Dzień Voli ŭ Minsku ŭ 2018 hodzie, fota Siarhieja Hudzilina

Dzień Voli ŭ Minsku ŭ 2018 hodzie, fota Siarhieja Hudzilina

Praz karanavirus pa ŭsioj Jeŭropie cełyja krainy zakryvajucca na karancin. Navat u susiednich Polščy i Ukrainie, dzie situacyja pakul jašče dalokaja ad krytyčnaj, admianiajuć zaniatki ŭ škołach i masavyja mierapryjemstvy. U Biełarusi karanavirus vyjavili ŭžo ŭ 12 pacyjentaŭ, ale ŭłady zapeŭnivajuć, što pryčyn dla paniki niama. 

11 sakavika hrodzienskija arhanizatary Dnia Voli admovilisia ad praviadzieńnia mierapryjemstva paśla zafiksavanaha vypadku karanavirusa ŭ horadzie. 12 sakavika za abmiežavańnie masavych mierapryjemstvaŭ vystupiła Ministerstva achovy zdaroŭja, ale kancerty, śpiektakli i inšyja imprezy nichto admianiać nie źbirajecca. Prynamsi pakul što.

Ale ž praź dziesiać dzion płanujecca masavaja akcyja ŭ samym centry Minska. Na 22 sakavika zapłanavana śviatkavańnie Dnia Voli 2020. Mierapryjemstva ładziać niezaležnyja palityki z ruchu «Za svabodu», BCHD, AHP i BSDP. Ci nie dumajuć jany ŭsio ž admianić śviata na ŭsialaki vypadak?

«My budziem aryjentavacca na aficyjnuju pazicyju Ministerstva achovy zdaroŭja. Kali budzie abhruntavanaje rašeńnie Minzdaroŭja, što ŭdzieł u masavych mierapryjemstvach niebiaśpiečny, to varta budzie, napeŭna, da jaho prysłuchacca. Ale na siońniašni momant pasyły adtul iduć advarotnyja: maŭlaŭ, u Biełarusi ŭsio kantralujecca, pahrozaŭ niama, usio pad nahladam.

Adpaviedna, pakul što pryčyn admianiać Dzień Voli niama», — raspavioŭ «Našaj Nivie» adzin z arhanizataraŭ śviata Juraś Hubarevič, lidar ruchu «Za svabodu».

Ale ž ci nie admienicca śviata praź niedachop hrošaj? Pakul srodki źbirajuć praz płatformu MołaMoła i fejsbuk lidara BSDP Ihara Barysava. Ahułam sabrana tolki kala 3 tysiač rubloŭ z zapłanavanych 25 tysiač.

«My čakajem adkaz ź Minharvykankama z aficyjnym dazvołam. Jak tolki budzie dazvoł, to patrebnyja srodki źbiaruć vielmi chutka, ja dumaju.

Ale kali śviata ŭsio ž daviadziecca admianić, to hrošy nie prapaduć. My źvierniemsia da tych, chto achviaraŭ srodki, pačujem ich dumku. U nas jość mahčymaść źviarnucca da ludziej, jakija achviaravali: paviesić apytanku ci źviarnucca piersanalna. My viedajem ludziej, jakija achviaravali bujnyja sumy.

U lubym vypadku, kali srodki byli pryznačanyja na śviatkavańnie Dnia Voli, to budzie metavaje vykarystańnie ich. A ŭžo farmat vykarystańnia budzie abmiarkoŭvacca ź ludźmi, — skazaŭ Juraś Hubarevič.

— My nie budziem siabie pavodzić, jak niekatoryja inšyja kampanii, kali tyja, chto źbiraŭ hrošy, pačali ličyć siabie rasparadžalnikami. Źbirali srodki na mierapryjemstva ŭ Minsku, a paśla vyrašali, što možna nakiravać ich u inšy horad».

 

Клас
0
Панылы сорам
0
Ха-ха
0
Ого
0
Сумна
0
Абуральна
0