17—18 krasavika ŭ Minsku adbyvajecca VI Mižnarodnaja navukova-praktyčnaja kanfierencyja «Vyzvaleńnie Biełaruś. Pamiać skroź hady», prymierkavanaja da 75-hodździa vyzvaleńnia Biełarusi ad nacyzmu. Kanfierencyja prachodzić na bazie Muzieja historyi Vialikaj Ajčynnaj vajny. Arhanizatarami mierapryjemstva vystupili taksama Ministerstva kultury Respubliki Biełaruś, Instytut historyi NAN RB i rasijski fond «Histaryčnaja pamiać».

Na adkryćci kanfierencyi z pryvitańniami vystupiŭ pradstaŭnik «Rossotrudničiestva» ŭ Biełarusi Leanid Makuraŭ, jaki adznačyŭ, što narody siońniašnich postsavieckich krain adstajali svaju niezaležnaść u vajnie, u jakoj «złamalisia» amal usie narody Jeŭropy. Makuraŭ padkreśliŭ, što ŭ hetaj vajnie pieramahli nie Rasija i nie Biełaruś, a šmatnacyjanalny saviecki narod, jaki składaŭsia z pradstaŭnikoŭ siońniašnich suvierennych dziaržaŭ. Zhadvałasia taksama ab patrebie supraćdziejničańnia sprobam pierapisvańnia historyi z boku zachodnich historykaŭ i ab płanach intehracyi i supracoŭnictva, pryniatych padčas sumiesnaj kalehii ministerstvaŭ kultury i adukacyi Rasii i Biełarusi, jakaja adbyłasia niadaŭna ŭ Maskvie.

Dyrektar Fonda «Histaryčnaja pamiać» Alaksandr Dziukaŭ adznačyŭ, što pohlad na padziei vyzvaleńnia Biełarusi z rasijskaha i biełaruskaha punktu hledžańnia adroźnivajecca tym, što z Maskvy vyzvaleńnie Biełarusi bačycca tolki adnym z etapaŭ vyzvaleńnia Uschodniaj Jeŭropy, a ź Minska — jak pazbaŭleńnie ad biesčałaviečnaha režymu akupacyi, jaki staviŭ pad pahrozu isnavańnie naroda.

U svaju čarhu biełaruskija historyki ŭ vystupach na kanfierencyi padkreślili, što pohlad na padziei vajny ź Biełarusi sapraŭdy adroźnivajecca ad rasijskaha. Tak, zahadčyk adździeła vajskovaj historyi Instytuta historyi NAN RB Alaksiej Litvin adznačyŭ, što ŭ dačynieńni da padziej 1944 hoda varta prapanavać novy, bolš dakładny termin — «poŭnaje vyzvaleńnie», bo vialikija terytoryi partyzanskich zon byli vyzvalenyja ad niamieckich zachopnikaŭ jašče z 1942 hoda.

A zahadčyk kafiedry historyi Biełarusi Bresckaha dziaržaŭnaha ŭniviersiteta prafiesar Uładzimir Zdanovič padčas ahladu histaryjahrafii pa temie akupacyjnaha režymu navat nazvaŭ sastarełym termin «postsaviecki pieryjad» i prapanavaŭ užyvać zamiest jaho ŭ dačynieńni da Biełarusi aznačeńnie «biełaruski pieryjad». Zdanovič taksama źviarnuŭ uvahu na toje, što doŭhi čas trahičnyja staronki akupacyi zamoŭčvalisia, tymčasam jak padkreślivaŭsia tolki masavy hieraizm. Darečy, biełaruskija historyki vystupali na kanfierencyi pa-biełarusku.

Клас
0
Панылы сорам
0
Ха-ха
0
Ого
0
Сумна
0
Абуральна
0