Biełaruś choča ŭpieršyniu zakupić amierykanskuju naftu dla svaich naftapierapracoŭčych pradpryjemstvaŭ u imknieńni dyviersifikavać impart i źnizić zaležnaść ad susiedniaj Rasii, paviedamlaje «Hołas Amieryki».
Dziaržaŭnaja «Biełaruskaja naftavaja kampanija», afilavanaja z naftapierapracoŭčym kancernam «Biełnaftachim», naniała łabista Devida Hienkareli, kab damahčysia źmiakčeńnia sankcyj suprać Biełarusi i atrymać dazvoł na zakupku amierykanskaj syroj nafty.
Hienkareli dapamoža kampanii atrymać asablivuju licenziju ad Ministerstva finansaŭ ZŠA dla «zakupki syroj nafty z dastaŭkaj na naftapierapracoŭčyja pradpryjemstvy Respubliki Biełaruś», paviedamlajecca ŭ dakumientach, padadzienych u adpaviednaści z Zakonam ab rehistracyi zamiežnych ahientaŭ.
Sam Hienkareli, jaki pracuje łabistam na praciahu amal 30 hadoŭ, pakul što nie daje kamientaroŭ. Jak śćviardžajecca ŭ jaho profili ŭ sacsietkach, Hienkareli akazvaje svaim klijentam, u tym liku ŭ enierhietyčnaj śfiery, dapamohu va ŭzajemadziejańni z Kanhresam i roznymi fiederalnymi viedamstvami.
Stanam na 22 žniŭnia atrymać kamientar ad pradstaŭnika ambasady Biełarusi ŭ Vašynhtonie nie ŭdałosia.
Alaksandr Łukašenka ŭ chodzie vizitu ŭ Kazachstan u mai hetaha hoda skazaŭ, što chacieŭ by dyviersifikavać strukturu impartu nafty. Adnak mahčymaść Biełarusi impartavać naftu z ZŠA abmiežavanaja sankcyjami.
Vašynhton uvioŭ sankcyi ŭ dačynieńni da Biełarusi ŭ 2006 hodzie ŭ adkaz na «padryŭ demakratyčnych pracesaŭ». Praz hod sankcyi byli pašyranyja, i ŭ śpis trapiła kampanija «Biełnaftachim».
