Pamiž prezidentam Rasii Uładzimiram Pucinym i brytanskim kampazitaram i śpievakom seram Ełtanam Džonam zaviazałasia zavočnaja palemika na pradmiet taho, parušajucca abo nie ŭ Rasii pravy leśbijanak, hiejaŭ, biseksuałaŭ i transhiendaraŭ (ŁHBT).

U subotu ŭ Osaka na zaviaršalnaj pres-kanfierencyi pa vynikach samitu «Vialikaj dvaccatki» Pucin adznačyŭ, što, na jaho dumku, Ełtan Džon pamylajecca ŭ tym, što ŭ Rasii jość prablema z pravami pradstaŭnikoŭ ŁHBT-supolnaści.

kremlin.ru

kremlin.ru

Jon zrabiŭ hetuju zajavu ŭ adkaz na adkryty zvarot u svoj adras, jakuju Ełtan Džon u piatnicu apublikavaŭ u svaich akaŭntach u sacyjalnych sietkach, u pryvatnaści ŭ instahramie.

Pra toje, jak raźvivałasia hetaja palemika, piša Bi-bi-si.

27 červienia prezident Pucin daŭ razhornutaje intervju brytanskaj haziecie Financial Times (cytaty z aficyjnaha sajta Kramla), u jakim, razvažajučy pra libieralnyja kaštoŭnaści, skazaŭ, što «sama hetaja ideja siabie zžyła, i jana ŭvajšła ŭ supiarečnaść ź intaresami pieravažnaj bolšaści nasielnictva».

Ab pravach ŁHBT Pucin skazaŭ nastupnaje:

«Tradycyjnyja kaštoŭnaści. Ja nie chaču nikoha pakryŭdzić, razumiejecie, nas i tak robiać hamafobami i hetak dalej. A my ničoha nie majem suprać ludziej nietradycyjnaj sieksualnaj aryjentacyi. Daj boh zdaroŭja, niachaj žyvuć tak, jak ličać patrebnym. Ale niekatoryja rečy dla nas zdajucca zališnimi.

Što tyčycca dziaciej, naprydumlali, ja nie viedaju, tam piać połaŭ ŭžo ci šeść połaŭ. Ja navat nie viedaju, što heta takoje. Choć niachaj usim budzie dobra, my ničoha suprać nikoha nie majem. Ale nielha za hetym zabyvać i kulturu, i tradycyi, i tradycyjnyja asnovy siemjaŭ, jakimi žyvuć miljony ludziej karennaha nasielnictva».

(Toje, što na Zachadzie «naprydumlali šeść połaŭ», hučyć u vystupach prakramloŭskich dziejačaŭ nie ŭpieršyniu. U studzieni vice-śpikier Dziaržaŭnaj dumy Piotr Tałstoj taksama kazaŭ pra toje, što ŭ patrabavańniach PASIE ab składzie rasijskaj delehacyi fihuravała najaŭnaść u joj pradstaŭnikoŭ šaści połaŭ. Paźniej jon pryznaŭ, što niapravilna zrazumieŭ rehłamient arhanizacyi, adnak i z nastupnych jaho razvažańniaŭ nie vyciakała, što ciapier jon razumieje ich pravilna).

28 červienia Ełtan Džon vykłaŭ u instahram zvarot da Pucina.

«Ja vielmi zasmuciŭsia, pračytaŭšy vaša niadaŭniaje intervju Financial Times. Ja kateharyčna nie zhodny z vašaj pazicyjaj pra toje, palityka, jakaja pryznaje mulcikulturnuju i seksualnuju raznastajnaść, sastareła dla našaha hramadstva. Ja liču dvudušnaj vaša zajavu ab tym, što vy chočacie, kab u ludziej ŁHBT «usio było dobra», i što «my ničoha suprać nikoha nie majem».

I ŭ toj ža čas rasijskija prakatčyki vyrašyli mocna adcenzuravać moj film «Rokietmien», prybraŭšy ŭsie zhadki pra toje, što ja znajšoŭ svajo ščaście z Devidam [Fiornišam, sužencam sera Ełtana], ź jakim my razam užo 25 hadoŭ i vychoŭvajem dvaich vydatnych synoŭ. Heta ŭ maim razumieńni — kryvadušnaść.

Ja vielmi hanarusia tym, što žyvu ŭ toj častcy śvietu, dzie našy ŭrady evalucyjanavali nastolki, što pryznali ŭniviersalnaje prava kožnaha čałavieka kachać taho, kaho jamu chočacca. I ja pa-sapraŭdnamu ŭdziačny za dasiahnuty prahres u našaj uradavaj palitycy, jaki dazvoliŭ i jurydyčna zamacavaŭ moj šlub z Devidam. Heta pryniesła nam abodvum niebyvałaje ščaście».

Z novaha bijahrafičnaha filma «Rokietmien» dla rasijskaha prakatu vyrazali niekalki scen ahulnym chranomietražam u piać chvilin, u pryvatnaści, paścielnuju scenu, dzie małady Ełtan zajmajecca seksam sa svaim mieniedžaram Džonam Rajdam, a taksama słajd, jaki źjaŭlajecca na tytrach, z fatahrafijaj Ełtana Džona z sužencam, na jakim paviedamlajecca, što «Ełtan Džon znajšoŭ svajo sapraŭdnaje kachańnie — Devida Fiorniša, ź jakim jany žyvuć razam užo 15 hadoŭ, pabralisia šlubam i vychoŭvajuć dvaich dziaciej».

Kampanija-prakatčyk zajaviła, što film byŭ adredahavany ŭ adpaviednaści z rasijskim zakanadaŭstvam.

U Biełarusi film pra Ełtana Džona pakažuć biez scen hiej-seksu i ŭžyvańnia narkotykaŭ

29 červienia, znachodziačysia na samicie «vialikaj dvaccatki» ŭ Osaka, Pucin adkazaŭ na pytańnie žurnalistaŭ pra paproki u jahony adras z boku Ełtana Džona:

«Ja jaho vielmi pavažaju, jon hienijalny muzyka, nasamreč jon ža jeździć da nas, pryčym my z zadavalnieńniem jaho ŭsie słuchajem, ale ja dumaju, što jon pamylajecca.

Ja tut ničoha nie pierabolšyŭ. U nas sapraŭdy vielmi roŭnaje staŭleńnie da pradstaŭnikoŭ ŁHBT-supolnaści. Realna — spakojnaje, absalutna niepraduziataje. U nas jość zakon, za jaki nas usie špyniali, — heta zakon ab zabaronie prapahandy hamaseksualizmu siarod niepaŭnaletnich.

Davajcie damo čałavieku vyraści, stać darosłym, a potym vyrašyć, chto jon taki. Pakińcie dziaciej u spakoi. Ja ŭžo kazaŭ u intervju — piać ci šeść połaŭ naprydumlali — transformiery, trans… jašče štości tam, ja ŭžo navat nie razumieju, što heta takoje.

Hetaja častka hramadztva dosyć ahresiŭna naviazvaje svoj punkt hledžańnia pieravažnaj bolšaści.

Treba być bolš łajalnymi adzin da adnaho, bolš adkrytymi i transparentnymi. Ničoha ja tut nie skazaŭ niezvyčajnaha. Treba pavažać ŭsich — heta praŭda. Ale nielha siłavym mietadam naviazvać svoj punkt hledžańnia».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?