Kaliści jon byŭ palitykam, inšym razam pradstaŭlajecca palitolaham, a zusim niadaŭna — virusolaham. Jon rehularna vystupaje ŭ navinovych i publicystyčnych prahramach dziaržaŭnaha telebačańnia Biełarusi, piša «Radyjo Svaboda».

Jon raspaviadaje pra toje, jak karanavirus — heta vydumka, pra toje, jak falsyfikavalisia vybary ŭ ZŠA i jak Džordž Soras arhanizavaŭ antyŭradavyja pratesty ŭ Baŭharyi i Biełarusi. Dokazaŭ hetych abvinavačvańniaŭ moža i nie być, ale dla Płamena Paskava zaŭsiody jość efir na kanale «Biełaruś 1».

Pra baŭharskaha hramadzkaha dziejača Płamena Paskava, jaki rehularna źjaŭlajecca na biełaruskim telebačańni, raspaviadaje baŭharskaja słužba «Radyjo Svaboda».

Jaho pieršy vystup na «Biełaruś 1» adbyŭsia 14 žniŭnia sioleta. Potym Paskaŭ źjaviŭsia ŭ piatničnym ahladavym žurnalisckim šoŭ «Panarama». Baŭharyn byŭ pradstaŭleny jak viadomy palityk.

Paskaŭ sapraŭdy mieŭ dačynieńnie da palityki. U 2015 hodzie jon byŭ kandydatam u mery ad prarasiejskaj partyi «Ataka» ŭ rodnym Dzimitraŭhradzie. Praz hod jon byŭ niezaležnym kandydatam u prezydenty Baŭharyi, tady jon zajaŭlaŭ, što kraina znachodzicca pad «źniešnim kalanijalnym kiravańniem», nazyvaŭ ZŠA «akupantam».

Na vybarach jon nabraŭ 10 103 hałasy, što dało jamu 0,26%.

Jon tłumačyŭ u efiry biełaruskaha telebačańnia, jak «źniešnija siły» arhanizavali akcyi pratestu ŭ Biełarusi i Baŭharyi. Pa słovach Paskova, «lalkavody» naŭmysna karystalisia adnolkavymi technalohijami: try žančyny byli symbalem pratestu ŭ Biełarusi, a try mužčyny — liderami pratestu ŭ Baŭharyi.

Potym Paskaŭ źjaviŭsia na biełaruskim telebačańni 5 vieraśnia, kali jon kazaŭ, što biełarusaŭ ničoha dobraha nie čakaje, kali jany vyrašać pajści ŭ Eŭraźviaz, jak heta zrabiła Baŭharyja.

26 kastryčnika na BT jon davodziŭ, što ŭ Biełarusi niama ŭmovaŭ dla «kalarovaj revalucyi». 2 listapada Paskaŭ iznoŭ papiaredžvaŭ biełarusaŭ na biełaruskaj televizii, što na eŭrapiejskim šlachu raźvićcia Biełarusi pahražaje «źniščeńnie pramysłovaści ŭ formie pryvatyzacyi», i znoŭ pryvioŭ Baŭharyju ŭ prykład. U hetych vystupach jon byŭ pradstaŭleny jak palitolah.

Apošni ŭdzieł Paskava ŭ pieradačy «Biełaruś 1» — 11 listapada, u hetym raz jon užo byŭ pradstaŭleny jak virusolah, jon davodziŭ, što druhaja chvala COVID-19, jak i pieršaja, — heta dezinfarmacyja.

Jakaja z usich hetych charaktarystykaŭ słušnaja?

Płamen Paskaŭ — veterynarny ŭrač, jaki naradziŭsia ŭ Dzimitraŭhradzie, dzie da hetaha času maje ofis. Sam jon kaža, što hadami pracuje na rasiejskim rynku, dzie raspracavaŭ «veterynarnaje prahramnaje zabieśpiačeńnie».

Adnak u palitycy jaho sproby nie mieli pośpiechu. U 2019 hodzie jon uniesieny ŭ śpis partyi «Adradžeńnie» ŭ jakaści kandydata ŭ deputaty Eŭraparlamentu. Tady partyja nabrała krychu bolš za 20 tysiačaŭ hałasoŭ, što składaje 1,04%.

U Paskava jość papularny kanał na YouTube, jaki maje dziasiatki tysiačaŭ padpisčykaŭ. Jon krytykuje miery, jakija ŭłady prymajuć suprać karanavirusu, krytykuje apazycyju ŭ Biełarusi, padtrymlivaje mierkavańni Donalda Trampa nakont falsyfikacyjaŭ na amerykanskich vybarach.

Клас
Панылы сорам
Ха-ха
Ого
Сумна
Абуральна