«Naša Niva» raspytałasia ŭ inžyniera pa jakaści Salihorskaj ptuškafabryki Śviatłany Katovič, jak tak atrymałasia, kali ŭ Biełarusi taksama jość svoj centr siertyfikacyi «BiełChalal».
«Pa-pieršaje, chalalnyja jajki my vyrablajem užo paŭtara hoda, a centr siertyfikacyi ŭ Biełarusi źjaviŭsia tolki ŭ listapadzie 2018 hodu. Pa-druhoje, my aryjentavanyja na ekspart svajoj pradukcyi ŭ krainy musulmanskaha śvietu. A heta była ich umova, što siertyfikacyja pavinna być rasijskaj, zroblenaja kampietentnaj arhanizacyjaj pry Duchoŭnym upraŭleńni musulman», — adkazała Śviatłana Katovič.
U adździele markietynhu fabryki patłumačyli, što chalalnyja jajki adroźnivajucca ad zvyčajnych tym, što pry ich vyrabie nie ŭžyvalisia inhredyjenty žyviolnaha pachodžańnia. Paprostu havoračy, kurycy, što nieśli hetyja jajki, jeli tolki raślinny korm.
«Chalalnyja jajki — heta pakul vystavačny ekspanat. Tak, my aryjentujemsia na krainy musulmanskaha śvietu, ale damovy nakont pastavak u nas pakul niama. Nie možam syścisia ŭ canie», — dadali ŭ adździele markietynhu.
Zatoje hetyja jajki svabodna možna kupić u biełaruskich mahazinach.
«Dla biełarusaŭ chalalnaść — heta sinonim pravilnaha charčavańnia. Sapraŭdy, chalalnyja jajki majuć bolš jarki žaŭtok, jany mienš kałaryjnyja», — raskazali na Salihorskaj ptuškafabrycy.
