Pajezdka pa Viciebščynie kandydataŭ na rolu adzinaha kandydata ad apazicyi prajšła zusim niaŭdała dla niezaležnaj kandydatki Volhi Kavalkovaj (3 hałasy, albo 1,2%) i Alaksieja Janukieviča (7 hałasoŭ, albo 2,9%). «NN» spytała ŭ palitykaŭ, ci źbirajucca jany dalej praciahvać zmahańnie, kab stać adzinym, albo zdymucca na karyść inšaha kandydata?
«Ja metanakiravany čałaviek i ni na chvilinu nie škaduju, što pryniała rašeńnie ŭdzielničać. Heta vializarny dośvied, — kaža Volha Kavalkova. — Takija vyniki paśla sustreč u Viciebskaj vobłaści źjaŭlajucca čakanymi dla majoj kamandy. Zrazumieła, što aktyvisty palityčnych partyj buduć padtrymlivać taho lidara, jaki byŭ imi vyłučany. Ja pracavała ź inšymi aŭdytoryjami, jakija dahetul nie cikavilisia palitykaj, ale ž zbolšaha ŭ inšych rehijonach. Dziakujučy tamu, što ŭ palityku pryjšli novyja ludzi, my dabilisia źmienaŭ u antynarkatyčnym zakanadaŭstvie i praciahvajem zmahacca za niezaležnyja sudy.
Heta tolki pieršy tydzień prajmieryz. Napieradzie jašče šmat sustreč i haradoŭ, internet-hałasavańnie i kanhres. Tym nie mienš moj štab, biezumoŭna, pryniaŭ pieršyja vyniki da ŭvahi, i my vyrašyli padkarektavać svaje padychody.
Ja źjaŭlajusia niezaležnym kandydatam. Maja zadača — pryciahnuć uvahu da prajmieryz z boku novaj aŭdytoryi ludziej, jakija nie naležać da palityčnych partyj. Čakajcie nastupnych sustreč», — skazała Volha.
Nie źbirajecca apuskać ruki i Alaksiej Janukievič: «Ja dumaju, što hetaje pytańnie vam najpierš varta adrasavać Juryju Hubareviču. Čałaviek ličyć, što jon zmahajecca za pieramohu na prajmieryz, surjozna ŭkłaŭsia finansava, płakaty vyrabiŭ, ulotki kalarovyja. Vynik minułaha ŭik-endu pravalny ŭ pieršuju čarhu dla jaho.
Što tyčycca mianie, to ja daŭno ŭžo kazaŭ, što na prezidenckich vybarach-2020 zastaniecca Łukašenka, a na demakratyčnych prajmieryz pieramoža Sieviaryniec. My prapanoŭvali ŭsim pahadzicca na Sieviarynca biez usialakich prajmieryz. I kali siabra Partyi BNF hałasuje za Sieviarynca, tut absalutna niama prablemy. Ja razumieju, što ja nie kandydat 2020 hoda. Z hetym razumieńniem uvachodziŭ u kampaniju, i ciapier ničoha nie źmianiłasia dla mianie. Tamu nie baču sensu zdymacca, kiepskaha vyniku dla mianie nie budzie. Pieramoha Sieviarynca budzie dobrym vynikam dla mianie.
Ale ja sapraŭdy zmahajusia ŭ Narodnym hałasavańni — nie za toje, chto stanie kandydatam, ale za toje, kab nacyjanalna-demakratyčnaja apazicyja zdabyła novuju jakaść. Kab praz paru miesiacaŭ paśla vybaraŭ my nie apynulisia znoŭ u jamie. Ja pierakanany, što svaim udziełam zdolny paŭpłyvać na scenar raźvićcia padziej, u tym liku na stratehiju i dziejańnia Paŭła i jahonych prychilnikaŭ, jakija siońnia składajuć bolšaść u apazicyi», — adznačyŭ Alaksiej Janukievič.
