U Breście raptoŭna pamior 42-hadovy aktyvist Raman Rašecki. U jaho siamji zastałosia čaćviora dziaciej.
Raman Rašecki ŭ centry
«Što dakładna stała pryčynaj śmierci, my nie viedajem. Učora jon byŭ doma. Žonka pajšła spać, Roma vyjšaŭ na bałkon, dzie było miesca dla dziaciej: matrac lažaŭ, cacki. Jon pryloh — i ŭsio, bolš nie pračnuŭsia», — raskazaŭ «Našaj Nivie» blizki siabar siamji Daniił.
«Ja bačyŭ cieła Ramana: niama nijakich śladoŭ źbićcia. Ale paśla śmierci pasinieli huby i ruki — mahčyma, pryčynaj stała serca. Ale kazać štości dakładna možna budzie tolki paśla ŭskryćcia», — kaža Daniił.
Rašecki dałučyŭsia da hramadska-palityčnaha ruchu za pieramieny ŭ 2020 hodzie, padtrymaŭ Siarhieja Cichanoŭskaha i jaho prajekt «Kraina dla žyćcia».
Pieršy raz Rašecki byŭ zatrymany 30 žniŭnia paśla niadzielnaha maršu ŭ Breście, atrymaŭ 15 sutak źniavoleńnia. Paśla vyzvaleńnia nie atrymaŭ nazad svoj bieł-čyrvona-bieły ściah, patrabavaŭ ad milicyi viarnuć jaho, za što byŭ zatrymany paŭtorna.
Apošni raz Rašeckaha zatrymlivali ŭ minułuju niadzielu, praz try dni jon vyjšaŭ na svabodu, piša «Bresckaja hazieta».
«Jon ža byŭ vielmi aktyŭnym: vychodziŭ sa ściaham, vykazvaŭ svaju palityčnuju pazicyju. I apošnim časam nie pracavaŭ — nie mieŭ mahčymaści, bo pastajanna davali sutki, — kaža Daniił. — Akramia taho, Romu vypisvali i kuču štrafaŭ: ja zaraz hladžu kvitancyi, tam štrafaŭ na 4 tysiačy rubloŭ z kapiejkami.
Roma nie mieŭ hrošaj apłačvać ich. Praz heta pazaŭčora da jaho pryjechali apisvać majomaść — ladoŭniu, televizar, jašče niejkuju pobytavuju techniku».
Rašecki raniej pracavaŭ ryjełtaram u ahienctvie nieruchomaści. Apošni čas nie mieŭ pracy.
Viadoma, što Raman byŭ kaliści sudzimy za zabojstva. «Roma mnie tłumačyŭ heta: kazaŭ, što pryjšłosia ŭziać vinu na siabie, kab nie dali «hrupavoje» i, adpaviedna, bolšy termin. Jon klaŭsia, što sam nie ŭdzielničaŭ u zabojstvie. Ale adsiadzieŭ 14 hadoŭ. Vyjšaŭ daŭno, kala 10 hadoŭ tamu», — kaža siabar.
U kvatery Rašeckaha ŭ Breście byŭ vystaŭleny bieł-čyrvona-bieły ściah