Redaktarka Kyky.org Nastaśsia Rahatko rabiła intervju ź Juryjem Zisieram vosieńniu 2018-ha ŭ razhar «Spravy BiełTA». Tady jano vyjšła nie ŭ poŭnym abjomie, paviedamiła Rahatko. Častku intervju Juryj Zisier dazvoliŭ apublikavać tolki paśla jaho śmierci. Siońnia redaktarka Kyky.org Nastaśsia Rahatko apublikavała hety frahmient.

KYKY: Čamu ludzi bajacca havaryć pra hrošy? Heta strach, što kali ŭ ciabie šmat, to ciabie zaŭvažać?

Juryj Zisier: Tak, ludzi dumajuć, što padatkovaja inśpiekcyja prychodzić pa naviadzieńni ŚMI. Jany dumajuć, što sa ŚMI infarmacyja biarecca, choć nie razumiejuć, što infarmacyja idzie z bankaŭ z padatkovych spravazdač — i tam usio bačna. Moža, 20 hadoŭ tamu tak i było, što išło ź ŚMI, ale ciapier prosta zastaŭsia strach. Na ščaście, jaho ŭsio mienš i mienš. Arhanizatar konkursu «Čałaviek spravy» raspaviadaŭ, što 20 hadoŭ tamu biznesmieny paśla zaprašeńnia na konkurs prosta kidali trubku. Bajalisia. A zaraz z kožnym hodam hetaha mienš, i ludzi iduć, i bačać: ad taho, što jany łaŭreaty konkursu, ničoha nie abvaliłasia. A pajšło ŭ plus. Ale kali vy sočycie za raździełam «Hrošy i ŭłada» na TUT.by, tam bolšaść publikacyj aŭtar — TUT.by. Čamu? Mienavita tamu što biznesmieny i čynoŭniki bajacca havaryć. Ci kažuć na ŭmovach ananimnaści, a tady i žurnalist pavinien być ananimnym. Heta śpiecyfika našaj krainy. Na žal.

KYKY: Ja viedaju, što kali vydańnie «Diełovoj Pietierburh» robić svoj top-100 siarod biznesmienaŭ — ludzi telefanujuć i prosiać prybrać ich sa śpisu za hrošy.

JUZ: Tak u «Štodziońniku», kali robiać śpis samych paśpiachovych, toje ž samaje adbyvajecca. Za hrošy prosiać ci prosta kažuć, što heta była zamova — kab jany patrapili ŭ hety rejtynh. Prosta śmiešna. Ale šmat chto sapraŭdy dumaje, što heta padkopy kankretna suprać ich.

KYKY: Vy paśla śmierci zasnavalnika i ŭładalnika ahienctva BiełaPAN Alesia Lipaja napisali dopis pra toje, jak niervy zabirajuć ludziej. Vy napisali: «Nie dajcie im zabrać u vas zdaroŭje i žyćcio». Niemahčyma ž prosta žyć i supakoicca.

JUZ: Tak. Ja razumieju, ale ja pisaŭ, kab, moža, niechta zrazumieŭ, što jany nie adny. Ja dumaju, što takaja salidarnaść taksama važnaja.

KYKY: Prosta padbadzioryć ludziej?

JUZ: Tak, padtrymać.

KYKY: A vy pieražyvajecie ź jakich pryčyn? Jak vy siabie supakojvajecie?

JUZ: Viadoma. Dy ź ciažkaściu — usio heta adbivajecca na zdaroŭi. Chvareju.

KYKY: Admoŭciesia, kali nie chočacie adkazvać. Ja pravilna razumieju, što vam taksama stavili dyjahnaz…

JUZ: Tak, u mianie rak. Heta ciapier nie drukujcie — ja prosta nie chaču, kab dachody TUT.by upali. Jak pra Styva Džobsa abviaścili, što rak — i try hady birža mitusiłasia, što ciapier budzie z akcyjami Apple. I akcyi abvalilisia. Ja hetaha nie chaču. Ja ŭžo treci hod žyvu z hetym dyjahnazam, uvieś čas lačusia. Zaraz na lačeńni. Ja dva hady nie pracuju ŭ ofisie — tak, źjaŭlajusia pieryjadyčna.

KYKY: Vielmi pravilnaje rašeńnie.

JUZ: Nu, u mianie niama vyjścia. U mianie niama imunitetu ŭ hety momant. Nu i ŭsio heta pierapynkami: ja niekalki miesiacaŭ lačusia, potym niekalki miesiacaŭ «na voli» adychodžu. Potym ja jašče raz — heta takaja śpiecyfičnaja raznavidnaść. A Lipaj taksama lačyŭsia ad raka. Ja jaho ŭ Baraŭlanach sustreŭ za dva tydni. My abdymalisia tam. Ja nie viedaŭ, što jon chvareje. Ja byŭ pa svaich spravach, jon — svaich. Lažaŭ na chimijaterapii. A pamior jon ad tromba, ad insultu. Jon piać hadoŭ chvareŭ — u jaho była sarkoma, jaje vyrazali i kali pačałasia sprava z uchileńniem ad padatkaŭ, znoŭ heta ŭsio palezła. Uvohule, svoječasova pamior — učora vyjšła navina, što spynili.

