AAT «Homieltransnafta Družba» niedaatrymała $ 23 młn vyručki z-za situacyi z brudnaj naftaj. Pra heta raspavioŭ hienieralny dyrektar pradpryjemstva Aleh Barysienka, paviedamlaje BIEŁTA.
«Praciahłaje spynieńnie naftapravoda niehatyŭna paŭpłyvała na finansava-haspadarčuju dziejnaść AAT «Homieltransnafta Družba» i pryviała da niedaatrymańnia vyručki ŭ $23 młn. Niepaźbiežnaj i abaviazkovaj umovaj dla adnaŭleńnia dachodaŭ stała daviadzieńnie abjomaŭ pierapampoŭvajemaj nafty pa vynikach hoda da zapłanavanych albo pavieličeńnie taryfaŭ», - skazaŭ Aleh Barysienka.
Padčas pieramovaŭ z rasijskimi partniorami ŭdałosia dasiahnuć damoŭlenaści ab nieabchodnaści pavyšeńnia taryfaŭ na transparciroŭku nafty praź Biełaruś. «Pryniata rašeńnie, što z 1 vieraśnia 2019 hoda jany buduć pavialičany na 3,7%. Razam z hetym rasijski bok uziaŭ na siabie abaviazacielstvy imknucca da abjomaŭ prapampoŭvańnia, jakija zabiaśpiečać AAT «Homieltransnafta Družba» vyručku ŭ adpaviednaści ź biźnies-płanam na 2019 h. Heta pieršy etap. Pa vynikach pracy za hod situacyja z prapampoŭkaj nafty pa biełaruskaj častcy trubapravoda budzie praanalizavana, paśla čaho my vyznačymsia z dalejšymi dziejańniami», - adznačyŭ hiendyrektar pradpryjemstva.
Jak paviedamlałasia, «Biełnaftachim» 19 krasavika zajaviŭ ab rezkim paharšeńni jakaści rasijskaj nafty Urals, jakaja pastupaje pa trubapravodzie «Družba». Źmiest chłorarhaničnych złučeńniaŭ u nafty ŭ dziasiatki razoŭ pieravyšała hraničnyja značeńni pa standarcie. U vyniku šerah krain spyniŭ prymać i pierapracoŭvać rasijskuju naftu. Abodva biełaruskija naftapierapracoŭčyja zavody - Mazyrski NPZ i AAT «Naftan» - vymušany byli źnizić zahruzku mahutnaściaŭ i panieśli straty, škoda była naniesiena i trubapravodnaj sistemie.
