U MARH skazali, što padobnyja tendary jany pravodziać nie ŭpieršyniu. U hety raz ad raspracoŭnikaŭ patrabujecca stvaryć novuju sistemu časovaha cenavaha rehulavańnia na tavary dziaržavaj i acenku jaje efiektyŭnaści ŭ budučyni. Patrabavańni da tych, chto zojmiecca hetym, davoli žorstkija. Pa-pieršaje, terminy: navukova-daśledčaja rabota pavinna być vykanana za 2,5 miesiaca, to-bok 75 dzion z daty zaklučeńnia dahavora.
Pa-druhoje, raspracoŭščyk pavinien vyvučyć, jak dziejničaje sistema dziaržrehulavańnia cen u krainach JEAES i vyznačyć pryncypy i ŭmovy, pry jakich budzie ŭvodzicca cenavaje rehulavańnie na tavary. Akramia taho, raspracoŭščyk pavinien pakazać, jakija dziaržorhany zmohuć inicyjavać časovaje cenavaje rehulavańnie. Toj, chto pieramoža ŭ hetym tendary, raspracuje i rekamiendacyi, jak vyznačyć, kali treba ŭvodzić cenavaje rehulavańnie na tavar. Tut majecca na ŭvazie roźnica pamiž koštami na niejki tavar u nas i ŭ krainach-susiedkach.
Ale na hetym praca raspracoŭščyka nie skončycca. Taksama jon budzie abaviazany vyznačyć i praceduru vybaru vyznačanaha sposabu cenavaha rehulavańnia kankretnych tavaraŭ i abhruntavać heta. Jašče adno patrabavańnie — treba vyznačyć paradak padaŭžeńnia cenavaha rehulavańnia i jak pry hetym Biełaruś budzie ŭzajemadziejničać ź inšymi krainami JEAES.
Jašče adna častka raspracoŭki — jana pavinna ŭklučać u siabie sistemu acenki efiektyŭnaści rehulavańnia cen na toj ci inšy tavar i ŭpłyvu hetych mier na inflacyju.
Pa ŭmovach tendaru asnovaj daśledavańnia pavinny stać zakanadaŭčyja akty Biełarusi i dahavor ab Jeŭrazijskim ekanamičnym sajuzie. Tak što ŭkaranieńnia pieradavoha dośviedu krain Zachadu čakać nie varta.
Udzielničać u konkursie mohuć jak navukovyja kalektyvy Nacyjanalnaj akademii navuk, tak i niezaležnyja ekanamičnyja ekśpierty. Ale pry vybary raspracoŭščyka budzie ŭličvacca kolkaść navukovych publikacyj i daśledavańniaŭ u halinie ekanomiki i cenaŭtvareńnia, jakija ŭ jaho majucca.
Nahadajem, zaraz MARH moža rehulavać ceny na sacyjalna značnyja tavary nie bolš za 90 dzion na praciahu adnaho hoda. U śpis uvachodziać u tym liku śviežaja ryba siamiejstva karpavych, masła, muka pšaničnaja, alej słaniečnikavy i rapsavy, cukar bieły kryštaličny, sol pavaranaja charčovaja, šmatki aŭsianyja biez smakavych i inšych dadatkaŭ, makarony nie ź ćviordych hatunkaŭ pšanicy, rys bieły šlifavany, hrečka, chleb žytni i žytniova-pšaničny, miasa — jałavičyna, śvinina, miasa kurej i kuraniat-brojleraŭ, jajki, małako, kiefir, śmiatana, tvaroh, dziciačaje charčavańnie: suchija sumiesi, kašy, kansiervy i soki.
Niadaŭna śpis dapoŭnili harodninaj: bulbaj, burakami, morkvaj, kapustaj, cybulaj, ahurkami i pamidorami. Taksama ŭ im akazalisia chleb pšaničny, vyraby bułačnyja — baton z pšaničnaj muki, syr — ćviordy, paŭćviordy, śviežyja jabłyki, čorny čaj, mannaja i prasianaja krupy. Ź miasa dadadzienyja adruby i bujnakavałkavyja paŭfabrykaty, kaŭbasy varanyja, sasiski, sardelki.