KYKY: Va ŭładalnika «Aniehi» Siarhieja Mieta była padobnaja historyja. Jon u tyja apošnija paŭhoda pradaŭ «Aniehu», i chutka potym pamior.

JUZ: Ja nie viedaŭ, ale vyličyŭ potym, što heta byŭ rak. Jamu stała soramna. Jon ža chadziŭ taki kozyram — i voś, ź im zdaryłasia hetaje niaščaście. Ja ŭpeŭnieny, jon prosta jaho nie pieranios. U mianie taksama takoje. Na mianie mocna cisnuli ŭvieś čas. I praciahvajuć cisnuć — kab ja im pradaŭ partał. I niedzie za paŭhoda da pačatku chvaroby ja kožnuju ranicu pačaŭ pračynacca z dumkami: «Voś, užo para i pamirać». Tamu što voś užo ja ŭsio zrabiŭ, ja vyhadavaŭ TUT.by, a tut mianie pasadziać, pačnuć dapytvać, ja što-niebudź nie toje skažu i skampramietuju TUT.by — i lepš pamierci. Ja staŭ kožnuju ranicu z hetaj dumkaj pračynacca. Za niekalki miesiacaŭ da kryvacioku.

KYKY: A vy tady nie dumali adyści ad spraŭ?

JUZ: A što heta daść? Usio adno ž niejak… Jany leźli da mianie navat paśla hetaha. Praź inšych. Jany nie viali hutarki niepasredna sa mnoj. Praz kaleh dziejničali… Heta vy možacie apublikavać, kali ja pamru. Ale ja spadziajusia, jašče praciahnu hadoŭ dvaccać.

KYKY: Ja taksama spadziajusia.

JUZ: Ale hetaha nichto nie viedaje. Tamu što raznavidnaść ciažkaja. Heta nie rak hrudziej ci rak prastaty, jaki vylečyŭ — i na ŭsio žyćcio. Heta ciažkaja forma. Ale tym nie mienš, mianie dobra lečać.

Juryj Zisier, 15 vieraśnia 2019 hoda. Fota: Anton Matolka.

Juryj Zisier, 15 vieraśnia 2019 hoda. Fota: Anton Matolka.

KYKY: U Biełarusi?

JUZ: Sprabavaŭ ŭ Izraili, ale heta hłupstva. Tut lepš.

KYKY: Čamu?

JUZ: Tamu što chraničnyja zachvorvańni treba lačyć doma. Abo emihravać. Ich treba lačyć ŭ adnym miescy — važnaja pierajemnaść. Nu i potym ja na chimijaterapii. Apieracyju — tak, možna było za miažoj zrabić, ale mnie jaje vydatna zrabili tut u lečkamisii. Vydalili pałovu straŭnika. Nu, dźvie traciny.

KYKY: I vam nie chaciełasia emihravać?

JUZ: Nie — a jak ja kinu ŭsio tut? Dy i naohuł nie chočacca emihravać. Što potym tam rabić? Navošta žyć tam?

KYKY: Rassłabicca. Chiba nie?

JUZ: Nu, ja nie viedaju. Ja nie mahu, dla mianie heta sprava žyćcia, ja jaje nie mahu kinuć. Nie chaču, dy ŭ mianie i žonka nie choča źjazdžać, i ja nie chaču. Źjazdžać možna ŭ 20 hadoŭ. Treba było źjazdžać. Nu, u 25. A ŭ 58 hadoŭ źjazdžać — heta hłupstva, tamu što ty abros tut, i tam ŭ ciabie nikoha niama. Ty, atrymlivajecca, adzin.

KYKY: Jak pakazvajuć knihi emihrantaŭ, heta ciažka.

JUZ: Emihranty-piśmieńniki ŭžo nikoli tak dobra nie pišuć, jak doma pisali. Navat Dzina Rubina — heta ŭsio ŭžo nie toje. Dy i mnohija inšyja ŭžo nie dasiahali tych vyšyń. Emihravać treba ŭ maładości. A pa zdaroŭi — tak u nas dobra lečać, pa mienšaj miery, mianie. U mianie niama nijakich skarhaŭ, mianie vielmi dobra lečać. Nu, i ja sam ža skončyŭ bijamiedycynskuju kibiernietyku i try hady pracavaŭ u Baraŭlanach u 90-ja hady. Ja byŭ prahramistam, ale zajmaŭsia navukovymi daśledavańniami. Ja vioŭ aŭtamatyzacyju navukovych daśledavańniaŭ, statystyku, štučny intelekt jašče tady.

KYKY: A što vy rabili?

