Ekspart hazu z Rasii ŭ krainy Paŭdniova-Uschodniaj Jeŭropy za pieršuju pałovu 2019 hoda ŭpaŭ bolš čym na čverć. Patreba ŭ rasijskim hazie skaraciłasia paśla zapusku zdabyčy na novym radoviščy ŭ Azierbajdžanie, a taksama ŭ vyniku rostu pastavak u Jeŭropu zvadkavanaha hazu z ZŠA i Blizkaha Uschodu.
Pastaŭki rasijskaha hazu ŭ Turcyju, najbolšy rynak rehijona, upali na 36% proci pieršaj pałovy 2018 hoda, piša Rojterz. Ekspart u Hrecyju i Bałharyju pamienšaŭ na 12,7% i 17,4% adpaviedna. Heta vynikaje sa statystyki, apublikavanaja rasijskaj kampanijaj. Usiaho hazpramaŭski ekspart u 9 krain rehijona skaraciŭsia na 27% da 14,2 młrd kubamietraŭ proci 19,5 młrd za pieršuju pałovu 2018 hoda.
Dla paraŭnańnia, Biełaruś za hod zakuplaje prykładna 22 młrd ton rasijskaha hazu.
Košt zvadkavanaha hazu ŭ Niderłandach, benčmark dla spotavych zakupaŭ zvadkavanaha hazu ŭ Jeŭropie, hetym letam składaŭ $3,6 za miljon brytanskich ciepłavych adzinak (mmBtu), što napałovu mienš, čym Turcyja płacić «Hazpromu».
Takim čynam, Turcyja skaraciła zaležnaść ad rasijskaha hazu z 49% da 35% ad ahulnaha spažyvańnia.
