Pradstaŭnik Suśvietnaj arhanizacyi achovy zdaroŭja ŭ Biełarusi Batyr Bierdykłyčaŭ u intervju ria.ru čarhovy raz nahadaŭ pra važnaść mier fizičnaha dystancyjavańnia, kab «praduchilić łavinapadobny rost novych vypadkaŭ COVID-19, dać mahčymaść sistemie achovy zdaroŭja dać rady patoku pacyjentaŭ i dazvolić atrymać kožnamu nieabchodnuju miedycynskuju dapamohu ŭ poŭnym abjomie».

«Biez adekvatnych mier fizičnaha dystancyjavańnia chutki rost kolkaści novych vypadkaŭ zachvorvańnia moža pieravysić mahčymaści sistemy achovy zdaroŭja pa akazańni nieabchodnaj miedycynskaj dapamohi», — miarkuje Bierdykłyčaŭ.

Što da praviadzieńnia parada 9 maja, to na dumku pradstaŭnika SAAZ, skapleńni ludziej, pry jakich niemahčyma zabiaśpiečyć dystancyju pamiž imi 1,5—2 mietra, pavyšajuć ryzyku pieradačy virusa i spryjajuć dalejšamu raspaŭsiudžvańniu epidemii.

Adnoj z rekamiendacyj SAAZ pa ŭzmacnieńni mier fizičnaha dystancyjavańnia źjaŭlajecca pieranos abo admiena masavych zboraŭ ludziej, uklučajučy spartyŭnyja, kulturnyja, palityčnyja i relihijnyja mierapryjemstvy, nahadaŭ jon.

«Z boku SAAZ my prymajem usie namahańni dla taho, kab hetaja infarmacyja była daviedziena da kiraŭnictva krainy. Adnak pryniaćcie rašeńnia ab vykanańni rekamiendacyj SAAZ źjaŭlajecca prerahatyvaj urada krainy», — zaznačaje pradstaŭnik arhanizacyi. 

«Va ŭmovach adsutnaści adekvatnych mier fizičnaha dystancyjavańnia ŭ nas niama padstaŭ u najbližejšy čas čakać pierałomu ŭ chodzie epidemii.

Pavodle danych ministerstva achovy zdaroŭja, my možam nazirać prykmiety stabilizacyi rostu novych vypadkaŭ. Adnak na dadzienym etapie, asabliva va ŭmovach adsutnaści adekvatnych mier fizičnaha dystancyjavańnia, rabić vysnovy pakul zaŭčasna. Prahnazavańnie pika zaležyć ad šmatlikich faktaraŭ, ale sudzić ab hetym napeŭna možna budzie tolki retraśpiektyŭna», — miarkuje jon.

Taksama Bierdykłyčaŭ zaznačaje, što niama dokazaŭ siezonnaha charaktaru hetaha virusa, tamu prahnazavać zhasańnie epidemii z nadychodam leta pakul taksama zaŭčasna.

***

Pavodle źviestak na ranicu 7 maja, u Biełarusi było 20 168 vypadkaŭ karanavirusa.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?