Z redakcyjaj «Mocnych Navin» źviazałasia hamialčanka Anastasija. U siaredzinie kastryčnika dziaŭčyna viartałasia dadomu z parasonam bieł-čyrvona-biełaha koleru. Raptam padjechaŭ aŭtazak — i jaje zatrymali.

Anastasii siońnia, 30 kastryčnika, spoŭniłasia 18. Da paŭnalećcia dziaŭčyna paśpieła pabyvać u aŭtazaku. 12 kastryčnika kala dziaviataj hadziny viečara jana išła dadomu pa praśpiekcie Lenina, niedaloka ad płoščy. U rukach u jaje byŭ bieł-čyrvona-bieły parason. Raptam pobač źjaviŭsia aŭtazak. Byŭ paniadziełak, u tym liku i tamu źjaŭleńnie hetaj techniki na vulicy niečakana.

— Ja navat skiemić nie paśpieła. Z aŭtazaka vybiehli troje supracoŭnikaŭ AMAPa, dvoje ź ich mianie schapili i zaviali ŭnutr. Pačali maciukacca, adrazu skazali, što ŭ mianie parason bieł-čyrvony — heta simvolika, prapahanda. I ŭ momant moj parason pierałamali ab kalena. Razumieju, što heta nie takaja vialikaja strata, ale tak ci inakš heta niepryjemna, — raspaviadaje dziaŭčyna. — Daviedalisia imia, dzie vučusia. Pytalisia, čaho mnie nie chapaje ŭ krainie, čaho ja vyjšła, pra baćkoŭ taksama, zapałochvali ŭsiu darohu, jak mahli. Viedajecie, heta strašna, tam siadzić 15 supracoŭnikaŭ, va ŭsich jość dubinka, usie ŭ maskach. Jany staviać siabie vyšej za ciabie, a ty takaja maleńkaja dziaŭčynka siadziš.

Prykładna praź piać chvilin, pa słovach Anastasii, aŭtazak spyniŭsia, u jaho ŭvajšoŭ čałaviek biez formy i apaznavalnych znakaŭ. Dalej ź joj kantaktavaŭ jon.

— Tady ja pačuła ŭ svoj adras jašče bolš mata. Jon pahražaŭ, što mianie adličać, pakłaŭ mnie ŭ kišeniu nieviadomy pakiet. Tłumačyŭ, što ja siadu za heta. Ale ja nie stała ź im nijak razmaŭlać. Prahučała fraza, što ja potym budu ŭsim raspaviadać, jak mianie bili — nie spračajusia, mianie nichto nie kranuŭ, ale heta vielmi niepryjemnyja maładyja ludzi. Ja tłumačyła, što heta prosta parason, što ja prosta išła dadomu, ale mianie nichto nie słuchaŭ. Słuchać pačali ŭžo ŭ RAUS.

Pavodle Anastasii, pakiet z kišeni jaje palito dastali tolki pierad tym, jak pieradać jaje supracoŭnikam PPS. Potym hamialčanku advieźli ŭ Centralnaje RAUS.

— Dalej [supracoŭniki PPS i RAUS] sa mnoj užo razmaŭlali adekvatna, [u mianie] pretenzij niama. U RAUS zabrali telefon na pošuk jakoj-niebudź infarmacyi. Potym skłali pratakoł apytańnia, napisali, što ja nidzie nie ŭdzielničała, i adpuścili.

Niadaŭna dziaŭčynie pryjšoŭ list z AUS, tam paznačana, što ŭ dačynieńni da jaje spyniena administracyjnaja sprava.

— Aficyjna mianie zatrymali za bieł-čyrvona-bieły parason, ale ja nie zhodna z hetym, — tłumačyć Anastasija. — My ŭ zajavie adznačali, što kali jość niejkija dakumienty, jakija paćviardžajuć, što bieł-čyrvony — heta niejkaja simvolika, — chaj daduć. Ale ŭ nas u krainie, nakolki ja viedaju, takoha niama.

U kaledžy, dzie vučycca Anastasija, daviedalisia pra incydent.

— Z adnaho boku, nijakaj aficyjnaj papiery nie pryjšło. U mianie miakka pytalisia pra maju pazicyju, za što zatrymali, ale nijakaha cisku ŭ navučalnaj ustanovie nie było.

29 kastryčnika siamja adpraviła zajavu na imia načalnika UUS Homielskaha abłvykankama.

Złamany parason Anastasii lažyć doma, dziaŭčyna kupiła sabie taki ž novy i praciahvaje ź im chadzić.

Клас
0
Панылы сорам
0
Ха-ха
0
Ого
0
Сумна
0
Абуральна
0