Siońnia na ličbavych placoŭkach adbyłosia aficyjnaje ličbavaje pieravydańnie piaci kłasičnych albomaŭ hurta Ulis: ad debiutnaj «Čužanicy» (1989) da apošniaha na hety momant dyska «Lusterka» (2003).
Ulis — adzin z hałoŭnych biełaruskich rok-hurtoŭ, jaki byŭ zasnavany ŭ 1988 hodzie šeraham byłych udzielnikaŭ hurta «Bonda». Na pačatku 90-ch kalektyŭ byŭ viadomy nie tolki ŭ Biełarusi, ale i pa-za jaje miežami. Albomy Ulis vydavalisia ŭ Maskvie i Varšavie, muzyki hrali kancerty ŭ Vialikabrytanii, Niamieččynie, Francyi, Estonii dy inšych krainach Jeŭropy.
Fota Uładzimira Parfianka
Ciaham času šmat razoŭ źmianialisia skład hurta i hučańnie, ale kalektyŭ zaŭždy zastavaŭsia vybitnym pradstaŭnikom biełaruskaj alternatyŭnaj muzyki, jaki paŭpłyvaŭ na nastupnyja pakaleńni ajčynnych rok-vykanaŭcaŭ. A kampazicyja Ulis «Radyjo Svaboda» ŭ 2015 hodzie trapiła ŭ top-10 najvialikšych biełaruskich piesień usich časoŭ, składzieny TuzinFM pavodle apytańnia 90 ekśpiertaŭ.
Ad siońnia na ličbavych placoŭkach dasiažnyja albomy «Čužanica» (1989), «Kraina doŭhaj biełaj chmary» (1990), «Tancy na dachu» (1993), «Padarožža» (2000), «Lusterka» (2003) — usie, jakija raniej vydavalisia na kampakt-dyskach. Dla bolšaści ź ich — akramia «Lusterka» — heta pieršy aficyjny reliz u ličbie.
Dziela zručnaści stvorana adzinaja spasyłka na ŭsie albomy i placoŭki. Adnačasova raspačała pracu Facebook-staronka, pryśviečanaja tvorčaści kalektyvu.
