Sustreča adbyłasia jašče 18 listapada, pra heta Juryj Vaskrasienski raskazaŭ «Našaj Nivie».
Eduard Babaryka. Fota Voli Aficeravaj
«Heta adbyłosia z dazvołu śledčych orhanaŭ. Ja napisaŭ chadajnictva ŭ śledčaje ŭpraŭleńnie KDB, i jano było zadavolena. Eduard byŭ u dobrym humory, dobra vyhladaŭ.
Ja paviedamiŭ jamu, što zajmajusia pytańniem źmianieńnia jamu miery strymańnia. Bolš za miesiac tamu ja padaŭ adpaviednaje chadajnictva ab źmianieńni miery dla Viktara i Eduarda Babarykaŭ na chatni aryšt pad maju paruku», — raskazvaje Juryj.
Viziciora cikaviła, ci nie budzie Eduard suprać, kab toj zajmaŭsia hetaj spravaj. Vaskrasienski kaža, što admoŭnaha adkazu nie atrymaŭ. Ahułam sustreča doŭžyłasia kala hadziny. Paśpieli abmierkavać i hramadska-palityčnyja temy.
«Jon pytaŭsia, što adbyvajecca «za ścienami», ja raskazaŭ pra niaspynnyja vychady ludziej na vulicy pa niadzielach, raskazaŭ pra naš «kruhły stoł», — kaža Vaskrasienski.
Ci stavilisia pierad Eduardam niejkija ŭmovy dla taho, kab jon moh vyjści ź SIZA? «Ja asabista nikomu takich umoŭ nie staviŭ. Jakija ŭmovy stavić śledstva? Heta ŭžo pytańni da samoha śledstva i abvinavačanych».
Juryj Vaskrasienski. Fota Nadziei Bužan
Vaskrasienski kaža, što mocna zasmuciŭsia praź niadaŭniaje vykazvańnie Paŭła Łatuški pra toje, što Viktar i Eduard Babaryki chutka mohuć być na voli.
«U pahoni za palityčnym chajpam mnohija nie razumiejuć, što peŭnyja rečy treba rabić u cišyni. Chajpavać užo možna potym, kali ŭsio heta realizavałasia. Łohika našaj ułady takaja, što jana ničoha nie robić pad prymusam. Kali idzie cichi praces pa vyzvaleńni Eduarda Babaryki, a tut vyłazić niejki apazicyjny dziejač, jaki kaža, što chutka Eduard Babaryka pavinien być na voli, to z łohiki ŭładaŭ hety praces moža adrazu spynicca.
Hety praces, jaki byŭ zapuščany i ŭžo išoŭ da łahičnaha vyrašeńnia, rezka zatarmaziŭsia. Heta vielmi dalikatnaja tema, i treba razumieć uzrovień adkaznaści, kali ty pra niešta kažaš».
«Eduard trymajecca dobra, kaža, što ciažka łajdačyć. Jon čytaje šmat knih, pieradaje ŭsim pryvitańnie, ni ab čym nie škaduje. Ale pakolki jon čałaviek aktyŭny, to jamu ŭ hetych čatyroch ścienkach ciažka znachodzicca biez aktyŭnaj dziejnaści. Adzinaje, što ratuje i adciahvaje, — heta knihi i pierapiska», — raskazvaje Juryj.
«Nakolki ja viedaju, Łaŭroŭ nie padymaŭ pytańnie ab vyzvaleńni Babaryki. Kali b jon padniaŭ takoje pytańnie, to jano b było vyrašana vielmi chutka, ciaham dnia», — miarkuje Vaskrasienski.
Eduard Babaryka, fota Nadziei Bužan
Fakt takoj sustrečy «NN» paćvierdziła advakatka Eduarda Iryna Varankova. Ni pra jakija padrabiaznaści spatkańnia jana raskazvać nie stała.
Eduard Babaryka — kiraŭnik inicyjatyŭnaj hrupy pretendenta ŭ kandydaty na pasadu prezidenta Viktara Babaryki. Byŭ zatrymany 18 červienia razam z baćkam, kali nakiroŭvaŭsia ŭ CVK dla zdačy sabranych podpisaŭ. Zatrymańnie pravodziŭ Departamient finansavych rasśledavańniaŭ. U hety ž dzień Eduard byŭ źmieščany ŭ SIZA KDB. 21 červienia Eduardu Babaryku vystavili abvinavačvańnie pavodle č. 2 art. 243 («Uchileńnie ad vypłaty sum padatkaŭ i zboraŭ, što paciahnuła škodu ŭ asabliva bujnym pamiery»). Pryznany palityčnym viaźniem.
Juryj Vaskrasienski — heta były siabra inicyjatyŭnaj hrupy Babaryki, jaki paśla vybaraŭ apynuŭsia ŭ «amierykancy». U chutkim časie źjaviłasia jahonaje intervju Maratu Markavu, jakoje jon davaŭ u statusie źniavolenaha. A na sustrečy z Łukašenkam Vaskrasienski siadzieŭ ad jaho pa pravuju ruku. Litaralna na nastupny dzień jon vyjšaŭ na volu z daručeńniem «padrychtavać prapanovy pa źmienach u Kanstytucyju».
