15 maja ŭ Litaraturnym muziei Maksima Bahdanoviča — tvorčaja sustreča ź piśmieńnikami biełaruskaha Padlašša.
U vydavieckaj sieryi tydniovika biełarusaŭ Polščy «Niva» — važkaje papaŭnieńnie: dźviuchmoŭnaje vydańnie vieršaŭ Nadziei Artymovič «Krajavid ź nievidočnaj pamyłkaj» (u aryhinale i ŭ pierakładzie na polskuju movu Marcina Rembača) i novaja kniha prozy Michała Andrasiuka «Poŭnia».
15 maja ŭ Litaraturnym muziei Maksima Bahdanoviča hetyja dastatkova redkija ŭ našych kniharniach vydańni buduć pradstaŭlenyja na imprezie z udziełam aŭtaraŭ i redaktaraŭ.
Pierad słuchačami vystupiać prazaik, staršynia Sajuza biełaruskich piśmieńnikaŭ Barys Piatrovič, Aleś Razanaŭ, prazaik Michał Andrasiuk, vydaviec, hałoŭny redaktar tydniovika «Niva» Jaŭhien Vapa.
«Paśla doŭhaha zacišša pierad Čytačami nievierahodna tajamničaja «Poŭnia» Michała Andrasiuka. Litaratura biaźmiežnaja ŭ svajoj losavyznačalnaści času i prastory. Svaimi vobrazami i słovami vyśpiavała stahodździami ŭ mahičnym śviecie Biełaviežskaj puščy i ŭźlacieła zvyš miežaŭ žyćcia i śmierci. Čytaŭšy hetuju knihu my možam na chvilinu adčuvać siabie ŭ niekalkich vymiareńniach, ale biez patreby stavić lišnija pytańni nakont śvietu bačanaha i niebačanaha. Poŭnia prazaičnaha talentu Michała Andrasiuka raskryvajecca pierad nami», — piša Jaŭhien Vapa
***
Michał Andrasiuk naradziŭsia 2 śniežnia 1959 hoda ŭ Hajnaŭcy na Padlaššy. Dziacinstva i maładość pravioŭ u vioscy Vojnaŭka ŭ hminie Dubičy-Carkoŭnyja, dzie i zaraz pražyvaje. Piša pa-biełarusku i pa-polsku. Aŭtar knih prozy «Firma» (Biełastok, 2000), «Miascovaja hravitacyja» (2004), «Bieły koń» (2006), «Krzyżyk» (2015). Uznaharodžany «Załatym apostrafam» časopisa «Dziejasłoŭ» za svaju prozu, jakaja drukavałasia na jaho staronkach u 2009 hodzie.
Nadzieja Artymovič naradziłasia 18 lutaha 1946 hoda ŭ Aŭhustovie, Bielskaha pavietu. Skončyła Varšaŭski ŭniviersitet (biełaruskaja fiłałohija). Žyvie ŭ Bielsku-Padlašskim. Aŭtarka knih «We śnie w bólu słowa» (1979), «Rozdumy» (1981), «Siezon u biełych piejzažach» (1990), «Ź niespakojnych daroh» (1993), «Dźviery» (1994, razam z Alesiem Razanavym).
Miesca: Litaraturny muziej Maksima Bahdanoviča
Čas: 18.30
