Nacbank daŭ spravazdaču pra rost ZVR u krasaviku paśla rekordnaha padzieńnia ŭ sakaviku. Ale ci karektna kazać pra pavieličeńnie aficyjnych reziervaŭ?

U pres-relizie NBRB ab stanie reziervaŭ adznačajecca, što za krasavik jany vyraśli na 96,2 młn USD. U sakaviku ZVR skaracilisia na maksimalnuju vieličyniu za ŭvieś čas viadzieńnia statystyki — na 1,018 młrd USD. Kali raźbirać faktary rostu reziervaŭ, to akažacca, što hałoŭny ŭkład u skarbonku ŭładaŭ uniesła manietarnaje zołata, adznačaje sajt banki24.by.

Suma reziervovych aktyvaŭ pavodle hetaha artykuła ZVR pavialičyłasia za krasavik na 143,5 młn USD. U pieraliku na adnosnyja pakazčyki «mietaličnaja» častka reziervaŭ uzrasła na 5,6%. Takim čynam, biez zołata ŭłady nie pakazali b pavieličeńnie ZVR.

Łohika tut prostaja: zołata stała na 143,5 młn USD bolš, ale reziervy ŭ cełym vyraśli na 96,4 młn USD. Značyć astatniaja častka skarbonki Minfina i Nacbanka za miesiac usochła na 47,1 młn USD.

Pieralik fizičnaha zołata ŭ dalary idzie pa kaciroŭkach London Bullion Market Association. Kali brać hetyja kaciroŭki na spravazdačnyja daty, to cana zołata ŭ krasaviku vyrasła na 5,8%. Atrymlivajecca, što ŭvieś rost cany zołata ŭ ZVR Biełarusi tłumačycca rostam cen na hety mietał.

Kali b ceny na zołata nie raśli tak chutka, biełarusy całkam ubačyli b adsutnaść rostu abo navat padzieńnie reziervaŭ.

Važnyja faktary padtrymki reziervaŭ — pamianšeńnie vałacilnaści na rynku nafty i pieryjad vypłaty kvartalnych padatkaŭ i hadavych dyvidendaŭ dziaržkampanij. Hetyja faktary pieraviarnuli situacyju z kuplaj i prodažam valuty pradpryjemstvami-rezidentami.

Za krasavik čysty prodaž valuty pradpryjemstvami-rezidentami i nasielnictvam skłaŭ 97,1 młn USD, choć u sakaviku adznačałasia hihanckaja čystaja kupla — 897,2 młn USD. Heta dazvoliła Nacbanku stać čystym pakupnikom valuty na biržavych tarhach krasavika. Takuju situacyju na valutnym rynku nielha nazvać ustojlivaj. 

Pa sutnaści, pamier ZVR zaležyć ad vahańniaŭ kanjunktury na fonie suśvietnaha kryzisu i devalvacyjnych nastrojaŭ unutry krainy. U adnym miesiacy jany spryjalnyja dla ŭładaŭ, u inšym — naadvarot. 

Peŭnyja aściarohi vyklikaje źnižeńnie aktyŭnaści nasielnictva ŭ najaŭnym siehmiencie rynku. U krasaviku vałavaja kupla kešu stała samaj nizkaj za 36 miesiacaŭ, vałavy prodaž — za 51 miesiac. Biełarusy ŭsio jašče aściarožničajuć i słaba daviarajuć słaviesnym interviencyjam uładaŭ. Taksama važna, što čystaja kupla valuty z ulikam bieznajaŭnaha raźliku zachoŭvajecca piać miesiacaŭ zapar. Za hety čas biełarusy vykupili ŭ bankaŭ 564,8 młn USD.

Uvohule, krasavickaja stabilizacyja ZVR i valutnaha rynku adbyłasia za košt źbiehu cełaha šerahu spryjalnych abstavinaŭ. U mai, kab «zamarozić» stan rečaŭ, treba budzie prykłaści prykmietna bolš namahańniaŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?