JUZ: Pisaŭ prahramy dla miedycynskich daśledavańniaŭ. Matematyčnyja madeli budavaŭ, apracoŭvaŭ statystyku pa raku lohkaha, dapuścim. Tamu ja ŭ temie, ja razumieju, što sa mnoj robiać, čamu. I tamu nie baču sensu nikudy jechać lačycca. Razumiejecie, u mianie idzie chimijaterapija. Ulivajuć mnie amierykanskija leki pa amierykanskich pratakołach. Jaki sens ich ulivać u inšym miescy? A potym dva tydni mučycca z-za ŭskładnieńniaŭ. Mučycca lepš doma, tamu što ŭskładnieńni mianiajucca, i ty lažyš… Što, u haścinicy lažać? U balnicy ciabie nie trymajuć - ulivajuć i vypisvajuć. I dalej ty zastaješsia sam-nasam z hetymi bolkami. Młosnaść lečycca adnym sposabam, hastryt — inšym, zapaleńnie kišečnika — trecim sposabam. Stamatyt — čaćviortym.

KYKY: U vas napeŭna vialikaja aptečka…

JUZ: Da tut usio zabita! (Śmiajecca). Tak i navošta heta lačyć za miažoj?

KYKY: Razumieju, tut svaje.

JUZ: Tak, tut ja doma. Tut usio ž sa mnoj nosiacca, mianie vielmi pavažajuć, šanujuć i dobra staviacca lekary. Nu, i ja ahułam davoli pasłuchmiany pacyjent. Jany mnie mohuć raskazać niešta, čaho nie mohuć raspavieści inšym — u mianie razumieńnie jość. A za miažoj ja budu zvyčajnym płatnym pacyjentam. Abo biaspłatnym. Nu, i jaki ŭ hetym sens? Jość vypadki, kali treba lačycca za miažoj, ale heta nie moj vypadak. Lataŭ ja na asobnyja abśledavańni, kansultacyi ŭ Izrail. Nu ja ŭžo baču ŭsie mocnyja i słabyja baki, mahu pradkazać, kali treba, a kali nie treba źjazdžać.

KYKY: A ci možna skazać, što ŭ nas z ankałohijaj dobra zmahajucca?

JUZ: Dobra. U nas prablema ź nižnim uzroŭniem. U paliklinicy drenna bačać ankałohiju. I potym ja viedaju vypadak, kali lekar syšła ŭ adpačynak i čałavieku nichto nie skazaŭ, što ŭ jaho rak — i nie adpraviŭ u dyspansier. Plus u nas jość pieraboi ź lekami — zvyčajna kožnuju zimu, kožnaje leta. Nie ŭsio zakuplajecca — davodzicca rabić anałahi, ale jany nie całkam kapijujucca. Kali, dapuścim, čystaja chimijaterapija kapijujecca bolš-mienš, heta značyć taki kłas rečyvaŭ — monakłanalnyja antycieły — imunaterapija. Jana dakładna nie kapijujecca, u nas byvaje tolki anałah. Samy typovy prykład — interfieron. Uvohule, usio, što treba zachoŭvać pry +4+8 — insulin, usio heta imunaterapija, usio heta drenna padrablajecca. I tamu kali pišuć, što našy leki drennyja, bolš za ŭsio skarhaŭ na insulin. Jon daje ŭskładnieńni, a impartny nie daje. Heta tamu što heta roznyja rečyvy. A zvyčajnaja chimija — hruba kažučy, aśpiryn, heta toje ž samaje. Usio adno jaki kuplać.

KYKY: Ale kali pieraboi, vy nie sprabavali…

JUZ: Kuplaŭ za hrošy, viadoma. Mnie pašancavała, što ŭ mianie jość hrošy. Ja nie viedaju, što b ja rabiŭ inakš.

KYKY: Vy nie łabiravali hetuju temu?

JUZ: A jak možna łabiravać? U Ministerstva achovy zdaroŭja niama hrošaj.

KYKY: To bok možna navat pryjści pahavaryć ź ministram, ale ničoha nie zdarycca?

Ju.Z.: Nu, vyłučajecca niedastatkova srodkaŭ — i ŭsio. I ja nie mahu skazać, što ŭsio drenna. Dapuścim, u nas jość prybor PET KT — heta samy sučasny srodak vyjaŭleńnia mietastazy puchliny. Z adnaho boku, u Izraili ŭ kožnaj rajonnaj balnicy jość hety PET litaralna. A ŭ nas adzin na krainu. A ź inšaha boku, ich usiaho 20 u Maskvie. Nivodnaha ni ŭ Litvie, ni ŭ Łatvii, ni ŭ Estonii. Jak jany ŭvohule žyvuć tam — ja nie viedaju. Kudy pasyłajuć chvorych? U hetym sensie ŭ nas lepš. I ŭ nas prystojny navukovy ŭzrovień, i vierchni. Tak što, paŭtarusia, u maim stanoviščy ja nie baču sensu nikudy źjazdžać.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?