ź Biełarusi, kab apiaredzić pracesy, padobnyja da taho, jaki ŭžo startavaŭ u Litvie.
2. Płany ŭzmacnić kantrol za ekanamičnaj dziejnaściu biełarusaŭ. Padobna da ekanamičnaj pryčyny, ale ŭ realnaści bolš palityčnaja. Łohika nastupnaja: užo zanadta šmat niezaležnych ad dziaržavy asob raźviałosia; biełarusy pavinny kapiejku zarablać chaj sabie ŭ kałhasie i mieć chleb-małako (časam miasa) nakarmić siamju. A nie žyravać na schiemach z pamiežnym handlem i cyrkularnaj mihracyjaj, dy jašče lišniaj kapiejkaj dzialicca z usialakimi fondami salidarnaści.
Možna było b taksama padumać, što ŭłady zakłapočanyja adtokam śpiecyjalistaŭ IT-śfiery, miedycynskaj haliny i inšych. Treba ž kamuści ekanamičny rost zabiaśpiečvać i ludziej lačyć. Ale hetaja pryčyna nie hałoŭnaja, tym bolš kali havorka pra «buntaŭnikoŭ», chaj sabie i najlepšych u śviecie śpiecyjalistaŭ. Im adviedzienyja 10 dzion na zbory.
3. Akramia hetaha, na rašeńnie mahła paŭpłyvać pierakručanaja łohika procidziejańnia adklučeńniu Biełarusi ad SWIFT. Maŭlaŭ, na fonie hranična abmiežavanych mahčymaściaŭ fizičnaha pieramiaščeńnia Zachad i biełarusy padumajuć dvojčy nakont abryvu suviazi ź mižnarodnaj mižbankaŭskaj sistemaj.
