Fota Dźmitryja Bruško
Z pačatku vieraśnia nacyjanalnaja kinastudyja «Biełaruśfilm» pierachodzić na šaścihadzinny pracoŭny dzień. Pra heta TUT.BY paviedamili niekalki krynic. U kinastudyi admovilisia ad kamientaroŭ.
Jak raspaviali na ŭmovach ananimnaści niekalki supracoŭnikaŭ kinastudyi, usim supracoŭnikam «Biełaruśfilma» infarmacyju pakul nie abjaŭlali. Płany pra źmieny prahučali na schodzie, na jakim prysutničali dyrektary studyj hulniavoha, dakumientalnaha, animacyjnaha kino, jakija ŭvachodziać u skład kinastudyi.
Pa płanach dyrekcyi, administrataraŭ, dyrektaraŭ studyj, dyrektaraŭ zdymačnych hrup i jašče niekatoryja padraździaleńni płanujuć pieravieści na 6-hadzinny pracoŭny dzień. Astatnich supracoŭnikaŭ — na damovu.
— Pačynaješ u hetyja źmieny ŭnikać i razumieješ, što dziejecca poŭnaja žeść, — kaža adzin z supracoŭnikaŭ «Biełaruśfilma» na ŭmovach ananimnaści. — Naprykład, ja — režysior-kantraktnik. Mianie ciapier pieravodziać na damovu. Čym drenna? Heta pazbaŭlaje mianie pracoŭnaha stažu, adpačynkaŭ i značnaj kolkaści hrošaj. A zarpłata tych supracoŭnikaŭ, jakich pieravodziać na 6-hadzinny pracoŭny dzień, pamienšycca na 25 adsotkaŭ. Ale, jak mnie skazali kalehi, zarobak časam raźbivajuć na try tranšy
Składanaje finansavaje stanovišča kinastudyi pryvodzić da pieryjadyčnych zatrymak pa vypłacie hrošaj.
— Dahavarnikam — kampazitaram, akcioram, multyplikataram, hukaapieratar — nie płacili ŭžo try miesiacy. Ale heta nie rekord. U minułym hodzie zatrymka dla dahavarnikoŭ była ledź nie paŭhoda. Z-za hetaha na studyi multyplikataraŭ idzie svajho rodu adkrytaja zabastoŭka. Jany nie pracujuć, bo nie płaciać hrošy. Tyja ž nastroi na «Letapisie». Aburanyja situacyjaj i na studyi hulniavoha kino, — raspavioŭ na ŭmovach ananimnaści supracoŭnik «Biełaruśfilma».
Jašče adzin surazmoŭca aceńvaje budučyja źmieny jak «biaskoncyja vynachodki rovara i zatykańnie dzirak».
— Nie budzie ad hetaha nijakaha tołku. Bolš, taho, usie našy prapanovy, jak my heta bačym, daŭno lažać na stale dyrektara i ŭ Ministerstvie kultury. Pastajanna vynachodzicca niejki rovar.
