Siońnia ŭ ŚMI razam ź infarmacyjaj pra «Marš susiedziaŭ» (jaki staŭ jašče adnym dokazam taho, što biełarusy akupantam zdavacca nie źbirajucca) šmat kanśpirałahičnych dopisaŭ pra vyzvaleńnie Viktara Babaryki z turmy i z adpraŭkaj jaho na Kipr, — piša eks-kandydat u prezidenty Uładzimir Niaklajeŭ. —
Pra Kipr paźniej, a toje, što z turmy Babaryku źbirajucca pieravieści pad chatni aryšt, stała zrazumieła bieź nijakich kanśpirałohij paśla pieratrusu ŭ jahonym domie 18 listapada, u vyniku jakoha nie ŭziali ničoha, aproč palaŭničaj strelby.
Z čaho stała zrazumieła? Z ułasnaha dośviedu ŭ 2010 hodzie. Pierad tym jak pieravieści mianie z turmy pad chatni aryšt, u maim domie było toje samaje. I toje, što nazyvałasia pieratrusam, było nasamreč ahladam miesca, kudy pieravodzicca z turmy aryštant.
Hladzieli, jakija jość mahčymaści dla ŭciokaŭ, dzie raźmiaścić achovu. I, zrazumieła, aryštantu nielha pakinuć zbroju. Tamu i zabrali strelbu, jakaja nikoha nie cikaviła pry raniejšym pieratrusie.
Ciapier pra Kipr.
Nočču ŭ «Amierykancy» (turmie KDB) mianie pryviali na dopyt: «Priniato riešienije (šmatznačny pozirk u stol) o śmiahčienii miery priesiečienija s pierievodom pod domašnij ariest. No pri usłovijach…» I pačali nazyvacca ŭmovy-prapanovy.
Adna ź ich: vyjechać u Finlandyju. «Vy tam žili, vas tuda prihłašajut».
Z usich umoŭ ja zhadziŭsia tolki na detektar many, bo ŭsie maje dziejańni byli adkrytymi — i mnie nie było čaho chavać. Bolš ni na što. I tym nie mienš, paciahnuŭšy čas, mianie pieraviali pad chatni aryšt. Heta było nie ich rašeńnie, jany vymušanyja byli heta zrabić pad ciskam Jeŭraźviaza i ZŠA.
Dumaju, z Babarykam idzie padobny torh. I miarkuju, što jon nie zhadžajecca pakinuć Biełaruś, razumiejučy, jak heta budzie skarystana. Tamu pieravod pad chatni aryšt zaciahvajecca. Ale rašeńnie hetkaje ŭžo pryniataje, i pryniataje jano pad takim ciskam, što naŭrad ci jaho možna admianić», — miarkuje Niaklajeŭ.
