Paśla vizytu daradcy prezydenta ZŠA ŭ nacyjanalnaj biaśpiecy Džona Bołtana ŭ Miensk zastałosia niekalki zahadak, piša Valer Karbalevič na «Radyjo Svaboda».

U ekskluziŭnym interviju karespandentu «Nastojaŝieho Vriemieni» ŭ Miensku Sieržu Charytonavu, jakoje Džon Bołtan daŭ u aeraporcie pierad adlotam, jość cikavaja fraza: «Ja pakazaŭ prezydentu pa darozie z aeraporta ŭ Pałac niezaležnaści na kramu Huawei, jakuju my prajaždžali — prosta tut u Miensku». Z hetaj repliki vynikaje, što Łukašenka sustrakaŭ Bołtana ŭ aeraporcie? Kiraŭnik Biełarusi padjaždžaje da trapu samalota z zamiežnym hościem vielmi redka. Heta — danina asablivaj pavahi. Dziela hetaha vizyter pavinien mieć vielmi vialiki status, abo ŭ jaho pryjeździe biełaruski bok mocna zacikaŭleny.

Druhi momant. Prahrama vizytu praduhledžvała pieramovy Džona Bołtana ź ministram zamiežnych spraŭ Biełarusi Ŭładzimieram Makiejem. Adnak u infarmacyjnych paviedamleńniach biełaruskaha boku niama nijakich źviestak pra takuju sustreču. Ni BiełTA, ni sajt MZS Biełarusi pra heta ničoha nia kažuć. A Bołtan u Twitter paviedamlaje pra takuju sustreču i daje fatazdymak, dzie jany razmaŭlajuć, stojačy ŭ Pałacy niezaležnaści.

I treciaja zahadka. Uładzimier Makiej prysutničaŭ tolki na pieršaj pałovie pieramovaŭ Łukašenki z Bołtanam. Dzieści ŭ siaredzinie sustrečy Makiej vyjšaŭ. Musić, sakrety byli takoha ŭzroŭniu, što ich nie davieryli navat ministru zamiežnych spraŭ.

Ale varta niekalki słovaŭ skazać pra nastupstvy hetaha vizytu dla dačynieńniaŭ Biełarusi z Rasiejaj. Biezumoŭna, pieramovam u Miensku spadarožničaŭ cień Maskvy.

Dumaju, nie vypadkova adrazu paśla adjezdu Bołtana Makiej paśpiašaŭsia dać kamentar telekanału «Biełaruś 1». Jaho hałoŭny sens — heta supakoić Maskvu.

Najpierš, Makiej padkreśliŭ, što inicyjatyva pryjezdu Bołtana išła ad amerykanskaha boku. Maŭlaŭ, nie vinavatyja my, jon sam da nas pryjechaŭ.

«Nia treba šukać nijakich kanśpiralahičnych zmoŭ za samim faktam vizytu», — zajaviŭ Makiej. A chto kaža pra zmovy? Rasiejskija telehram-kanały.

Rasiejskaje ahienctva «Sputnik» infarmacyju pra hety kamentar biełaruskaha ministra daje pad davoli krasamoŭnym zahałoŭkam: «Makiej: na pieramovach z Bołtanam nie było zaklikaŭ dałučycca da niečaha». Musić, hetaje pytańnie najbolš chvalavała Maskvu.

I telefonnaja razmova Łukašenki z Pucinym na druhi dzień paśla adlotu Bołtana taksama vielmi pakazalnaja. Niachaj sabie nahodaj dla telefanavańnia prezydenta Rasiei i było vinšavańnie biełaruskaha kalehi z dniom narodzinaŭ.

Farmalna Maskvie niama da čaho pryčapicca. Bo Pucin, Łaŭroŭ, inšyja rasiejskija čynoŭniki rehularna sustrakajucca z zachodnimi palitykami, u tym liku amerykanskimi, Łukašenku taki ŭzrovień kantaktaŭ i nia śniŭsia. Da taho ž u adnosinach Biełarusi i ZŠA adbyvajecca ŭsiaho tolki praces narmalizacyi, baki navat jašče nie abmianialisia ambasadarami.

Ale nievypadkova lajtmatyvam usich vykazvańniaŭ Bołtana ŭ Miensku była tema niezaležnaści Biełarusi. Paśla Krymu było šmat ekspertnych acenak, što padtrymka Zachadam Ukrainy ŭ jaje kanflikcie z Rasiejaj była niedastatkova rašučaj. A ŭžo, maŭlaŭ, za Biełaruś ni EZ, ni ZŠA «ŭpisvacca» nia buduć. Bo biełaruskaja terytoryja — heta ahulnapryznanaja sfera ŭpłyvu Rasiei, da taho ž tut dyktatura. Dyk voś vizyt Bołtana — peŭnaje papiaredžańnie Maskvie, syhnał, što Złučanyja Štaty hatovyja ŭstupić u kankurencyju z Rasiejaj za ŭpłyŭ na rehijon Uschodniaj Eŭropy.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?